លោកនាយករដ្ឋមន្ត្រី បញ្ជាឲ្យក្រសួងពីរទទួលខុសត្រូវ លើការចំណាយទាំងអស់ដល់ដំណើរការមន្ទីរពេទ្យគន្ធបុប្ផា ដោយថាបើទោះបីប្រទេសស្វីសឈប់ផ្តល់ជំនួយក៏ដោយ។
មន្ទីរពេទ្យគន្ធបុប្ផា បានដំណើរការច្រើនឆ្នាំមកហើយនៅកម្ពុជា ដោយមន្ទីរពេទ្យនេះផ្តល់សេវាព្យាបាលឥតគិតថ្លៃ ជួយសង្គ្រោះកុមារកម្ពុជារាប់ម៉ឺនាក់ក្នុង១ឆ្នាំៗ។ បើតាមរបាយការណ៍នានា ថវិកាសម្រាប់ដំណើរការ របស់មន្ទីរពេទ្យ មួយភាគធំ ប្រទេសស្វីសជាអ្នកឧបត្ថម្ភ។
ក្នុងពិធីសម្ពោធដាក់ឲ្យប្រើប្រាស់ជាផ្លូវការ «ក្របខ័ណ្ឌគោលនយោបាយជាតិគាំពារសង្គម ឆ្នាំ២០១៦-២០២៥ » នាថ្ងៃទី២៤ខែកក្កដានេះ លោក ហ៊ុន សែន រំឭកថា កន្លងទៅលោកធ្លាប់និយាយជាមួយមេដឹកនាំប្រទេសស្វីសថា កម្ពុជាពេលនេះមានលទ្ធភាព ធានាដល់ដំណើរការ របស់មន្ទីរពេទ្យគន្ធបុប្ផាបាន ទោះបីម្ចាស់ជំនួយ សម្រេចដកខ្លួនចេញក៏ដោយ។
លោកថា៖ «ជួបជាមួយនឹងប្រធានាធិបតីស្វីសកាលពីដើមឆ្នាំនេះ ខ្ញុំក៏បានលើកឡើងទៅលើការទទួលខុសត្រូវរបស់យើង។ ដូច្នេះរវាងក្រសួងសេដ្ឋកិច្ចនិងហិរញ្ញវត្ថុ និងក្រសួងសុខាភិបាល ត្រូវតែធានាថា មន្ទីរពេទ្យ[គន្ធបុប្ផា]មួយនេះ បើទោះបីអត់ជំនួយពីស្វីស អត់ជំនួយពីខាងផ្នែកដៃគូ យើងនៅតែធានាថា មន្ទីរពេទ្យនេះ នៅតែធានានូវសេវាធម្មតា [ព្យាបាលឥតគិតថ្លៃ] ដូចពេលនេះ។ យើងមានលទ្ធភាពធ្វើកិច្ចការងារនេះ ដែលជួយយ៉ាងច្រើនទៅដល់កុមារ»។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍនិងសន្តិភាព លោក យង់ គិមអេង បានស្វាគមន៍ចំពោះការប្តេជ្ញាចិត្ត របស់រដ្ឋាភិបាលនេះ។ ប៉ុន្តែលោកជំរុញឲ្យរដ្ឋាភិបាល ត្រូវបង្កើតយន្តការ តាមដានសកម្មភាព បន្ថែមទៀត ក្រោយពីអ្នកគ្រប់គ្រងជាជនបរទេសដកខ្លួនចេញ នោះលោកថាទើបអាចធានាគុណភាពនៃការផ្តល់សេវា។
លោកថា៖ «ការផ្ទេរពីអ្នកផ្តល់ជំនួយ[បរទេស]មករដ្ឋនេះ កន្លងមកយើងឃើញថាគុណភាពមិនសូវជាមាន ដូចជាមន្ទីរពេទ្យ គាំពារមាតា និងទារក ដែលយើងហៅថាពេទ្យជប៉ុនហ្នឹង។ កាលពីជប៉ុនគេនៅជួយនៅអីហ្នឹង ឃើញថាមន្ទីរពេទ្យហ្នឹង ដើរល្អ[គុណភាពសេវាល្អ]មែនទែនបាទ។ ដល់ពេលជប៉ុនឈប់ជួយទៅ រៀងទ្រេតទ្រោតបន្តិច [គុណភាពសេវាធ្លាក់ចុះ]។ ប៉ុន្តែចំពោះ គន្ធបុប្ផានេះ យើងអត់ចង់ឃើញអញ្ចឹងទេ យើងចង់ឃើញ រក្សានូវល្បឿនសេវា រក្សានូវប្រសិទ្ធភាពហ្នឹង ឲ្យវាកាន់តែខ្លាំងជាងមុន»។
អ្នកស្រាវពីការអភិវឌ្ឍសង្គម លោកបណ្ឌិត មាស នី លើកឡើងថា ជាការល្អមួយដែលរដ្ឋាភិបាលប្រកាសទទួលខុសត្រូវ ធានាដល់និរន្តភាពនៃមន្ទីរពេទ្យផ្តល់សេវាឥតគិតថ្ងៃដល់ពលរដ្ឋក្រីក្រនេះ។ ប៉ុន្តែលោកថា រដ្ឋាភិបាលគួរបង្កើតឲ្យមានមន្ទីរពេទ្យល្អដូចនេះច្រើនទៀត ដើម្បីកុំឲ្យពលរដ្ឋច្រើនខេត្តសម្រុកមករកកន្លែងព្យាបាលតែមួយ។
លោកថា៖ «ខ្ញុំចង់ឃើញមន្ទីរពេទ្យបែបហ្នឹង បង្កើតបាន យ៉ាងតិចពីរ ឬបីកន្លែងបន្ថែមទៀត នៅទូទាំងប្រទេសខ្មែរដើម្បីងាយស្រួលនិងសម្រួលដល់មាតាបីតាកុមារដែលធ្វើដំណើរពីឆ្ងាយ ទៅដល់មន្ទីរពេទ្យហ្នឹង»។
បើតាមលោក មាស នី មន្ទីរពេទ្យគន្ធបុប្ផាបានបង្កើតឡើងជិត៣០ឆ្នាំមកហើយ ជួយសង្គ្រោះកុមារក្រីក្រ ដោយឥតយកថ្លៃ បានរាប់លាននាក់។
ប្រធានមន្ទីរពេទ្យគន្ធបុប្ផា ជាជនជាតិស្វីស លោក បេអ៊ាត រិចណ័រ បានលាឈប់ពីតំណែងក្រោមហេតុផលលោកមានជំងឺ។មុនពេលលាឈប់លោកធ្លាប់បង្ហាញការព្រួយបារម្ភថា មន្ទីរពេទ្យនេះ អាចនឹងធ្លាក់ចុះសេវាជួយសង្គ្រោះដល់កុមារកម្ពុជា នៅពេលដែលម្ចាស់ជំនួយនៅប្រទេសស្វីស បានកាត់បន្ថយប្រាក់ឧត្តមជាបន្តបន្ទាប់៕
