ក្រសួងសង្គមកិច្ច បានការពារការថ្លែងរបស់រដ្ឋមន្ត្រី ដែលព្រមានវាយក្បាល អ្នកប្រឆាំងលទ្ធផលបោះឆ្នោតឆ្នាំ២០១៨ នឹងគល់ឬស្សី ថាការថ្លែងរបស់លោករដ្ឋមន្រ្តីនេះ គឺជាការដាស់តឿន និងជំរុញដល់ការធានាសន្តិសុខ សម្រាប់ការបោះឆ្នោត។
កាលពីសប្តាហ៍មុន ក្នុងកិច្ចប្រជុំមួយរបស់ក្រសួងសង្គមកិច្ច លោករដ្ឋមន្ត្រី វង សូត បានថ្លែងដោយព្រមានប្រើ «គល់ឬស្សីវាយក្បាល» អ្នកណា ដែលហ៊ានចេញមកតវ៉ាទៅនឹងលទ្ធផលបោះឆ្នោតឆ្នាំ២០១៨ខាងមុខ។ កាថ្លែងរបស់លោកបែបនេះ បានធ្វើឲ្យមានប្រតិកម្មជាបន្តបន្ទាប់ពីមជ្ឍដ្ឋានជាតិ និងអន្តរជាតិ។
ក្នុងសេចក្តីប្រកាសព័ត៌មានចុះថ្ងៃទី៣ខែសីហា ក្រសួងសង្គមកិច្ច អតីតយុទ្ធជន និងយុវនីតិសម្បទា បានច្រានចោលនិងថ្កោលទោស ចំពោះប្រតិកម្មរបស់នាយករងប្រចាំអាស៊ី នៃអង្គការឃ្លាំមើលសិទ្ធិមនុស្សអន្តរជាតិ លោក ភីល រ៉ូបឺតសុន ដែលថាការថ្លែងរបស់លោក វង សូត ជាសារដែលឃោឃៅ និងមិនដឹងអ្វីទាំងអស់អំពីសិទ្ធិមនុស្ស។ ក្រសួងបន្តថា ការបញ្ចេញទស្សនៈរបស់លោក ភីល រ៉ូបឺតសុន នេះជាការញុះញង់ បង្កអសន្តិសុខ អស្ថិរភាពសង្គម និងជ្រែតជ្រែកកិច្ចការផ្ទៃក្នុងរបស់កម្ពុជា។
ក្រសួងបានបញ្ជាក់ថា ការថ្លែងរបស់លោក វង សូត នេះមិនមែនជាការគំរាមកំហែងទេ គ្រាន់តែជាការដាស់តឿន ក្រើនរំលឹក ដល់អ្នកដែលជ្រុលនិយម និងជាការជម្រុញដល់ការធានាសន្តិសុខ សុវត្ថិភាព សម្រាប់ការបោះឆ្នោត នៅកម្ពុជានាពេលខាងមុខ។
អ្នកនយោបាយជើងចាស់លោក លី ឡាយស្រេង យល់ថាការបកស្រាយរបស់ក្រសួងសង្គមកិច្ចនេះគឺគ្រាន់តែជាការឆ្លើយដោះខ្លួន បន្ទាប់ពីលោក ហ៊ុន សែន ថាលោកមិនបាននិយាយពីការប្រើគល់ឬស្សីដើម្បីបង្ក្រាបការតវ៉ានោះទេ។ លោកថា ការថ្លែងរបស់មន្ត្រីក្រោមឱវាទរបស់លោក ហ៊ុន សែន គឺកាន់តែបន្ថែមកំហុសដល់លោក ហ៊ុន សែន។
លោកមានប្រសាសន៍ថា៖ «ទេ! រក្សាសន្តិសុខ ឯងសង្គមកិច្ចរក្សាខ្មោចយកអី។ ទុកឲ្យនាយករដ្ឋមន្ត្រី ហ៊ុន សែន គាត់ធ្វើទៅ បានហើយ ចាំបាច់ អាមីអាថោង សុទ្ធតែគល់ឬស្សីធ្វើអី! រដ្ឋមន្ត្រីបែបហ្នឹង គួរតែចេញពីដំណែង កុំទុក យង់ឃ្នងសំបើមណាស់!»។
ចំពោះអ្នកស្រាវជ្រាវពីការអភិវឌ្ឍសង្គមលោក ប៊ូ បញ្ញា មានប្រសាសន៍ថា ការបកស្រាយរបស់ក្រសួងសង្គមកិច្ចនេះ គឺមិនអាចទទួលយកបាននោះទេ ដោយថា ការនិយាយនេះ ជាការនិយាយរបស់បុគ្គលសាធារណៈ ដែលគ្មានការទទួលខុសត្រូវ និងធ្វើឡើងតាមអារម្មណ៍ ហើយការបកស្រាយនេះ គឺគ្រាន់តែធ្វើតាមពីក្រោយប្រតិកម្មនានារបស់មជ្ឈដ្ឋានសង្គម។
លោកថា៖ «ការបកស្រាយនេះ គឺគ្រាន់តែជាលេសទេ គ្មានហេតុផលណាមួយសមរម្យ ដែលអាចទទួលយកបាន។ ខ្ញុំគិតថា លើកក្រោយគួរតែរដ្ឋមន្ត្រី គាត់គិតគូរឡើងវិញ មិនមែនត្រឹមតែរដ្ឋមន្ត្រីសង្គមកិច្ចទេ រដ្ឋមន្ត្រីផ្សេងៗ ក្នុងនាមខ្លួនជាមន្ត្រីរដ្ឋាភិបាល ក្នុងនាមជាអ្នកបម្រើរាស្ត្រ មុននឹងនិយាយអ្វីត្រូវគិតពិចារណាឲ្យបានល្អិតល្អន់»។
ចំណោះ អ្នកវិភាគនយោបាយ លោក ឆាំ ប៊ុនថេត មានប្រសាសន៍ថា ការបកស្រាយនេះ គឺមិនសមស្របនោះទេ ដោយថា ក្នុងនាមជាអ្នកដឹកនាំ មិនគួរប្រើប្រាស់ពាក្យសំដី ដែលធ្វើឲ្យប្រជាជនមានបញ្ហាប្រឈមនឹងគ្នានោះទេ។
លោកថា៖ «ភាសាអញ្ចឹងៗ វាទៅជាធម្មជាតិរបស់អ្នកនយោបាយខ្មែរ រឿងគំរាមកំហែងគ្នា រឿងលាបពណ៌គ្នា ពាក្យទាំងអស់ សុទ្ធតែពាក្យអសុរស ខ្ញុំគិតថា យើងគួរតែសរសេរឲ្យបានច្រើនបន្តិច។ ហើយកុំសរសេរតែគណបក្សកាន់អំណាច គណបក្សប្រឆាំងក៏ប្រើពាក្យអាក្រក់ច្រើនដែរ។ ដូចលោក សម រង្ស៊ី ប្រើពាក្យអាយ៉ងយួន អាយ៉ងសៀម ពាក្យហ្នឹងឃោឃៅណាស់ព្រៃផ្សៃដូចគ្នា ប្រហាក់ប្រហែលទៅហ្នឹងអ្វីដែលលោក វង សូត និយាយហ្នឹង មិនមែនជាភាសាមនុស្ស មានការរៀនសូត្រចេះដឹងត្រឹមត្រូវគេសរសេរនោះណា»។
ទោះជាយ៉ាងណា លោកថា ការប្រើពាក្យសំដីហិង្សានិងលាបព័ណ៌នេះ បានធ្វើឲ្យប្រទេសកម្ពុជា ដែលធ្លាប់ជាប្រទេសមហានគរ ធ្លាក់មកនៅស្ថានភាពដូចសព្វថ្ងៃ។ ដូចនេះ លោក ប៊ុនថេត បានឲ្យជាយោបល់ថា ក្នុងនាមជាអ្នកដឹកនាំ គួរតែគិតប្រយោជន៍ជាតិ និងប្រជាជនជាធំ និងមិនគួរធ្វើឲ្យប្រជាជាតិមួយបែកជាពីរ ដោយសារការគាំទ្រទៅលើសំដីរបស់អ្នកនយោបាយម្ខាងៗ៕