មន្ត្រីជាន់ខ្ពស់មួយរូបរបស់គណបក្សប្រជាជនកម្ពុជាទម្លាយថា គោលបំណងនៃការជំរុញឲ្យកែច្បាប់គណបក្សនយោបាយលើកទី២នេះ លោកថាដើម្បីទប់ស្កាត់កុំឲ្យមហាអំណាចនាំលោក សម រង្ស៊ី ចូលកម្ពុជាវិញ។
ក្នុងសន្និសីទសារព័ត៌មាន នាព្រឹកថ្ងៃទី៦ខែកក្កដានេះ ទាក់ទងសេចក្តីព្រាងច្បាប់ស្តីពីគណបក្សនយោបាយ ដែលលោក ហ៊ុន សែន បញ្ជាឲ្យកែជាលើកទី២នេះ អ្នកនាំពាក្យតំណាងរាស្ត្រគណបក្សប្រជាជន លោក ឈាង វុន ថ្លែងថា សេចក្តីព្រាងច្បាប់ដែលនឹងដាក់ឲ្យសភាអនុម័តនៅថ្ងៃចន្ទប្តាហ៍ក្រោយនោះ លោកថានឹងរារាំងមិនឲ្យដាក់តាំងរូប លោក សម រង្ស៊ី នៅទីសាធារណៈដូចមុនៗទៀតទេ ដោយថាលោក សម រង្ស៊ី ជាទណ្ឌិត។
លោក ឈាង វុន បន្តទៀតថា ច្បាប់នោះក៏នឹងទប់ស្កាត់មិនឲ្យមហាអំណាចណាមួយ ប្រើឥទ្ធិពល នាំលោក សម រង្ស៊ី ចូលកម្ពុជាវិញផងដែរ។
លោកថា៖ «នៅលើពិភពលោកយើងនេះ ប្រទេសមហាអំណាច តែងតែចង់បានប្រទេសតូចៗធ្វើជារណបរបស់ខ្លួន អាហ្នឹងធំណាស់ នៅក្នុងទស្សនរបស់យើង។ ហើយអ្នកនៅខាងក្រៅ [សម រង្ស៊ី]នេះគាត់គិតថាគាត់នឹងវិលមកវិញនៅថ្ងៃណាមួយតាមរយៈមហាអំណាចជួយគាត់មកៗ។ បើកាលណាជួយគាត់មក វាអាចធ្វើឲ្យប៉ះពាល់សង្គមជាតិរបស់កម្ពុជា ធ្វើឲ្យបែកបាក់សង្គមជាតិ របស់យើង។ មិនមែនតែប៉ុណ្ណឹងទេ គណបក្សប្រជាជនការពារច្បាប់ អនុវត្តនីតិរដ្ឋ យើម៉េចយើងម៉េចបណ្តោយឲ្យទណ្ឌិតមួយមកបានកើត។ ដឹងអញ្ចឹងទៅមានការប្រឈមគ្នាៗ មានការបែកបាក់ជាតិ ការពុះជាតិជាង២ ជា៣ ជា៤ ដែលអាចធ្វើឲ្យយើងមានគ្រោះថ្នាក់ថ្ងៃក្រោយ។នៅក្នុងចំនុចហ្នឹងដែលខ្ញុំចង់និយាយប្រាប់ ដើម្បីកុំឲ្យមហាអំណាចលូកដៃចូលក្នុងប្រទេសយើងបាន»។
ប៉ុន្តែអ្នកនាំពាក្យតំណាងរាស្ត្រគណបក្សសង្គ្រោះជាតិ លោក យ៉ែម បុញ្ញឫទ្ធ ថ្លែងជំទាស់ទៅនឹងគោលបំណងរបស់តំណាងរាស្ត្រគណបក្សប្រជាជនម្ពុជានេះ ដោយលោកថាបញ្ហាជាតិធំៗដែលត្រូវធ្វើ គឺគោលនយោបាយផ្សះផ្សាជាតិ ការប្រកួតប្រជែងគោលនយោបាយ ការប្រកួតប្រជែងការអភិវឌ្ឍជាតិ ដោះស្រាយបញ្ហាអយុត្តិធម៌សង្គម ចំណាកស្រុក និងរកទីផ្សារឲ្យកសិករជាដើម។
លោក យ៉ែម បុញ្ញឫទ្ធ ថ្លែងបែប ឌឺដងដូចនេះថា៖ «បើសិនជាទណ្ឌិតហ្នឹងគ្មានការគាំទ្រពីពលរដ្ឋ ចង់យកទៅតាំងកន្លែងណា ទៅបិទនៅកន្លែងណាក៏គ្មានណាចាប់អារម្មណ៍ ក៏គ្មាននណាយកចិត្តទុកដាក់ដែរ។ ដូច្នេះបើថាគណបក្សហ្នឹងចង់កេងចំណេញ ចង់បានសន្លឹកឆ្នោត ទុកឲ្យគណបក្សហ្នឹងរលាយដោយខ្លួនឯងតែម្តងទៅ ពីព្រោះរាស្ត្រជាអ្នកសម្រេច»។
អ្នកស្រាវជ្រាវពីការអភិវឌ្ឍសង្គមលោកបណ្ឌិត មាស នី លើកឡើងថា ការព្យាយាមធ្វើច្បាប់បែបនេះ អាចជាយុទ្ធសាស្ត្រយកប្រៀបលើដៃគូប្រកួត ដូចដែលគណបក្សនេះធ្លាប់យកប្រៀបលើគណបក្សហ្វ៊ុនស៊ិនប៉ិច ដោយធ្វើច្បាប់ឯកព័ន្ធភាព ប្រឆាំងនឹងសម្តេចក្រុមព្រះ។
ប៉ុន្តែលោក មាស នី រំឭកថា ល្បែងនយោបាយ ដែលអ្នកនយោបាយកំពុងលេងនេះ លោកថាមិនបានផ្តល់ប្រយោជន៍ ដល់ប្រទេសជាតិទេ។
យ៉ាងក៏ដោយលោក ឈាង វុន អះអាងថា គណបក្សប្រជាជនកម្ពុជា នឹងមិនប្រើប្រាស់ច្បាប់ថ្មីនេះ ទៅរំលាយគណបក្សសង្គ្រោះជាតិចោលដូចការលើកឡើង របស់មជ្ឈដ្ឋានមួយចំនួនទេ ដោយថា បើមេដឹកនាំគណបក្សនោះ មិនបំពានច្បាប់នេះ និងការពារថា បក្សកាន់អំណាចក៏ត្រូវការពង្រឹងយន្តការប្រជាធិបតេយ្យ តាមរយៈមានដៃគូប្រកួត ដែលមានកម្លាំងប្រហាក់ប្រហែលគ្នាដែរ៕
