ប្រធានាធិបតីអាមេរិក លោក ដូណាល់ ត្រាំ បាននិយាយនៅថ្ងៃនេះថា លោកនឹងមានកិត្តិយស បើបានជួបមេដឹកនាំកូរ៉េខាងជើងលោក គីម ជុងអ៊ុន នៅក្រោមស្ថានភាពត្រឹមត្រូវ ដោយបានគំរាមប្រើកម្លាំងយោធាប្រឆាំងនឹងរបបនេះ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
ខណៈដែលក្រុងព្យុងយ៉ាងគំរាមកំហែងសាកល្បងនុយក្លេអ៊ែរលើកទី ៦ ដែលនឹងដុតបញ្ឆេះភាពតានតឹងបន្ថែមទៀតនៅលើឧបទ្វីបកូរ៉េនោះ លោក ត្រាំ ហាក់ស្នើឡើងនូវដំណោះស្រាយសម្រាប់ចាកចេញពីភាពទាល់ច្រក។
ប៉ុន្មានសប្ដាហ៍ថ្មីៗនេះ លោក ត្រាំ បានគំរាមកំហែង និងខឹងសម្បារនឹងរបបក្រុងព្យុងយ៉ាងយ៉ាងខ្លាំង ដោយបារម្ភថា កូរ៉េខាងជើងនៅសល់ពេលតែប៉ុន្មានខែទៀតប៉ុណ្ណោះ នឹងសម្រេចបានបច្ចេកវិទ្យានុយក្លេអ៊ែរ និងគ្រាប់មីស៊ីលអន្តរទ្វីប ដែលអាចបាញ់ដល់អាមេរិក។
ក្រឡាអ៊ុកសំខាន់របស់លោក ត្រាំ គឺត្រូវជំរុញចិនឲ្យប្រើប្រាស់ឥទ្ធិពលរបស់ខ្លួន ដើម្បីដាក់សម្ពាធលើក្រុងព្យុងយ៉ាង ជាយុទ្ធសាស្ត្រមួយដែលមិនបានទទួលជោគជ័យនោះឡើយកាលពីអតីតកាល៕