សហចៅក្រមស៊ើបអង្កេតនៃសាលាក្ដីខ្មែរក្រហមបានសម្រេចលើកលែងការចោទប្រកាន់លើអ្នកស្រី អ៊ឹម ចែម ដោយថា អ្នកស្រីមិនស្ថិតក្នុងរង្វង់យុត្ថាធិការរបស់ អ.វ.ត.ក។
នៅក្នុងសេចក្ដីប្រកាសព័ត៌មានចេញផ្សាយនៅថ្ងៃពុធទី២២កុម្ភៈនេះ សហចៅក្រមស៊ើបអង្កេតបានសម្រេចទម្លាក់ការចោទប្រកាន់លើជនត្រូវចោទអ្នកស្រី អ៊ឹម ចែម ហើយ បន្ទាប់ពីបានវាយតម្លៃលើភស្ដុតាងក្នុងកំឡុងពេលស៊ើបសួរ ដោយសម្រេចថា អ្នកស្រី អ៊ឹម ចែម «មិនស្ថិតនៅក្រោមយយុត្តាធិការបុគ្គលរបស់ អ.វ.ត.ក» ឡើយ។ ចៅក្រមស៊ើបអង្កេតយល់ឃើញថា អ្នកស្រី អ៊ឹម ចែម មិនមែនជាមេដឹកនាំជាន់ខ្ពស់ ឬ អ្នកទទួលខុសត្រូវខ្ពស់បំផុតនៅក្នុងរបបខ្មែរក្រហមនោះទេ។
សេចក្ដីប្រកាសព័ត៌មានដដែល ពុំបានបញ្ជាក់ថា តើសហចៅក្រមស៊ើបអង្កេត ធ្វើការសម្រេចបែបនេះ ដោយផ្អែកលើភស្ដុតាងជាក់លាក់ណាមួយនោះទេ។
អ្នកនាំពាក្យសាលាក្តីខ្មែរក្រហមលោក នេត ភក្ដ្រា បានឲ្យ VOD ដឹងថាការជូនដំណឹងពីការលើកលែងចោទប្រកាន់នេះ ជាការគោរពដល់សិទ្ធិរបស់ជនត្រូវចោទ។
លោកបន្ដថា សម្រាប់ការពន្យល់អំពីមូលហេតុនៃទម្លាក់ការចោទប្រកាន់នេះ នឹងធ្វើឡើងនៅក្នុងឯកសារដាច់ដោយឡែកមួយទៀត ដែលមានសំអាងហេតុពេញលេញ ដោយលោកថា នឹងដាក់ចេញតាមក្រោយនៅពេលវេលាសមស្រប។
លោកថា៖ «បញ្ហានៃការពន្យល់ថា មិនស្ថិតនៅក្រោមដែនយុត្ថាធិការហ្នឹង គឺឈរនៅលើមូលដ្ឋានអ្វី ភស្ដុតាងអ្វី គឺគេនឹងបញ្ជាក់ឲ្យច្បាស់នៅក្នុងដីកាដំណោះស្រាយទាំងមូលតែម្ដង ដែលពេលនេះ គឺយើងអត់ទាន់បានចេញនៅឡើយទេដោយសារតែត្រូវបញ្ចប់កិច្ចការហ្នឹង។ ឯកសារដាច់ដោយឡែកមួយទៀត ដែលមានសំអាងហេតុពេញលេញ នឹងដាក់នៅតាមក្រោយ នៅក្នុងពេលវេលាសមស្រប»។
បើតាមលោក នេត ភក្ដ្រា ការសម្រេចលើកលែងចោទប្រកាន់នេះនឹងធ្វើឲ្យពាក្យសុំតាំងខ្លួនជាដើមបណ្ដឹងរដ្ឋប្បវេណីទាំងអស់ត្រូវបានបដិសេធ និងថាអ្នកស្រី អ៊ឹម ចែម ក៏នឹងមានសេរីភាពឡើងវិញ វាលែងតែមានការបដិសេធពីអង្គបុរេជំនុំជម្រះប៉ុណ្ណោះ។ លោកថា អង្គជំនុំជម្រះ នឹងសម្រេចលើបញ្ហានេះនៅពេលក្រោយ បើសិនជាមានការប្ដឹងជំទាស់ពីភាគីពាក់ព័ន្ធទៅនឹងដីកា ដំណោះស្រាយរបស់សហចៅក្រមស៊ើបអង្កេត។
អ្នកស្រី អ៊ឹម ចែមត្រូវបានគេចោទប្រកាន់ទាក់ទងនឹងបទល្មើស «ឧក្រិដ្ឋកម្មប្រឆាំងនឹងមនុស្សជាតិដែលប្រព្រឹត្តឡើងនៅថ្ងៃទី១៧ខែមេសាឆ្នាំ១៩៧៥ ដល់ថ្ងៃទី៦ខែមករាឆ្នាំ១៩៧៩»។
ពាក់ព័ន្ធនឹងសំណុំរឿង០០៤នេះ ក្រៅពីអ្នកស្រី អ៊ឹម ចែម ក៏មានជនត្រូវចោទ២នាក់ផ្សេងទៀតកំពុងស្ថិតនៅក្រោមការស៊ើបសួររបស់ចៅក្រមស៊ើបអង្កេត គឺមានលោក អោ អាន និងលោក យឹម ទិត្យ។
លោក អោ អាន ត្រូវបានសហចៅក្រមស៊ើបអង្កេតអន្តរជាតិ ដាក់ឲ្យស្ថិតនៅក្រោមការត្រួតពិនិត្យនៅថ្ងៃទី២៧ ខែមីនា ឆ្នាំ២០១៥។ ចំណែក លោក យឹម ទិត្យ ឲ្យស្ថិតនៅក្រោមការពិនិត្យនៅថ្ងៃទី៩ ខែធ្នូឆ្នាំ២០១៥៕