លោក ហ៊ុន សែន បង្កើតគណៈកម្មការអបអរការបញ្ចូលប្រាសាទសំបូរព្រៃគុកជាបេតិកភណ្ឌពិភពលោក

តំបន់ប្រវត្តិសាស្ត្រប្រាសាទសំបូរព្រៃគុហ៍ (រូបភាព៖ Facebook)

លោកនាយករដ្ឋមន្ត្រី ហ៊ុន សែន បានសម្រេចបង្កើតគណៈកម្មការអន្តរក្រសួងមួយ ដើម្បីរៀបចំពិធីអបអរសាទរការបញ្ចូលតំបន់ប្រាសាទសំបូរព្រៃគុក ក្នុងបញ្ជីបេតិកភណ្ឌពិភពលោកកាលពីថ្ងៃទី៨ខែកក្កដានេះ។

នៅក្នុងសេចក្ដីសម្រេចចុះថ្ងៃទី១២ ខែកក្កដា ឆ្នាំ២០១៧ឲ្យដឹងថា គណៈកម្មការអន្តរក្រសួងនេះ មានតួនាទីដឹកនាំ និងសម្របសម្រួលរាល់ដំណើរការការងារទាំងអស់ ដូចជា រៀបចំខ្លឹមសារ ឯកសារ លិខិតបទដ្ឋានរដ្ឋាបាល បដាពាក្យស្លោក និងបោះពុម្ពអាវសម្រាប់កម្មវិធី រៀបចំគម្រោងចំណាយនៃដំណើរការរៀបចំពិធី រៀបចំទម្រង់សិល្បៈទស្សនីយភាពនិងការសម្ដែងនានាក្នុងព្រឹត្តិការណ៍ រៀបចំការពារសន្តិសុខសណ្ដាប់ធ្នាប់សាធារណៈនិងសង្គ្រោះបន្ទាន់ជាដើម។

បើតាមសេចក្ដីសម្រេចឲ្យដឹងថា​ គណៈកម្មការអន្តរក្រសួងដែលទទួលបន្ទុកនោះ មានរដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី រដ្ឋមន្ត្រីក្រសួងមហាផ្ទៃ រដ្ឋមន្ត្រីក្រសួងការពារ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ រដ្ឋមន្ត្រីក្រសួងវប្បធម៌និងវិចិត្រសិល្បៈ រដ្ឋមន្ត្រីក្រសួងទេសចរណ៍ រដ្ឋមន្ត្រីក្រសួងសុខាភិបាល រដ្ឋមន្ត្រីក្រសួងបរិស្ថាន រដ្ឋមន្ត្រីក្រសួងអប់រំ យុវជន និងកីឡា រដ្ឋលេខាធិកាគ្រប់គ្រងក្រសួង និងប្រធានគ្រប់ស្ថាប័នពាក់ព័ន្ធទាំងអស់។ នៅក្នុងសេចក្ដីសម្រេចឲ្យដឹងថា ការបង្កើតគណៈកម្មការអន្តរក្រសួងនេះ យោងតាមការចាំបាច់។

រមណីយដ្ឋាន​ប្រាសាទ​សំបូរ​ព្រៃ​គុក បាន​ក្លាយ​ជា​តំបន់​ប្រវត្តិសាស្ត្រ​ទី​៣​របស់​ប្រទេស​កម្ពុជា ដែល​ត្រូវ​បាន​ចុះ​ក្នុង​បញ្ជី​បេតិកភណ្ឌ​ពិភព​លោក បន្ទាប់​ពី​តំបន់​ប្រាសាទ​អង្គរវត្តត្រូវ​បាន​ដាក់​បញ្ចូល​នៅ​ឆ្នាំ​១៩៩២ និង​ប្រាសាទ​ព្រះវិហារ ត្រូវ​បាន​ដាក់​បញ្ចូល​នៅ​ឆ្នាំ​២០០៨។

រមណីយដ្ឋាន​ប្រាសាទ​សំបូរ​ព្រៃគុក ដែល​ស្ថិត​នៅ​ក្នុង​ស្រុក​ប្រាសាទ​សំបូរ ខេត្ត​កំពង់ធំ ភាគ​កណ្ដាល​ប្រទេស​កម្ពុជា និង​មាន​ចម្ងាយ​ជាង ២០០​គីឡូម៉ែត្រ​ពី​រាជ​ធានី​ភ្នំពេញ គឺ​ជា​អតីត​រាជ​ធានី​ឦសានបុរៈ​របស់​ប្រទេស​​កម្ពុជា​​នៅមុន​សម័យ​អង្គរ នៅ​ចន្លោះ​សតវត្សរ៍​ទី​៦ ដល់​សតវត្សរ៍​ទី៩៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ