មន្ដ្រីអាជ្ញាធរជាតិអប្សរាឲ្យដឹងថា សភាបេតិកភណ្ឌវប្បធម៌នៃប្រទេសចិនហៅកាត់ថា CACH គ្រោងជួសជុលនិងកែលំអរប្រាសាទបេងមាលា ខណៈប្រទេសឥណ្ឌមានគម្រោងអភិរក្សវប្បធម៌អរូបបិយនៅតំបន់រមណីយដ្ឋានអង្គរ។
ការប្រកាសពីគម្រោងនេះ ធ្វើឡើងក្នុងកិច្ចប្រជុំគណៈកម្មាធិការសម្របសម្រួលអន្ដរជាតិសម្រាប់ការអភិវឌ្ឍនិងការពារបេតិកភណ្ឌហៅកាត់ថា ICC ដែលធ្វើឡើងរយៈពេលពីរថ្ងៃ នាមជ្ឍមណ្ឌលអាជ្ញាធរជាតិអប្សរា ក្នុងខេត្ដសៀមរាបចាប់ពីថ្ងៃទី២១ដល់ថ្ងៃទី២២ខែមិថុនានេះ។
ប្រធាននាយកដ្ឋានផ្សព្វផ្សាយនៃអាជ្ញាធរជាតិអប្សរា លោក ឡុង កុសល មានប្រសាសន៍ថា សភាបេតិកភណ្ឌវប្បធម៌នៃសាធារណៈរដ្ឋប្រជាមានិតចិន ហៅកាត់ថា CACH បានសហការជាមួយអាជ្ញាធរជាតិអប្សរា ដោយគ្រោងជួសជុល និងកែលំអរប្រាសាទបេងមាលា ដើម្បីអភិរក្សបេតិកភណ្ឌវប្បធម៌ឲ្យមានស្រស់ស្អាត។ លោកបន្ដថា ដោយឡែកប្រទេសឥណ្ឌា នឹងចូលរួមធ្វើសកម្មភាពសិក្សាស្រាវជ្រាវប្រមូលទិន្នន័យនូវវប្បធម៌សិល្បៈអរូបបិយនិងរូបបិយនៃប្រវត្តិសាស្ដ្ររមណីយដ្ឋានអង្គរ សម្រាប់ទុកជាឯកសារនៃការវិវត្ដនូវប្រាសាទបុរាណផងដែរ។ លោកបន្ដថា គម្រោងទាំងនេះ នឹងចាប់អនុវត្ដនាពេលឆាប់ៗខាងមុខនេះ។
លោកបន្ដថា៖ «ការចុះហត្ថលេខានៅថ្ងៃនេះ គឺដើម្បីបង្កើតនូវមូលដ្ឋានមួយ ប្រមូលព័ត៌មាន យើងសហការសិក្សាស្រាវជ្រាវយកព័ត៌មានទាំងអស់ អំពីការងារអភិរក្សអំពីការងារស្រាវជ្រាវបុរាណ វិទ្យាអំពីប្រវត្ដិសាស្ដ្រនៅកន្លែង ដើម្បីចងក្រងជាឯកសារហើយយើងអាចងាយស្រួលវាយតម្លៃថា តើការជួសជុល នឹងធ្វើឡើងតាមរបៀបណា។ នេះហើយជាគោលបំណងសំខាន់នៃកិច្ចសហប្រតិបត្ដិការរវាងទាំងពីរស្ថាប័ននេះ»។
បើតាមលោក ឡុង កុសល សភាបេតិកភណ្ឌនៃប្រទេសចិន ក៏បានជួសជុលប្រាសាទខ្លះទៀតក្នុងតំបន់អង្គរផងដែរ រួមមានប្រាសាទចៅសាយទេវតា និងប្រាសាទតាកែវជាដើម។ ចំណែកប្រទេសឥណ្ឌា ក៏បានជួសជុលប្រសាទតាព្រហ្មផងដែរ ប៉ុន្ដែសម្រាប់ការអភិរក្សនឹងចងក្រងនូវវប្បធម៌អរូបបិយនេះ ជាលើកដំបូង៕
