លោកនាយករដ្ឋមន្ត្រី ហ៊ុន សែន គ្រោងនឹងចុះជួបកម្មករតាមរោងចក្រជាលើកដំបូង ដើម្បីស្វែងយល់ពីស្ថានភាព និងចាត់វិធានការបន្ថែម លើករណីសុវត្ថិភាពការងាររបស់កម្មករ។
នៅលើគណនីយហ្វេសប៊ុកនៅថ្ងៃទី៤ សីហា អ្នកនាំពាក្យរដ្ឋាភិបាល លោក ផៃ ស៊ីផាន សរសេរថា លោក ហ៊ុន សែន មានគម្រោងចុះជួបកម្មករនៅតាមរោងចក្រ ទៅតាមលទ្ធភាពដែលអាចធ្វើបាន ពោលគឺអាចនៅរៀងរាល់ថ្ងៃអាទិត្យ បន្ទាប់ពីលោកនឹងជួបកម្មករ កម្មការនី នៅកោះពេជ្រ នាថ្ងៃទី២០ខែសីហា ខាងមុខ។
បើតាមលោក ផៃ ស៊ីផាន គម្រោងជួបក្រុមកម្មករតាមរោងចក្រនេះ គឺជួយពង្រឹងភាពស្និទ្ធស្នាលរវាងលោក ហ៊ុន សែន ជាមួយកម្មករ និងដើម្បីបង្ហាញការយកចិត្តទុកដាក់ខ្ពស់ដល់កម្មករ-កម្មការិនី៕
ប្រធានសហភាពការងារកម្ពុជា លោក អាត់ ធន់ មានប្រសាសន៍ថា បើសិនជាការចុះជួប សំណេះសំណាលរបស់លោក ហ៊ុន សែន លើកនេះ គឺដើម្បីជាការជួយដោះស្រាយបញ្ហាដល់ក្រុមកម្មករ និងបង្ហាញពីការយកចិត្តទុកដាក់ពិតមែន នោះគឺជាការល្អ។ ទោះជាយ៉ាងណាលោកថា កន្លងមក ការចាត់វិធានការរបស់រដ្ឋាភិបាល ដើម្បីដោះស្រាយបញ្ហាដែលកម្មករជួបប្រទះ គឺនៅខ្សោយនៅឡើយ។
លោកថា៖ «បញ្ហារបស់កម្មករមានដូចជា គឺគាត់មានប្រាក់ខែតិច គាត់ហូបចុកមិនគ្រប់គ្រាន់ គាត់ធ្វើការច្រើនម៉ោង ធ្វើការក្នុងសកម្មភាពអាក្រក់ មានសន្លប់ គាត់ស្លេកស្លាំង ចុះខ្សោយ… មានមន្ត្រីខាងគណបក្សនយោបាយទៅធ្វើបាបគាត់ បំបិទសិទ្ធិសេរីភាពគាត់ មានថៅកែខ្លះបង្ខំឲ្យធ្វើការលើសកម្លាំង…ទាំងអស់ហ្នឹងហើយ ដែលធ្វើឲ្យបញ្ហាមិនអាចដោះស្រាយឲ្យកម្មករ ឲ្យក្រុមហ៊ុនជិះជាន់កេងប្រវ័ញ្ចកម្មករបាននោះ»។
របាយការណ៍ចុងក្រោយនៃបេឡាជាតិរបបសន្តិសុខសង្គម បង្ហាញថា កម្មករដែលធ្វើការក្នុងវិស័យកាត់ដេរសព្វថ្ងៃមានចំនួន៨០ម៉ឺននាក់ នៅក្នុងក្រុមហ៊ុនរោងចក្រកាត់ដេរចំនួនជាង ១ ០០០៕