លោក ហ៊ុន សែន ​ឲ្យមន្ត្រីនិងពលរដ្ឋទូងស្គរម៉ោង១០ព្រឹកនេះអបអរប្រាសាទសំបូរព្រៃគុក

តំបន់ប្រវត្តិសាស្ត្រប្រាសាទសំបូរព្រៃគុក (រូបភាព៖ Facebook)

លោកនាយករដ្ឋមន្ត្រី ហ៊ុន សែន បានណែនាំឲ្យមន្ត្រីនិងប្រជាពលរដ្ឋ​ទូទាំងប្រទេស ទូងស្គរ ទះប៉ោត និង គោះត្រដោក ធ្វើឲ្យមានសំឡេងព្រមគ្នានៅម៉ោង១០ព្រឹក ដើម្បីជាការអបអរសាទរ ប្រាសាទសំបូរព្រៃគុកបានដាក់បញ្ជូលជាសម្បត្តិបេតិកភ័ណ្ឌពិភពលោក។​

លិខិតរបស់លោកនាយករដ្ឋមន្ត្រីចេញផ្សាយកាលពីម្សិលមិញ បានលើកឡើងថា ដើម្បីអបអរព្រឹត្តិការណ៍ជាប្រវត្តិសាស្ត្រនេះ លោក​ណែនាំឲ្យមន្ត្រីគ្រប់ជាន់ថ្នាក់និងអំពាវនាវឲ្យប្រជាពលរដ្ឋគ្រប់ស្រទាប់វណ្ណៈ ចូលរួមទូងស្គរ វាយគង ទះបោត និងគោះត្រដោកធ្វើឲ្យមានសំឡេងម៉ោង​១០ព្រឹកនេះ។​

លោកនាយករដ្ឋមន្ត្រីក៏បានអំពាវនាវដល់ប្រព័ន្ធផ្សព្វផ្សាយឲ្យជួយផ្សព្វផ្សាយព្រឹត្តិការណ៍នេះឲ្យបានទូលំទូលាយផងដែរ។​

រមណីយដ្ឋាន​ប្រាសាទ​សំបូរ​ព្រៃ​គុក បាន​ក្លាយ​ជា​តំបន់​ប្រវត្តិសាស្ត្រ​ទី​៣​របស់​ប្រទេស​កម្ពុជា ដែល​ត្រូវ​បាន​ចុះ​ក្នុង​បញ្ជី​បេតិកភណ្ឌ​ពិភព​លោក បន្ទាប់​ពី​តំបន់​ប្រាសាទ​អង្គរត្រូវ​បាន​ដាក់​បញ្ចូល​នៅ​ឆ្នាំ​១៩៩២ និង​ប្រាសាទ​ព្រះវិហារ ត្រូវ​បាន​ដាក់​បញ្ចូល​នៅ​ឆ្នាំ​២០០៨។

រមណីយដ្ឋាន​ប្រាសាទ​សំបូរ​ព្រៃគុក ដែល​ស្ថិត​នៅ​ក្នុង​ស្រុក​ប្រាសាទ​សំបូរ ខេត្ត​កំពង់ធំ ភាគ​កណ្ដាល​ប្រទេស​កម្ពុជា និង​មាន​ចម្ងាយ​ជាង ២០០​គីឡូម៉ែត្រ​ពី​រាជ​ធានី​ភ្នំពេញ គឺ​ជា​អតីត​រាជ​ធានី​ឦសានបុរៈ​របស់​ប្រទេស​​កម្ពុជា​​នៅមុន​សម័យ​អង្គរ នៅ​ចន្លោះ​សតវត្សរ៍​ទី​៦ ដល់​សតវត្សរ៍​ទី៩៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ