សាលាដំបូងរាជធានីភ្នំពេញប្រកាសថា សវនាការលើជនសង្ស័យដែលបាញ់សម្លាប់ លោក កែម ឡី គ្រោងធ្វើនៅថ្ងៃទី១ ខែមីនាខាងមុខ។ នេះបើតាមតារាងកាលវិភាគរបស់សាលាដំបូងរាជធានីភ្នំពេញ។
សមាសភាពមន្រ្តីតុលាការដែលនឹងចូលរួមសវនាការលើសំណុំរឿងនេះ មានលោកចៅក្រម លាង សំណាក់ និងតំណាងអយ្យការ លោក លី សុផាណា ប៉ុន្តែក្នុងតារាងនោះបានសរសេរថា ជនជាប់ឈ្មោះ អឿត អាង ហៅ ជួប សំលាប់ «កើតថ្ងៃទី១០ ខែ១២ ឆ្នាំ២០១៦»។
លោក លី សុផាណា អ្នកនាំពាក្យសាលាដំបូងរាជធានីភ្នំពេញបានបញ្ជាក់ប្រាប់VODថានេះកំហុសផ្នែកបច្ចេកទេស។
លោក កែម ឡី អ្នកវិភាគបញ្ហាសង្គមដ៏ល្បី ត្រូវបានខ្មាន់កាំភ្លើងបាញ់សម្លាប់នៅស្ដារម៉ាត ក្បែរស្ដុបបូកគោ រាជធានីភ្នំពេញ កាលពីខែកក្កដា ឆ្នាំ២០១៦។ ក្រោយហេតុការណ៍ អាជ្ញាធរបានចាប់ខ្លួនបុរសម្នាក់ឈ្មោះ «អឿត អាង» ហៅ «ជួប សំលាប់» ដោយបានបន្ដឃុំខ្លួនក្រោមបទចោទឃាតកម្មគិតទុកជាមុន និងកាន់កាប់អាវុធខុសច្បាប់។
នៅក្នុងរបាយការណ៍ស៊ើបអង្កេតជាវីដេអូរបស់សារព័ត៌មាន Al Jazeera ចេញផ្សាយកាលពីថ្ងៃ ទី១៣ ខែមករា បង្ហាញថា ពួកគេបានសម្ភាសន៍ជាមួយប្រភព និងសាក្សីជាច្រើនក្នុងខេត្តសៀមរាប ដែលបាននិយាយថា បុរសឈ្មោះ «អឿត អាង» ហៅក្រៅ «ជួប សំលាប់» ត្រូវបានកោះហៅដើម្បីទៅជួបប្រជុំជាមួយមន្ដ្រីថ្នាក់ស្រុក និងមន្ដ្រីយោធាជាន់ខ្ពស់មួយចំនួន គឺប្រហែលមួយសប្ដាហ៍ មុនកើតមានឃាតកម្មលើ លោក កែម ឡី។
មកដល់ពេលនេះ សមត្ថកិច្ចនៅមិនព្រមបង្ហាញកាមេរ៉ាសុវត្ថិភាពដែលថតពីសកម្មភាពឃាតកម្មនោះ ឲ្យសាធារណៈជនបានអស់មន្ទិលនៅឡើយ៕
