នៅក្នុងរយៈពេលប៉ុន្មានសប្ដាហ៍ចុងក្រោយនេះ ក្រុមអ្នកប្រើប្រាស់បណ្ដាញសង្គមហ្វេសប៊ុកមួយចំនួន ត្រូវបានសមត្ថកិច្ចកម្ពុជាចាប់ខ្លួនជាបន្តបន្ទាប់ ពាក់ព័ន្ធទៅនឹងការបង្ហោះព័ត៌មាននានា នៅលើគណនីហ្វេសប៊ុករបស់ពួកគេ។
យុវជនម្នាក់ និងយុវតីម្នាក់ទៀត ត្រូវបានសមត្ថកិច្ចខេត្តសៀមរាបចាប់ខ្លួន កាលពីល្ងាចថ្ងៃទី២២ ខែកក្កដាកន្លងមកនេះ បន្ទាប់ពីពួកគេបានបង្ហោះព័ត៌មាននៅលើបណ្ដាញសង្គមហ្វេសប៊ុកថា មានយន្តហោះមួយគ្រឿងធ្លាក់នៅក្នុងខេត្តនេះ ប៉ុន្តែ ជាក់ស្ដែង ពុំមានករណីធ្លាក់យន្តហោះកើតឡើងនោះឡើយ។
ករណីថ្មីបំផុតនោះ គឺការចាប់ខ្លួនអ្នកប្រើប្រាស់ហ្វេសប៊ុកនៅឯស្រុកបារាយណ៍ ខេត្តកំពង់ធំ បន្ទាប់ពីបុរម្នាក់នោះបង្ហោះព័ត៌មានថា ជនសង្ស័យពីរនាក់ត្រូវបានពលរដ្ឋព្រួតវាយដុំនៅក្នុងស្រុកបារាយណ៍ ដោយចោទថា ជាជនជាតិវៀតណាមដើរចាប់ក្មេងវះយកក្រលៀន។ សមត្ថកិច្ចបានចាត់ទុកការបង្ហោះព័ត៌មាននេះថា ជាការបំពុលសង្គម និងបំភ្លៃព័ត៌មាន។
ការចាប់ខ្លួនអ្នកប្រើប្រាស់ហ្វេសប៊ុកពាក់ព័ន្ធនឹងការបង្ហោះសារនានា មិនមែនមានតែពីរករណីនេះទេ។ ព្រះសង្ឃមួយអង្គនៅឯខេត្តបាត់ដំបង ដែលសកម្មនឹងការរិះគន់រដ្ឋាភិបាលផងនោះ ត្រូវបាននគរបាលចាប់ខ្លួន បន្ទាប់ពីសង្ឃអង្គនោះបង្ហោះរូបថតជាមួយកាំភ្លើងជ័រ។ ស្ត្រីម្នាក់ដែល Live វីដេអូពីកន្លែងបុណ្យខួប ១ឆ្នាំសពលោក កែម ឡី និងយុវជនម្នាក់នៅខេត្តព្រះសីហនុ ត្រូវបានសមត្ថកិច្ចចាប់ខ្លួនជាបន្តបន្ទាប់ ដោយសមត្ថកិច្ចថា អ្នកទាំងពីរបានចោទប្រកាន់ ប្រមាថ និងគំរាមកំហែងលើលោកនាយករដ្ឋមន្ត្រី ហ៊ុន សែន។ ទាំងនេះគ្រាន់តែជាឧទាហរណ៍មួយចំនួននៃការចាប់ខ្លួនអ្នកប្រើប្រាស់ហ្វេសប៊ុក ពាក់ព័ន្ធនឹងការបង្ហោះពាក្យសម្តី រូបថត និងវីដេអូផ្សេងៗនៅក្នុងរយៈពេលប៉ុន្មានសប្ដាហ៍កន្លងមកនេះប៉ុណ្ណោះ។
បន្ទាប់ពីអ្នកប្រើប្រាស់ហ្វេសប៊ុកមួយចំនួន ត្រូវបានចាប់ខ្លួនរួចមក វាបានជំរុញឲ្យមានការចោទសួរថា តើអ្នកប្រើប្រាស់ហ្វេសប៊ុកគួរតែបង្ហោះព័ត៌មាន រូបថត និងវីដេអូបែបណាដើម្បីធានាថា ពួកគេនឹងជៀសផុតពីហានិភ័យសម្រាប់ខ្លួនឯង?
មុននឹងយើងឈានទៅជជែកវែកអំពីហានិភ័យកើតចេញពីការបង្ហោះព័ត៌មាន រូបថត និងវីដេអូនៅលើហ្វេសប៊ុកនោះ ជាដំបូងខ្ញុំសូមទាញចំណាប់អារម្មណ៍លោកអ្នកឲ្យបានយល់ដឹងអំពីវិសាលភាពនៃបណ្ដាញសង្គមហ្វេសប៊ុកនៅក្នុងប្រទេសកម្ពុជានាពេលចុងក្រោយនេះ។
ការពិតទៅ ពលរដ្ឋកម្ពុជាអាចចូលទៅប្រើប្រាស់បណ្ដាញសង្គមជាច្រើនលើសពីហ្វេសប៊ុក ដូចជា បណ្ដាញសង្គម Twitter, Line, LinkedIn ប្រព័ន្ធកម្សាន្តសម្បូរបែបនៅក្នុង YouTube ជាដើម។ ទោះបីជាយ៉ាងនេះក៏ដោយ បណ្ដាញសង្គមហ្វេសប៊ុក ត្រូវបានពលរដ្ឋកម្ពុជាប្រើប្រាស់ច្រើនជាងគេ។
របាយការណ៍ស្ដីពីនិន្នាការបណ្ដាញសង្គមឌីជីថលកម្ពុជាចេញនៅនៅឆ្នាំ២០១៧នេះ បានបង្ហាញថា ពលរដ្ឋកម្ពុជាជាង ៧លាននាក់ ឬស្មើនឹង ៤៥ភាគរយនៃពលរដ្ឋកម្ពុជាសរុប សុទ្ធតែអាចប្រើប្រាស់អ៊ីនថឹណិតបាន ក្នុងនោះពលរដ្ឋខ្មែរជិត ៥លាននាក់ គឺជាអ្នកប្រើប្រាស់បណ្ដាញសង្គមជាប់លាប់ ដោយភាគច្រើនបំផុតប្រើប្រាស់បណ្ដាញសង្គមតាមរយៈទូរស័ព្ទដៃ។ អ្នកប្រើប្រាស់បណ្ដាញសង្គមហ្វេសប៊ុកភាគច្រើន ជាប្រជាជនមានអាយុចន្លោះពី ១៨ ដល់ ៣៤ឆ្នាំ ដែលមានចំនួនប្រហែល ៣លាន ៦សែននាក់។
ខណៈដែលបណ្ដាញសង្គមហ្វេសប៊ុកត្រូវបានប្រើប្រាស់យ៉ាងទូលំទូលាយនៅក្នុងប្រទេសកម្ពុជា ប្រធានប្រតិបត្តិក្រុមហ៊ុន CodingGate លោក សុខ សុភមង្គល ទទួលស្គាល់ពីគុណសម្បត្តិនៃបណ្ដាញសង្គមនេះ។ សហគ្រិនផ្នែកខាងបច្ចេកវិទ្យាព័ត៌មានវិទ្យារូបនេះ ប្រាប់ថា បណ្ដាញសង្គមហ្វេសប៊ុក ត្រូវបានប្រើប្រាស់សម្រាប់ទំនាក់ទំនងជាមួយសាច់ញាតិ មិត្តភក្តិ និងមនុស្សនៅជុំវិញពិភពលោក ខណៈដែលវាក៏ត្រូវបានប្រើសម្រាប់ចែករំលែក និងផ្សព្វផ្សាយសកម្មភាពសង្គម សកម្មភាពជំនួញ និងគំនិតល្អៗជាច្រើន។
បើទោះបីជាបណ្ដាញសង្គមហ្វេសប៊ុកផ្ដល់អត្ថប្រយោជន៍ដល់អ្នកប្រើប្រាស់វាក៏ដោយ ប៉ុន្តែ វាអាចបង្កជាទុក្ខទោសដល់អ្នកប្រើប្រាស់ផងដែរ ជាពិសេស អ្នកប្រើប្រាស់បណ្ដាញសង្គមហ្វេសប៊ុកដែលមានចំណេះដឹងកម្រិតទាប។ ហានិភ័យសម្រាប់អ្នកប្រើប្រាស់បណ្ដាញសង្គមនេះ អាចមានច្រើនទម្រង់ ប៉ុន្តែ អ្វីដែលធ្ងន់ធ្ងរនោះ គឺប្រឈមមុខនឹងការចាប់ខ្លួនពីសំណាក់សមត្ថកិច្ច ដូចទៅនឹងករណីដែលបានកើតឡើងរួចមកហើយ។
អ្នកបណ្ដុះបណ្ដាល និងប្រឹក្សាយោបល់ផ្នែកប្រើប្រាស់បណ្ដាញសង្គម លោក កុក ថា បានលើកឡើងថា អ្នកប្រើប្រាស់បណ្ដាញសង្គមហ្វេសប៊ុក មិនគួរបង្ហោះព័ត៌មាន ឬចែករំលែកបន្តនូវព័ត៌មានទាំងឡាយណា ដែលធ្វើឲ្យប៉ះពាល់កិត្តិយសបុគ្គល ធ្វើឲ្យអន្តរាយដល់សន្តិសុខសង្គមជាតិ ប្រើប្រាស់ភាសាពោរពេញទៅកំហឹងដែលបង្កភាពស្អប់ខ្ពើម និងការរើសអើងនោះឡើយ។
សម្រាប់នាយកវិទ្យាស្ថានកម្ពុជាសម្រាប់សិក្សាប្រព័ន្ធផ្សព្វផ្សាយ លោក មឿន ឈានណារិទ្ធ លោកយល់ថា បណ្ដាញសង្គមហ្វេសប៊ុក គឺជាសារព័ត៌មានសាធារណៈបែបឌីជីថល ដែលស្ថិតនៅក្រោមច្បាប់របបសារព័ត៌មាន បើទោះបីជាកម្ពុជាពុំទាន់មានច្បាប់អ៊ីនថឹណិតក៏ដោយ ហើយអ្នកប្រើប្រាស់បណ្ដាញសង្គមនេះ កំពុងដើរតួនាទីមិនខុសពីអ្នកសារព័ត៌មាននោះឡើយ។
លោក មឿន ឈានណារិទ្ធ បន្ថែមថា ដោយសារតែបណ្ដាញហ្វេសប៊ុកជាសារព័ត៌មានបែបឌីជីថលសាធារណៈបែបនេះហើយ ទើបពលរដ្ឋអាចបង្ហោះ ចែករំលែក និងបញ្ចេញមតិនៅលើបណ្ដាញសង្គមមួយនេះបាន។
បើតាមអ្នកជំនាញផ្នែកសារព័ត៌មានរូបនេះ អ្នកប្រើប្រាស់បណ្ដាញសង្គមហ្វេសប៊ុកដែលបង្ហោះព័ត៌មានមិនពិត មិនគួរណាត្រូវបានចាប់ខ្លួន និងកាត់ទោសនោះឡើយ ហើយផ្ទុយទៅវិញ ពួកគេគួរត្រូវបានអនុញ្ញាតឲ្យកែតម្រូវនូវព័ត៌មានរបស់ពួកគេ និងសម្ដែងការសុំទោសជាសាធារណៈជាជាងការចាប់ខ្លួនពួកគេ។
ទោះជាយ៉ាងណាក៏ដោយ ក្រុមអ្នកឃ្លាំមើលសង្គមមើលឃើញថា ការអនុវត្តវិធានការទៅលើអ្នកប្រើប្រាស់ហ្វេសប៊ុក ត្រូវបានធ្វើឡើងដោយលម្អៀង មិនស្មើភាពគ្នានោះដោយ ដោយក្រុមអ្នកប្រើប្រាស់ហ្វេសប៊ុកដែលមាននិន្នាការគាំទ្របក្សប្រឆាំង ត្រូវប្រឈមនឹងការចាប់ខ្លួនយ៉ាងលឿន ខណៈដែលអ្នកប្រើប្រាស់ហ្វេសប៊ុកមាននិន្នាការគាំទ្របក្សកាន់អំណាច ដែលបានគំរាមកំហែងលើមេដឹកនាំបក្សប្រឆាំង មិនដែលត្រូវបានចាប់ខ្លួននោះឡើយ៕