ក្រុមបាតុករដែលពាក់ព័ន្ធនឹងជម្លោះដីធ្លីនៅជិតទីក្រុងហាណូយ បានដោះលែងមន្ត្រី ២០រូបចុងក្រោយ ដែលពួកគេបានចាប់ទុកជាចំណាប់ខ្មាំងអស់រយៈពេលជិត ១សប្ដាហ៍ ក្រោយពីដំណើរចូលសួរសុខទុក្ខរបស់មន្ត្រីជាន់ខ្ពស់ម្នាក់។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters ដែលបានដកស្រង់សម្ដីសាក្សី កាលពីថ្ងៃម្សិលមិញ។
ក្រុមអ្នកភូមិនៅភូមិដុងតាំ ស្ថិតនៅចម្ងាយ ៤០គីឡូម៉ែត្រពីទីក្រុងហាណូយ បានចាប់មន្ត្រី ៣៨រូប ក្នុងនោះមានទាំងមន្ត្រីប៉ូលិសផងដែរ កាលពីសប្ដាហ៍មុន ក្រោយពីអ្នកភូមិ ៤នាក់ ត្រូវបានគេចាប់ខ្លួនក្នុងលក្ខណៈជាការសងសឹកនឹងការតវ៉ានានាអំឡុងពេលមានជម្លោះដីធ្លីខ្លាំងក្លា។
មន្ត្រី ១៥រូប ត្រូវបានគេដោះលែងមកវិញកាលពីថ្ងៃចន្ទដើមសប្ដាហ៍នេះ ហើយមន្ត្រី ៣រូបទៀត បានរត់គេចខ្លួន ខណៈអាជ្ញាធរក៏បានដោះលែងក្រុមបាតុករជាប់ឃុំផងដែរ។
អ្នកភូមិដុងតាំ និយាយថា ពួកគេទទួលបានសំណងមិនត្រឹមត្រូវពីអាជ្ញាធរ ដែលបានដណ្ដើមកាន់កាប់ដីធ្លីផ្ទះសម្បែងរបស់ពួកគេ សម្រាប់គម្រោងអភិវឌ្ឍន៍ទូរគមនាគមន៍។
មន្ត្រីទាំង ២០រូបនោះ ត្រូវបានគេដោះលែងមកវិញ ក្រោយពីប្រធានគណៈកម្មាធិការប្រជាជនទីក្រុងហាណូយ លោក ង្វៀន ដុកចុង ទៅជួបជាមួយក្រុមអ្នកភូមិ និងស្ដាប់ពីទុក្ខកង្វល់របស់ពួកគេ៕