តុលាការខេត្ដឧត្ដរមានជ័យបានកោះហៅពលរដ្ឋបីនាក់ ក្នុងចំណោមជាងពីររយនាក់ សាកសួរ ដោយចោទថា បំផ្លិចបំផ្លាញទ្រព្យសម្បត្ដិដោយចេតនា ករណីជម្លោះដីធ្លី នៅស្រុកស្រីស្នំ ខេត្ដសៀមរាប កាលពីឆ្នាំ២០១៦។
កាលពីខែសីហា ឆ្នាំ២០១៦កន្លងមក ខ្ទមពលរដ្ឋចំនួនបីខ្នង ត្រូវបានពលរដ្ឋជាង២រយនាក់ ដុតនិងកាប់បំផ្លាញចោល ដោយចោទថា សង់នៅលើដីជម្លោះ ស្ថិតនៅជាប់ព្រំប្រទល់ស្រុកអន្លង់វែង ខេត្ដឧត្ដរមានជ័យ និងស្រុកស្រីស្នំខេត្ដសៀមរាប។
ពលរដ្ឋ ដែលត្រូវតុលាការកោះហៅ លោក ណាត់ ឈា នៅភូមិចារថ្មី ឃុំលំទង ស្រុកអន្លង់វែង ខេត្ដឧត្ដរមានជ័យ ប្រាប់វីអូឌី នៅថ្ងៃនេះថា ពួកគាត់ចំនួនបីនាក់ ឈ្មោះ ផើយ ផន ឌឿន ឌឿ និងរូបលោកផ្ទាល់ នៅភូមិចារថ្មី ឃុំលំទង ស្រុកអន្លង់វែង ខេត្ដឧត្ដរមានជ័យ ត្រូវបានតុលាការចោទពីបទបំផ្លិចបំផ្លាញទ្រព្យសម្បត្ដិដោយចេតនា ទៅលើខ្ទមពលរដ្ឋបីគ្រួសារនៅស្រុកស្រីស្នំ ខេត្ដសៀមរាប កាលពីខែសីហាឆ្នាំ២០១៦ខណៈខ្ទមនោះសង់នៅដីមានជម្លោះ។
លោកថា ការកោះហៅពួកគាត់សាកសួរនេះ ជារឿងអយុត្ដិធម៌ ដោយសារអ្នកចូលរួមបំផ្លាញខ្ទមនោះ មានអ្នកភូមិជាង២០០នាក់។
វីអូឌីមិនទាន់អាចទាក់ទងព្រះរាជអាជ្ញានៃតុលាការខេត្ដឧត្ដរមានជ័យលោក កូយ កាន់យ៉ា ដើម្បីសាកសួរបាននៅឡើយទេ។
ទោះជាយ៉ាងណា អ្នកសម្របសម្រួលនៃសមាគមការពារសិទ្ធិមនុស្សខេត្ដឧត្ដរមានជ័យ លោក ស្រី ណារ៉េន មានប្រសាសន៍ថា ពលរដ្ឋទាំងបីនាក់នោះនឹងចូលបំភ្លឺតាមការកោះហៅរបស់តុលាការ ហើយលោកនឹងផ្ដល់មេធាវីការពារដល់ពួកគេ។លោកបន្ដថា ការបំផ្លិចបំផ្លាញខ្ទមនោះ ដោយសារពលរដ្ឋបីគ្រួសារនោះទៅសង់លើដីមានជម្លោះ ហើយអាជ្ញាធរមានគ្រោងដោះស្រាយជូនពលរដ្ឋដែរ។ លោកបញ្ជាក់ថា ដីជម្លោះនោះមានប្រមាណ៣០ហិកតា ហើយពលរដ្ឋស្វែងរកដំណោះស្រាយ និងរកអន្ដរគមន៍ពីមន្រ្ដីរដ្ឋាភិបាលនៅរាជធានីភ្នំពេញផងដែរ៕