នៅទីបំផុតកីឡាករឡាវបានក្លាយជាម្ចាស់ជើងឯកខុសពីការគ្រោងទុក ក្នុងការប្រកួតប្រភេទទម្ងន់៦៩គីឡូក្រាមសម្រាប់ព្រឹត្តិការណ៍ដណ្ដើមខ្សែក្រវាត់អន្តរជាតិ ដែលមានកីឡាករខ្មែរនិងបរទេសប្រជែងគ្នា។នេះជាការប្រកួតដែលបានធ្វើឡើងនៅលើសង្វៀនទូរទស្សន៍អាស៊ីអាគ្នេយ៍កាលពីរសៀលថ្ងៃទី១៨ ខែមីនា ខណៈដែលលទ្ធផលនេះក៏ត្រូវភរិយាកីឡាករឡុង សុវណ្ណឌឿន មិនទទួលស្គាល់។
យោងតាមការបញ្ជាក់របស់លោក ញាណ សុធី អ្នករៀបចំការប្រកួតបានអះអាងថា ព្រឹត្តិការណ៍ដណ្ដើមខ្សែក្រវាត់អន្តរជាតិនេះ មានការចូលរួមដោយកីឡាករកម្ពុជា៤រូបនិងកីឡាករឡាវ២រូប និងកីឡាករថៃ២រូប។ លោកថា នេះជាការប្រកួតវគ្គទី២ ដោយកីឡាករទាំង៤ត្រូវកំណត់ចែកពូលដាច់ដោយឡែក គឺក្រុមកម្ពុជាមួយក្រុម និងក្រុមខាងបរទេសមួយក្រុម។ កីឡាករក្នុងក្រុមនីមួយៗ ប្រកួតខ្វែងគ្នាទៅវិញទៅមក ហើយសន្សំពិន្ទុក្នុងពូលរៀងខ្លួន ដើម្បីស្វែងរកអ្នកមានពិន្ទុខ្ពស់ជាងគេក្នុងក្រុមកម្ពុជា និងមួយរូបក្នុងក្រុមថៃអោយឡើងប្រកួតយកលេខ១និងលេខ២ ឬប្រកួតយកទឹកប្រាក់២០លានរៀល ស្មើនឹង៥ពាន់ដុល្លារ និងខ្សែក្រវាត់ជើងឯក។
លោកបានពន្យល់ថា កីឡាករខ្មែរត្រូវប្រកួតជាមួយកីឡាករបរទេសក្នុងម្នាក់៤ប្រកួត ហើយបន្ទាប់ពីការប្រកួតចប់ គឺយកពិន្ទុដែលពួកគេបានទទួលយកមកគិតសម្រាប់តែក្រុមរបស់ពួកគេប៉ុណ្ណោះ ដោយកីឡាករកម្ពុជានិងកីឡាករបរទេសណាទទួលបានពិន្ទុនាំមុខគេ២រូប នឹងត្រូវឡើងប្រកួតវគ្គខ្វែងឬហៅថាឡើងប្រកួតវគ្គពាក់កណ្ដាលផ្ដាច់ព្រ័ត្រ។ យ៉ាងណាក៏ដោយ លោកបានសម្ដែងការសោកស្ដាយ ដោយសារតែវគ្គផ្ដាច់ព្រ័ត្រ គឺកីឡាករ ឡុង សុវណ្ណឌឿន ដែលមានការរំពឹងខ្លាំងថានឹងក្លាយជាម្ចាស់ជើងឯក បានចាញ់ពិន្ទុកីឡាករឡាវ ហើយរបូតទឹកប្រាក់៥ពាន់ និងតំណែងជើងឯកសម្រាប់រដូវកាលទី២នៅក្នុងព្រឹត្តិការណ៍នោះ។
លោក ញាណ សុធី បន្តថា កីឡាករ២រូបចុងក្រោយដែលបានឡើងប្រកួតដណ្ដើមគ្នាយកខ្សែក្រវាត់ជើងឯកអន្តរជាតិនោះ គឺកីឡាករ ឡុង សុវណ្ណឌឿន មកពីក្លឹបសាលវន្តកីឡា និងកីឡាករឡាវ Thav Oulan ។ កីទ្បាករទាំងពីរបានឡើងប្រកួតគ្នាយ៉ាងស្វិតស្វាញបំផុត ដោយសារតែម្នាក់ៗសុទ្ធតែចង់ដណ្ដើមយកចំណាត់ថ្នាក់លេខ១ ដើម្បីគ្រងតំណែងជាម្ចាស់ខ្សែក្រវាត់។ លោកថាក្នុងពេលប្រកួតវិលជុំ កីឡាករឡាវរូបនេះបានត្រឹមតែចាញ់ពិន្ទុឡុង សុវណ្ណឌឿន ប៉ុណ្ណោះ ទើបការប្រកួតចុងក្រោយអ្នកណាក៏ជឿ១០០ភាគរយថាកីឡាករឡាវនឹងចាញ់ជាថ្មី។
លោកថាការប្រកួតមានភាពស្វិតស្វាញយ៉ាងខ្លាំង ហើយបណ្ដាលមកពីទឹកទី៤ និងទី៥ កីឡាករឡាវឈ្នះប្រៀបខ្លាំងពេក ទើបជ័យជម្នះជាម្ចាស់ខ្សែក្រវាត់អន្តរជាតិលើកទី២របស់ព្រឹត្តិការណ៍ខារ៉ាបាវកាលពីល្ងាចថ្ងៃសៅរនោះ បានទៅលើបរទេស។ លោកថាការជំទាស់មិនទទួលយកលទ្ធផលរបស់ភរិយាលោកឡុង សុវណ្ណឌឿន គឺជារឿងដែលសុខចិត្តចំពោះលទ្ធផលបរាជ័យរបស់ស្វាមី ប៉ុន្តែលោកថាអ្វីៗដែលបានធ្វើឡើងគឺជារឿងសមស្របផ្អែកទៅតាមកម្រិតប្រកួតជាក់ស្ដែង។ លោកថាសង្វៀនកម្ពុជា មិនអាចសម្អាងថាការប្រកួតក្នុងស្រុក អោយតែកីឡាករកម្ពុជាខ្លួនឯងក៏អោយឈ្នះទាំងចាញ់ប្រៀបនោះទេ ដើម្បីកុំអោយវិស័យកីឡាករអាប់អោន និងកុំអោយកីឡាករកម្ពុជាដែលមានសមត្ថភាពមិនដល់បរទេសមិនខំប្រឹងប្រែង។ លោកថាឡុង សុវណ្ណឌឿន ប្រកួតល្អ៣ទឹកដំបូង តែក៏មិនឈ្នះដាច់ដែរគឺស្ថិតក្នុងភាពប្រហាក់ប្រហែលគ្នាប៉ុណ្ណោះ ប៉ុន្តែនៅទឹកទី៤ និងទី៥ គឺកីឡាករកម្ពុជាត្រូវកីឡាករឡាវវាយអោយបាក់មុខយ៉ាងគំហ៊ុកទើបជ័យជម្នះត្រូវតែអោយទៅឡាវ។
លោកថាម្ចាស់ខ្សែក្រវាត់អន្តរជាតិ មិនអាចជាកីឡាករដែលបានត្រឹមប្រហាក់ប្រហែលក្នុងការវាយលុក ហើយចុងក្រោយ ក៏ត្រូវគេវាយដួលប្រផះប្រភីងដូចអ្វីដែលឡុង សុវណ្ណឌឿន បានប្រឈមនោះទេ ទើបលោកបញ្ជាក់ថាការតវ៉ារបស់ភរិយាលោកឡុង សុវណ្ណឌឿន មិនសមហេតុផល។ លោកនិយាយថា«ប្រពន្ធគាត់ឈរស្រែកថាលទ្ធផលនោះមិនត្រឹមត្រូវ តែគាត់មានមើលឡុង សុវណ្ណឌឿន ២ទឹកចុងក្រោយទេ តើយើងអាចអោយគាត់ឈ្នះបានអត់ បើ៣ទឹកដំបូងគាត់វាយបានឈ្នះប្រៀបមែន តែឡាវគេអត់អីផងហ្នឹង តែដល់២ទឹកចុងក្រោយ គេវ៉ៃគាត់ដួលទីណាត់ទីណែង ហើយអោយខ្សែក្រវាត់មិច គេមិនថាការប្រកួតហ្នឹងបក្សពួកងាប់!»។
លោកថាការប្រកួតមិនមានចំណាត់ថ្នាក់លេខ៣ និងលេខ៤នោះទេ ដោយជើងឯកបានខ្សែក្រវាត់ បានពាន និងទឹកប្រាក់២០លានរៀល និងកីឡាករឡុង សុវណ្ណឌឿន បានទឹកប្រាក់១២លានរៀល ស្មើនឹង៣០០០ដុល្លារ និងពានកិត្តិយសមួយ។