មន្ត្រីអាដហុក១រូបចូលបំភ្លឺនៅតុលាការខេត្តមណ្ឌលគិរីនៅថ្ងៃទី២៤ក្នុងនាមដើមបណ្តឹង

មន្រ្តីកម្មវិធីពង្រឹងអំណាចសហគមន៍នៃ​សមាគមការពារសិទ្ធិមនុស្ស និង អភិវឌ្ឍន៍នៅកម្ពុជា (អាដហុក) នឹងចូលខ្លួនទៅបំភ្លឺជុំវិញបណ្តឹងរបស់លោក ដែលរកឃើញថា មានការខ្វះចន្លោះក្នុងការទប់ស្កាត់​បទល្មើសកាប់បំផ្លាញ​ព្រៃឈើនៅតំបន់មួយចំនួននៅក្នុងខេត្តនេះ។​

តាមដីកាកោះរបស់ព្រះរាជអាជ្ញារងនៃសាលាដំបូងខេត្តមណ្ឌលគិរី លោក សូ សុវិទ្យា បានតម្រូវឲ្យលោក ប៉ែន ប៊ុណ្ណារ៍ ចូលខ្លួនទៅបំភ្លឺនៅថ្ងៃទី២៤ខែកុម្ភៈនៅម៉ោង​៨ព្រឹក។ការបំភ្លឺនោះទាក់ទងលោក ប៉ែន ប៊ុនណ្ណារ៍ ប្តឹងទៅតុលាការថា អាជ្ញាធរពាក់ព័ន្ធបានធ្វេសប្រហែល និង បណ្តែតបណ្តោយមិនទទួលខុសត្រូវ ទុក​ឲ្យមានការកាប់បំផ្លាញព្រៃឈើ។​

លោក ប៉ែន ប៊ុណ្ណារ៍ បញ្ជាក់នៅក្នុងពាក្យបណ្តឹងរបស់លោកថា ដីជាង ១០០០ហិកតា នៅឃុំ ប៊ូស្រា និង ឃុំដាក់ដាំ នៅស្រុក ពេជ្រជ្រាដា កំពុងរងការកាប់បំផ្លាញពីជនមិនស្គាល់អត្តសញ្ញាណហ៊ុំព័ទ្ធធ្វើជាកម្មសិទ្ធិ។​

នៅលើហ្វេសប៊ុកលោក ប៉ែន ប៊ុណ្ណារ៍ ក៏បានជំរុញឲ្យប្រជាពលរដ្ឋខ្មែរទាំងអស់ ដែលរកឃើញថា មានបទល្មើសកើតឡើងត្រូវដាក់ប្តឹងទៅតុលាការឲ្យចាត់វិធានការទប់ស្កាត់។​