ប្រធានសមាគមសម្ព័ន្ធនិស្សិតបញ្ញាវន្តខ្មែរ លោក មួង សូនី បានអះអាងថា អាជ្ញាធររាជធានីភ្នំពេញ បានចុះទៅប្រាប់រូបលោក ឲ្យស្នើសុំការអនុញ្ញាតពីអាជ្ញាធរ មុននឹងចាក់បញ្ចាំងវីដេអូស៊ើបអង្កេតលើករណីឃាតកម្មអ្នកវិភាគល្បីឈ្មោះ លោក កែម ឡី។
សមាគមសម្ព័ន្ធនិស្សិតបញ្ញាវន្តខ្មែរ គ្រោងនឹងចាក់បញ្ចាំងវីដេអូស៊ើបអង្កេតទៅលើឃាតកម្មលោក កែម ឡី នៅថ្ងៃស្អែកនេះ ដែលវីដេអូនោះត្រូវបានផលិតដោយទូរទស្សន៍អារ៉ាប់អាល់ហ្សាហ្ស៊ីរ៉ា (Al Jazeera)។
ប៉ុន្តែ លោក មួង សូនី បានប្រាប់ VOD នៅថ្ងៃនេះថា ចៅសង្កាត់ទួលសង្កែ លោក សយ កុសល និងក្រុមមន្ត្រីមូលដ្ឋានចំនួន ៦រូបទៀត កាលពីព្រឹកថ្ងៃនេះ បានចុះទៅសួរនាំដល់ទីស្នាក់ការសមាគម និងបានប្រាប់ទៅលោក ឲ្យសុំច្បាប់អនុញ្ញាជាមុនសិន មុននឹងចាក់បញ្ចាំងវីដេអូស៊ើបអង្កេតនោះ។
យុវជន មួង សូនី ដែលបានប្រមូលចងក្រងកម្រងទស្សនៈរបស់អ្នកវិភាគលោក កែម ឡី នោះ បានចាត់ទុកទង្វើរបស់អាជ្ញាធរមូលដ្ឋានថា ជាការគំរាមកំហែងដល់ក្រុមយុវជនរបស់លោក។
លោកបញ្ជាក់ថា “ខ្ញុំថា នេះជារូបភាពគំរាមទៅហើយ អារូបភាពមកនិយាយនេះ អាហ្នឹងគេហៅរូបភាពគំរាមមិនមែនអត់គំរាមទេ”។
វីអូឌីមិនអាចសុំការអត្ថាធិប្បាយពីលោក សយ កុសល ចៅសង្កាត់ទួលសង្កែបាននោះទេ ដោយលោកប្រាប់ថា ជាប់រវល់ចែកអំណោយដល់ប្រជាពលរដ្ឋ ៣០០គ្រួសារ នៅក្នុងសង្កាត់របស់លោក។
ទោះយ៉ាងណា លោក មួង សូនី បង្ហាញជំហរមិនសុំច្បាប់នោះទេ ដោយថា កម្មវិធីនេះមិនត្រូវបានរៀបចំឡើងនៅទីធ្លាសាធារណៈ និងមិនប៉ះពាល់ដល់សណ្ដាប់ធ្នាប់សាធារណៈនោះឡើយ ខណៈអ្នកចូលរួមមានត្រឹមតែ ៣០ ទៅ ៤០នាក់ប៉ុណ្ណោះ។
លោក អំ សំអាត ប្រធានផ្នែកស៊ើបអង្កេតអង្គការលីកាដូ បានលើកឡើងថា ការចាក់បញ្ចាំងវីដេអូស៊ើបអង្កេតករណីបាញ់សម្លាប់លោកបណ្ឌិតកែមឡីលោកថា មិនចាំបាច់សុំច្បាប់នោះទេ ព្រោះជាទីស្នាក់ការអង្គការ ហើយវាប្រៀបបាននឹងទីកន្លែងឯកជនដែរ។ លោកបន្ថែមថា មិនមានច្បាប់ណាដែលចែងហាមឃាត់ការចាក់បញ្ចាំងវីដេអូនៅតាមផ្ទះនោះឡើយ។
លោកប្រាប់ថា៖“វាជារឿងធម្មតាទៅហើយនៅពេលដែលរឿងរសើបណាមួយត្រូវបានគេរំលឹកហ្នឹង អាជ្ញាធរហាក់បីដូចជាមានការភ័យខ្លាច។ យើងឃើញសូម្បីតែគេបញ្ជាំងនៅទីឯងជនរបស់គេ ក៏តម្រូវឱ្យមានច្បាប់ទម្លាប់ដែរ”។
វីដេអូស៊ើបអង្កេតមានចំណងជើងថា “Cambodia’s Deadly Politics” ឬប្រែជាភាសាខ្មែរថា “នយោបាយប្រឡាក់ឈាមរបស់កម្ពុជា” ដែលមានរយៈពេលជាង ២៦នាទី ត្រូវបានផលិតឡើងដោយទូរទស្សន៍ដ៏ល្បីល្បាញ Al Jazeera របស់អារ៉ាប់ និងចាក់ផ្សាយកាលពីខែមករា ឆ្នាំ២០១៧នេះ។
ខ្សែវីដេអូនោះ បានស៊ើបអង្កេតទៅលើឃាតកម្មដ៏គួរឲ្យសង្ស័យលើលោក កែម ឡី អ្នកវិភាគដ៏ល្បីល្បាញម្នាក់ ដែលត្រូវបានខ្មាន់កាំភ្លើងបាញ់សម្លាប់ទាំងកណ្ដាលថ្ងៃចែស នៅក្នុងម៉ាតស្ថិតក្នុងការ៉ាស់សាំងកាល់តិច ម្ដុំស្តុបបូកគោ កាលពីថ្ងៃទី១០ ខែកក្កដា ឆ្នាំមុន៕