សេចក្ដីរាយការណ៍បានឲ្យដឹងថា ថៃ និងភូមា បានឯកភាពបង្កើតគណៈកម្មាធិការការងាររួមគ្នាមួយ ដើម្បីដោះស្រាយបញ្ហាពលករ ដែលកើតចេញពីភាពច្របូកច្របល់ជុំវិញការអនុវត្តច្បាប់គ្រប់គ្រងពលករបរទេសរបស់ថៃ។
កាសែតបាងកក ប៉ុស្តិ៍ បានចុះផ្សាយថា រដ្ឋមន្ត្រីការងារថៃ លោក ស៊ិរិឆៃ ឌីស្តាគុល បានហោះហើរទៅកាន់ប្រទេសភូមាកាលពីថ្ងៃសុក្រកន្លងមកនេះ ដើម្បីជួបជាមួយរដ្ឋមន្ត្រីការងារភូមា លោក ថេន ស្វេ នៅទីក្រុងណៃពិដោរ ដើម្បីជជែកអំពីច្បាប់ពលករចំណាកស្រុកថ្មី។
បាងកក ប៉ុស្តិ៍បន្តថា ជំនួបនេះកើតឡើងក្រោយពីមានភាពច្របូកច្របល់អស់រយៈពេលមួយសប្ដាហ៍មកហើយ ដែលនាំរដ្ឋាភិបាលយោធាថៃបង្ខំចិត្តផ្អាកការអនុវត្តបទប្បញ្ញត្តិថ្មីដ៏តឹងរឹងក្នុងរយៈពេល ៦ខែ ក្រោយពីពលករចំណាកស្រុករាប់ម៉ឺននាក់ ភ័យខ្លាច និងចាកចេញពីប្រទេសថៃ។
អគ្គនាយកនៃអគ្គនាយកដ្ឋានជ្រើសរើសពលរថៃ លោក វ៉ារ៉ាណុន ភីធីវ៉ាន បានប្រាប់បាងកក ប៉ុស្តិ៍ថា ថៃបានស្នើទៅភូមាឲ្យពន្លឿនការបញ្ជាក់អត្តសញ្ញាណពលករ និងចេញប័ណ្ណសម្គាល់ពួកគេ ដែលមានតម្លៃស្មើនឹងលិខិតឆ្លងដែន សម្រាប់ពលករដែលគ្មាន ដើម្បីអាចឲ្យពួកគេធ្វើការដោយស្របច្បាប់នៅក្នុងប្រទេសថៃ។
ពលករអន្តោប្រវេសន៍ប្រហែល ៤លាននាក់ ត្រូវបានគេប៉ាន់ប្រមាណថា កំពុងធ្វើការនៅក្នុងប្រទេសថៃ ក្នុងពលករចន្លោះពី ១ ទៅ ២លាននាក់ ត្រូវបានគេជឿថា ពុំមានឯកសារស្របច្បាប់៕