យ៉ាងហោចណាស់មនុស្ស ៣៧នាក់ នៅខេត្តបាត់ដំបង បានធ្លាក់ខ្លួនឈឺ និងមានអការក្អួតចង្អោររាគរូស បន្ទាប់ពីពួកគេទទួលទានទឹកគ្មានអនាម័យ ព្រមទាំងប្រឈមនឹងអាកាសធាតុក្ដៅខ្លាំង។ នេះបើយោងតាមវេបសាយនគរបាលជាតិ។
វេបសាយនគរបាលជាតិបានដកស្រង់សម្ដីរបស់អធិការនគរបាលស្រុកបាណន់ លោក ប៉ាន់ វ៉ាន់នី មកចុះផ្សាយថា ប្រជាពលរដ្ឋ៣៧នាក់ ភាគច្រើនជាមនុស្សស្រី និងកូនក្មេង នៅភូមិក្រពើត្បូង ក្នុងឃុំភ្នំសំពៅ ស្រុកបាណន់ ត្រូវបានអាជ្ញាធរមូលដ្ឋាន និងក្រុមគ្រួសារបញ្ជូនទៅព្យាបាលនៅមណ្ឌលសុខភាព បន្ទាប់ពីពួកគេមានអការក្អួតចង្អោរ និងរាគរូស។
មន្ត្រីនគរបាលរូបនេះ បន្ថែមថា ប្រជាពលរដ្ឋទាំងនោះ បានធ្លាក់ខ្លួនទៅមានអការៈបែបនោះ បន្ទាប់ពីពួកគេទទួលទានទឹកឆៅនៅក្នុងពាង ខណៈដែលអាកាសធាតុក្ដៅខ្លាំង។
ទោះជាយ៉ាងណា សមត្ថកិច្ចបញ្ជាក់ថា គ្រូពេទ្យនៅមូលដ្ឋាន បានត្រួតពិនិត្យ និងបន្តស្រាវជ្រាវរកមូលហេតុបន្ថែមទៀត។
ប្រធានសហព័ន្ធសហជីពកម្មករចំណីអាហារនិងសេវាកម្មកម្ពុជាលោក ស ម៉ូរ៉ា យល់ថា ករណីដែលពលរដ្ឋពុលទឹកនៅខេត្តបាត់ដំបង ដោយសារពួកគេភាគច្រើន ជាពិសេសនៅតំបន់ដាច់ស្រយាល មិនទទួលបានការអប់រំសុខភាព ពីអាជ្ញាធរមូលដ្ឋាន។ លោកថា បើអាជ្ញាធរមូលដ្ឋាននៅតែមិនយកចិត្តទុកដាក់អប់រំ ឬណែនាំប្រជាពលរដ្ឋឲ្យយល់ដឹងពីការថែទំាសុខភាពទេ នោះសំឡេងឆ្នោតគណបក្សកាន់អំណាចនឹងថយនៅអាណត្តិនេះ។ លោកនិយាយថា «សម័យឥឡូវនេះ គួរតែចាប់ផ្តើមក្នុងការប្រកួតប្រជែងក្នុងការធ្វើឲ្យបានប្រសារឡើងនូវសេវាកម្មពីស្ថាប័នរដ្ឋទៅដល់ប្រជាពលរដ្ឋ បើសិនជាស្ថានភាពមិនមានការប្រែប្រួល មិនមានការផ្លាស់ប្តូរ ប្រាកដហើយ ប្រជាពលរដ្ឋអាចគាត់នឹងបោះឆ្នោតផ្លាស់ប្តូរជ្រើសរើសមេឃុំ ភូមិថ្មី ដើម្បីឲ្យជួយដល់ពួកគាត់ បើសិនគាត់មិនធ្វើកិច្ចការងារល្អប្រសើរ វានឹងប៉ះពាល់ដល់សំឡេងឆ្នោតគាត់[គណបក្សប្រជាជនកម្ពុជា]»។
កាលពីពាក់កណ្តាលខែវិច្ឆិកា សិស្សសាលាឯកជនចំនួន១៤០នាក់ ក៏មានអាការៈក្អួតចង្អោរ ចុកពោះ និងវិលមុខជាបន្ដបន្ទាប់ ក្រោយពួកគេបរិភោគបង្អែមនៅសាលាយីស៊ូគ្រឹះមួយ នៅស្រុកត្រពាំងប្រាសាទ ខេត្ដឧត្ដរមានជ័យ។ ក្រោយមកទៀត នៅចុងខែធ្នូ ឆ្នាំ២០១៦ ព្រះសង្ឃជាង១០អង្គ គង់នៅវត្ដស្រែល្អ ឃុំបាក់អន្លូង ស្រុកត្រពាំងប្រាសាទ បានឆាន់ភេសជ្ជៈតែគុជ និងស្កស ដែលអ្នកភូមិដឹកលក់តាមម៉ូតូ បណ្តាលឲ្យពុល ចុកពោះ និងក្អួតផងដែរ៕
