ខណៈស្ថានការណ៍នយោបាយកំពុងឡើងកម្ដៅខ្លាំង អង្គការសង្គមស៊ីវិលបានបង្ហាញក្ដីបារម្ភថា ការវិវឌ្ឍចុងក្រោយនៃនយោបាយនៅកម្ពុជានៅនឹងធ្វើឲ្យប៉ះពាល់ដល់លទ្ធិប្រជាធិបតេយ្យនៅកម្ពុជាស្របពេលការបោះឆ្នោតជិតមកដល់។
លោក ព្រាប កុល នាយកប្រត្តិបត្តិនៃអង្គការតម្លាភាពកម្ពុជា លើកឡើងថា ស្ថានការណ៍នយោបាយចុងក្រោយនៅកម្ពុជា គឺជារបត់ថ្មីស្រឡាងមួយ ពិសេសទាក់ទងនឹងការធ្វើវិសោធនកម្មច្បាប់បទបញ្ជាផ្ទៃក្នុងរដ្ឋសភា ដោយលោកថា នឹងធ្វើប៉ះពាល់ធ្ងន់ធ្ងរដល់លទ្ធិប្រជាធិបតេយ្យនៅកម្ពុជា។ នេះដោយយោងតាមហ្វេសប៊ុករបស់លោកនៅថ្ងៃអង្គារនេះ។
លោកសរសរថា៖ «ការវិវឌ្ឃចុងក្រោយនៃនយោបាយកម្ពុជាគួរឲ្យមានការព្រួយបារម្ភណាស់ ជាពិសេសការធ្វើច្បាប់ ឬវិសោធនកម្មច្បាប់ ដែលអាចឈានទៅដល់ការរំលាយគណបក្សនយោបាយណាមួយ។ នេះជារបត់ថ្មីមួយ ដែលអាចប៉ះពាល់ធ្ងន់ធ្ងរដល់ប្រជាធិបតេយ្យនៅកម្ពុជា»។
បើតាមហ្វេសប៊ុក លោក ព្រាប កុល រាល់សកម្មភាព ឬកិច្ចសម្របសម្រួលដែលលោកផ្ដល់ ដើម្បីជួយទប់ស្កាត់កុំឲ្យប្រទេសជាតិធ្លាក់ចូលក្នុងគ្រោះមហន្ដរាយ ដែលអាចក្លាយជាប្រយោជន៍ប្រទេសជិតខាងនោះ បែរជាត្រូវខ្មែរគ្នាឯងលាបពណ៌ឲ្យលោកទៅជាអាក្រក់ទៅវិញ។ លោកថា ពណ៌របស់លោកមានតែមួយប៉ុណ្ណោះ គឺ «សុច្ចរិតភាពនិងយុត្តិធម៌»។
កាលពីចុងខែមករាកន្លងទៅ នៅក្នុងកិច្ចប្រជុំសភាពេញអង្គមួយដែលគ្មានតំណាងរាស្ត្របក្សប្រឆាំងចូលរួមសោះនោះ លោកនាយករដ្ឋមន្ដ្រី ហ៊ុន សែន បានព្រមានធ្ងន់ៗ ដោយទំនងសំដៅដល់លោក សម រង្ស៊ី ដែលកំពុងនិរទេសខ្លួនថា ដើម្បីឲ្យអស់សិទ្ធិជាប្រធានបក្ស លោកថា តំណាងរាស្ត្រត្រូវធ្វើវិសោធនកម្មច្បាប់ស្តីពីគណបក្សនយោយ។ ការនេះត្រូវបានក្រុមអ្នកវិភាគ និងមជ្ឈដ្ឋានសង្គមយល់ថា ធ្វើឡើងក្នុងគោលបំណងដើម្បីរំលាយគណបក្សប្រឆាំង មុនការបោះឆ្នោតមកដល់។
មិនមែនតែអង្គការសង្គមស៊ីវិលក្នុងស្រុកទេដែលបង្ហាញក្ដីបារម្ភដូច្នេះ ឯកអគ្គរដ្ឋទូតសហរដ្ឋអាមេរិកលោក William A. Heidt កាលពីថ្ងៃទី៣ កុម្ភៈ បានថ្លែងក្នុងជំនួបពិភាក្សាមួយថា អាមេរិកចង់ឃើញអ្នកនយោបាយកម្ពុជាផ្សះផ្សាជាតិ មុនថ្ងៃបោះឆ្នោតមកដល់។ លោកមានប្រសាសន៍ថា ក្នុងកាលៈទេសៈបច្ចុប្បន្ន អ្នកនយោបាយកម្ពុជា គួរតែវិលរកវប្បធម៌សន្ទនា និងរួបរួមគ្នាឡើងវិញ ដោយលោកថា គឺធ្វើតាមឆន្ទៈរបស់ពលរដ្ឋដែលចង់បាន។
លោកថា៖ «ខ្ញុំចង់ត្រឡប់ទៅប្រធានបទផ្សះផ្សាជាតិ។ ជាងចុងបញ្ចប់ ផ្សះផ្សារជាតិ មានន័យថា វាដូចជាកម្លាំងនយោបាយធ្វើប្រតិបត្តិការក្នុងប្រទេសកម្ពុជា អីញ្ចឹង! ហើយការបំបែកមនុស្សចេញពីការប្រកួត ការដកគណបក្ស ការចេញសេចក្តីថ្លែងការណ៍ប្រឆាំងឬជំទាស់ ជាជាងវិលមក រកការសន្ទនាគ្នា […] ការធ្វើបែបនេះ ខ្ញុំមិនគិតថាជាអ្វីដែលប្រជាជនកម្ពុជាចង់បាននោះទេ!»។
លោក សុខ ឥសាន អ្នកនាំពាក្យគណបក្សប្រជាជនកម្ពុជា បានឲ្យ VOD ដឹងថា ការលើកឡើងនេះគ្រាន់តែជាមតិយោបល់ផ្សេងៗ របស់សង្គមស៊ីវិល ប៉ុន្ដែលោកថា ការធ្វើវិសោធនកម្មច្បាប់ឬបទបញ្ជាផ្ទៃក្នងរដ្ឋសភា គឺធ្វើឡើងស្របតាមស្ថានការណ៍នយោបាយ និងមានតែជួយពង្រឹងលទ្ធិប្រជាធិបតេយ្យទៅវិញទេ។
នាយកប្រត្តិបត្តិនៃអង្គការតម្លាភាពកម្ពុជា លោក ព្រាប កុល ក៏បានចូលរួមអំពាវនាវជាថ្មីឲ្យអ្នកនយោបាយប្រកាន់ជំហរដោះស្រាយបញ្ហាសង្គមជាតិ ដោយអហិង្សា និងសន្ដិវិធី៕
