ប្រទេសថៃ ម៉ាឡេស៊ី និងឥណ្ឌូនេស៊ី គ្រោងសហការគ្នាដើម្បីធានាស្ថេរភាពតម្លៃកៅស៊ូពិភពលោក ដែលចេះតែឡើងចុះមិនទៀងទាត់ ក្រោយពីវាបង្ហាញសញ្ញាងើបឡើងវិញ។ នេះដោយយោងតាមការចុះផ្សាយរបស់កាសែតបាងកក ប៉ុស្តិ៍របស់ថៃ។
កាសែតនេះបានដកស្រង់សម្ដីប្រធានអាជ្ញាធរកៅស៊ូថៃ ដែលបាននិយាយថា ប្រទេសទាំងបីដែលជាអ្នកផ្គត់ផ្គង់កៅស៊ូដល់ទៅ ៧០ភាគរយនៅលើទីផ្សារពិភពលោកនោះ ថ្មីៗនេះ បានជួបប្រជុំគ្នាដើម្បីពិភាក្សាអំពីស្ថានភាពកៅស៊ូ។
មន្ត្រីថៃអះអាងប្រាប់បាងកក ប៉ុស្តិ៍ថា ប្រទេសទាំងបីបានឯកភាពថា តម្លៃកៅស៊ូនឹងបន្តឡើងថ្លៃដោយសារកត្តាជាច្រើន រួមទាំងការទម្លាក់ចុះទំហំនៃការផ្គត់ផ្គង់ដោយសាររដូវភ្លៀងធ្លាក់ និងទឹកជំនន់នៅភាគខាងត្បូងប្រទេសថៃផងដែរ។ ទោះជាយ៉ាងណា ប្រទេសផ្គត់ផ្គង់កៅស៊ូធំទាំងបីនេះ នៅតែមើលឃើញតម្លៃកៅស៊ូនៅតែឡើងថ្លៃ។
ជាលទ្ធផល ប្រទេសទាំងបីបានឯកភាពបង្កើនតម្រូវការក្នុងស្រុកឲ្យបានច្រើន។ ប្រទេសទាំងបីនេះ ក៏គ្រោងជួបប្រជុំពិភាក្សាគ្នាម្ដងទៀតនៅខែកក្កដាខាងមុខនេះ ដើម្បីពិនិត្យមើលថា ប្រសិនបើតម្លៃនៅតែធ្លាក់ចុះ ប្រទេសទាំងបីអាចពិចារណាគ្រប់គ្រងលើការនាំចេញ ដើម្បីដាក់សម្ពាធលើតម្លៃកៅស៊ូ៕
