ប្រទេសឥណ្ឌូនេស៊ី ម៉ាឡេស៊ី និងហ្វីលីពីន បានចាប់ផ្ដើមល្បាតដែនសមុទ្ររួមគ្នានៅក្នុងតំបន់របស់ពួកគេកាលពីថ្ងៃម្សិលមិញនេះ ខណៈដែលការគំរាមកំហែងពីក្រុមជ្រុលនិយមកំពុងកើនឡើង។ នេះដោយយោងតាមការផ្សាយរបស់សារព័ត៌មានសិង្ហបុរី Channel News Asia។
ការល្បាតដែនសមុទ្រដោយត្រីភាគីនេះ ត្រូវបានចាប់ផ្ដើមឡើងចំពេលដែលកំពុងមានការប្រយុទ្ធគ្នាបន្តទៀតរវាងកងទ័ពហ្វីលីពីន និងក្រុមឥស្លាមជ្រុលនិយមយកលំនាំតាមក្រុមរដ្ឋឥស្លាម ដែលបានដណ្ដើមកាន់កាប់ទីក្រុងម៉ារ៉ាវីមួយផ្នែក ស្ថិតនៅភាគកោះមិនដាណាវ ភាគខាងត្បូងប្រទេសហ្វីលីពីន។
អគ្គមេបញ្ជាការកងទ័ពឥណ្ឌូនេស៊ី លោក Gatot Nurmantyo បាននិយាយថា ការល្បាតរួមគ្នានេះ បានកើតឡើងក្នុងពេលត្រឹមត្រូវ ខណៈដែលប្រទេសរបស់លោកព្យាយាមបញ្ឈប់ពួកសកម្មប្រយុទ្ធណា ដែលរត់គេចខ្លួនពីទីក្រុងម៉ារ៉ាវី ចូលមកក្នុងទឹកដីឥណ្ឌូនេស៊ីនោះឡើយ។
ប្រទេសជិតខាងគ្នាទាំងបីនេះ បានឯកភាពគ្នាកាលពីខែឧសភាឆ្នាំ២០១៦ ថានឹងធ្វើការល្បាតរួមគ្នា និងចែករំលែកព័ត៌មានគ្នា ក្រោយពីមានការចាប់ជម្រិតជនបរទេសជាបន្តបន្ទាប់ពីសំណាក់ក្រុមអាប៊ូសាយយ៉ាស់ ដែលជាក្រុមឥស្លាមជ្រុលនិយមនៅភាគខាងត្បូងហ្វីលីពីន និងបានកាត់ក្បាលជនរងគ្រោះជាច្រើននាក់ក្រោយពីពួកគេមិនទទួលបានប្រាក់ដែលពួកគេទាមទារ៕