អ្នកនាំពាក្យក្រសួងយុត្តិធម៌ លោក គឹម សន្តិភាព បានព្រមានអំពីការប្រើប្រាស់ច្បាប់បោះឆ្នោត និងច្បាប់ព្រហ្មទណ្ឌ ប្រឆាំងនឹងបុគ្គលណាដែលប្រព្រឹត្តលើ្មសនឹងច្បាប់បោះឆ្នោតក្រុមប្រឹក្សាឃុំ-សង្កាត់ ខណៈដែលដំណើរការឃោសនាបោះឆ្នោតកំពុងចាប់ផ្ដើមនៅព្រឹកនេះ។
នៅលើទំព័រហ្វេសប៊ុកផ្លូវការរបស់លោក លោក គឹម សន្តិភាព បានរៀបរាប់ថា អំពើណាមួយដែលបានអនុវត្តផ្ទុយពីច្បាប់ស្ដីពីការបោះឆ្នោតក្រុមប្រឹក្សាឃុំ-សង្កាត់ នោះទោសប្បញ្ញត្តិដែលមានចែងក្នុងច្បាប់នេះ នឹងត្រូវអនុវត្ត ហើយអំពើនោះក៏នឹងត្រូវទទួលការផ្ដន្ទាទោសតាមច្បាប់ព្រហ្មទណ្ឌបន្ថែមទៀត ប្រសិនបើអំពើនោះជាបទល្មើសដែលមានចែងក្នុងច្បាប់ព្រហ្មទណ្ឌផងដែរ។
លោក គឹម សន្តិភាព មិនបានបញ្ជាក់ថា លោកព្រមានទៅដល់គណបក្សណាមួយនោះទេ ប៉ុន្តែ សារព្រមានរបស់លោក ធ្វើឡើងស្របពេលដែលការឃោសនាបោះឆ្នោតក្រុមប្រឹក្សាឃុំ-សង្កាត់ បានចាប់ផ្ដើមនៅព្រឹកថ្ងៃនេះ៕