សមត្ថកិច្ចរបស់អាមេរិកកាលពីថ្ងៃអាទិត្យម្សិលមិញ រកឃើញជនអន្តោប្រវេសន៍ ៩នាក់បានស្លាប់ នៅក្នុងរថយន្តសន្តោងមួយនៅចំណត Walmart ក្នុងរដ្ឋតិចសាស ចំណែក៣០នាក់ផ្សេងទៀត មានបញ្ហាសុខភាពត្រូវបញ្ជូនទៅសង្គ្រោះនៅមន្ទីរពេទ្យ។
សមត្ថកិច្ចអាមេរិកចាត់ទុកថានោះជាបទឧក្រិដ្ឋ ការរំលោភសិទ្ធិមនុស្សធ្ងន់ធ្ងរក្នុងការជួញដូរមនុស្សឆ្លងដែន។ សមត្ថកិច្ចថា រថយន្តនោះបានចំណាយពេលជាច្រើនម៉ោងក្នុងការបើកបរចេញពីព្រំដែនជាមួយប្រទេសម៉ិចស៊ិក ហើយបានបណ្តាលឲ្យជនភៀសខ្លួនទាំងនោះរបួស ដាច់សរសៃឈាម និង មានជំងឺខ្វះជាតិទឹកធ្ងន់ធ្ងរ។
សេចក្តីប្រកាសព័ត៌មានរបស់រដ្ឋអាជ្ញានៃរដ្ឋសហព័ន្ធបានឲ្យដឹងថា នៅក្នុងរថយន្តសន្តោងដែលមានគ្នា៣៩នាក់នោះ ក៏មាន២នាក់ជាកុមារស្ថិតនៅក្នុងអាយុរៀននៅសាលា។
ទោះយ៉ាងណាសមត្ថកិច្ចនៅមិនទាន់ចាត់ទុកពួកគេជាជនអន្តរប្រវេសន៍ទាំងអស់គ្នានោះទេ ដោយសង្ស័យថា អ្នកខ្លះរត់គេចក្នុងគោលបំណងផ្សេងៗទៀត៕