ការប្រកួតអន្តរជាតិបើកឆាកកាលពីសៀលថ្ងៃទី៦ សីហា កីឡាករកម្ពុជា រឿង សោភ័ណ្ឌ និងកីឡាករថៃជាជើងខ្លាំង Khun Phen ត្រូវគេកត់សម្គាល់ថាមានសភាពស្វិតស្វាញយ៉ាងខ្លាំង ដោយអាចនិយាយបានថាការប្រកួតបានបញ្ចប់ដល់ទៅ២ទឹកទៅហើយ គឺរកមិនទាន់ឃើញថាអ្នកណាឈ្នះអ្នកណាចាញ់ផង ដោយសារតែកីឡាករថៃក៏ខ្លាំង ហើយកីឡាករកម្ពុជាក៏មិនធម្មតា។
យ៉ាងណាក៏ដោយ ក្នុងពេលការប្រកួតកាន់តែឡើងកំដៅ លទ្ធផលចាញ់ឈ្នះស្រាប់តែលេចឡើងភ្លាមៗដោយគ្មានកំណត់ទុក ដោយសារតែកីឡាករថៃជ្រុលមួយស្នៀតវាយខុសបច្ចេកទេស ហើយបណ្ដាលអោយលោកអាជ្ញាកណ្ដាលប្រកាសអោយចាញ់ រួចប្រគល់ជ័យជម្នះអោយទៅ រឿង សោភ័ណ្ឌ ដែលដួលសន្លប់លើរេញ។
លោក ញាណ សុធី អ្នករៀបចំការប្រកួតប្រចាំទូរទស្សន៍អាស៊ីអាគ្នេយ៍បានអះអាងថាស្ថាប័នរបស់លោកបានផ្អាកការប្រដាល់ជាលក្ខណៈអន្តរជាតិនៅវេលាម៉ោងនោះប្រមាណជាមួយរយៈមកហើយ ដោយទើបតែបានបើកឆាកប្រកួតជាថ្មីកាលពីថ្ងៃទី៦ សីហា ប៉ុណ្ណោះទើបលោកដាក់កីឡាករកម្ពុជា រឿង សោភ័ណ្ឌ និងកីឡាករថៃ Khun Phen ដែលសុទ្ធតែជាជើងខ្លាំងអោយប៉ះគ្នាជាគូឯក។ លោកថានេះជាសង្វៀនថ្មី ដោយក្នុងមួយសប្ដាហ៍នឹងមានការប្រកួតរវាងកីឡាករកម្ពុជានិងកីឡាករបរទេសចំនួន២គូៗរៀងរាល់សប្ដាហ៍ ហើយក្នុងពេលបន្តបន្ទាប់គឺនឹងបើកការប្រកួតដណ្ដើមខ្សែក្រវាត់ជាលក្ខណៈអន្តរជាតិតែម្ដងដើម្បីបើសង្វៀនអោយកីឡាករកម្ពុជា និងថៃប្រកួតគ្នា។
លោកថាព្រឹត្តិការណ៍មួយនេះដ្បិតថាធ្វើឡើងក្នុងវេលាម៉ោងពេលដូចគ្នានឹងការប្រកួតកាលពីលើកមុន ប៉ុន្តែនេះគឺសង្វៀនថ្មីដែលស្ថាប័័នរបស់លោកទើបតែបានបង្កើតឡើងតែប៉ុណ្ណោះ ក្រោយពីក្រុមហ៊ុនជាអ្នកឧបត្ថម្ភចាស់ត្រូវបញ្ចប់។
ងាកទៅការប្រកួតដ៏ស្វិតស្វាយរវាងកីឡាករគូឯកវិញ លោកថាបើបណ្ដោយអោយអ្នកទាំងពីរប្រកួតគ្នាដល់ចប់
គឺមិនច្បាស់ថាអ្នកណាឈ្នះអ្នកណាចាញ់នោះទេ ក្នុងពេលដែលកីឡាករទាំងពីរសុទ្ធតែបើកឆាកប្រយុទ្ធដាក់គ្នាខ្លាំងៗរៀងខ្លួន។ ឆ្លងផុតការប្រកួត២ទឹក លោកថារកកំណត់អោយអ្នកណាឈ្នះបានទេ ដោយសារតែទាំងរឿង
សោភ័ណ្ឌ និងកីឡាករថៃ សុទ្ធតែមានចំណុចខ្លាំងនិងចំណុចខ្សោយប្រហាក់ប្រហែលគ្នាពិបាកកាត់ក្ដី។ បើទោះជា រឿង សោភ័ណ្ឌ វាយចេញបានច្រើន ប៉ុន្តែលោកថាកម្រិតវាយត្រូវនិងចំគោលដៅរបស់គេ មិនសូវមានច្រើននោះទេ ដោយអះអាងថាកីឡាករថៃម៉ាត់ត្រូវចំ និងវាយជង្គង់ត្រូវចំល្អជាង។
លោកថាការប្រកួតរបស់ពួកគេត្រូវបានកាត់ក្ដីក្នុងទឹកទី៣ ដោយសារតែកីឡាករថៃដែលបានបង្កើនការវាយចេញបានល្អបែរជាភ្លាត់ ដោយលោកបានហៅស្ថានភាពមិនប្រក្រតីដែលបានកើតឡើង ថាជារឿងមួយដ៏សំណាងរបស់ រឿង សោភ័ណ្ឌ នោះផង។
លោក ញាណ សុធី បានរំលឹកពីការប្រកួតក្នុងទឹកទី៣នេះថា កីឡាករទាំង២បើកឆាកវាយប្រយុទ្ធគ្នាល្អទៅៗគួរអោយសរសើរដោយសារម្នាក់ៗគឺគិតតែប្រឹងសម្រុកដោយមិនសំចៃទាំងកែងនិងកណ្ដាប់ដៃដាក់គ្នា។ សូម្បីតែបច្ចេកទេសក្នុងការវាយបោកដាក់គ្នាលើរេញ ក៏អ្នកទាំងពីរសម្ញ៉ែងទៅវិញទៅមក ដើម្បីប្រទាញយកពិន្ទុរៀងខ្លួន។ លោកថាការប្រកួតនៅក្នុងទឹកនោះបើគ្មានបញ្ហាកើតឡើងគឺកីឡាករម្ខាងៗនឹងមានគ្រោះថ្នាក់បើបណ្ដោយអោយបន្តការប្រកួតដល់ចប់ទឹកទី៥ ហើយម្នាក់ៗប្រឹងប្រកួតបានតែប៉ុណ្ណឹង។
ហេតុផលដែលនាំអោយកើតមានបញ្ហាមិនប្រក្រតីនោះឡើង គឺដោយសារតែការវាយប្រកួតគ្នារបស់អ្នកទាំងពីរមានកម្រិតឡើងកំដៅ ហើយបណ្ដាលអោយកីឡាករថៃទប់ជំហរលែងបានក្នុងពេលសម្រុកខ្លាំង ហើយភ្លាត់ថែមមួយកែងត្រូវជំកញ្ចឹងករខាងក្រោយរបស់ រឿង សោភ័ណ្ឌ បណ្ដាលអោយ រឿង សោភ័ណ្ឌ ដូលភីងលើរេញបន្តការប្រកួតលែងកើត។
ទោះអ្នកកាន់ជើងខាងកីឡាករថៃមួយចំនួនចោទថា កីឡាករកម្ពុជាដេកដួលស៊ីឡាក់ ក៏សភាពនៃការវាយកែងត្រូវចំកញ្ចឹងករត្រូវគេមើលឃើញថាមានភាពសមស្របនឹងសភាពដេកដួលរបស់ រឿង សោភ័ណ្ឌ។ កីឡាករថៃបានទទួលយកការកាត់ក្ដីរបស់គណកម្មការរៀបចំគ្មានការតវ៉ានោះទេ ប៉ុន្តែមុនពេលមានការចាក់ផ្សាយសារចុះសារឡើងបញ្ជាក់ពីកំហុសឆ្គងជាសាធារណៈនៅលើអាក្រង់គេក៏មានការតវ៉ាដែរថា រឿង សោភ័ណ្ឌ
មានចេតនាស៊ីឡាក់។
កីឡាករថៃបានបន្ទោសខ្លួនឯងដែលទប់ជំហរមិនបានក្នុងពេលសម្រុកខ្លាំង រហូតបណ្ដាលអោយភ្លាត់មួយស្នៀតនាំអោយចាញ់ទាំងមិនអស់ចិត្ត។ លោក ថៃ អ៊ូ អ្នកដឹកនាំកីឡាករថៃអោយមកប្រកួតនៅក្នុងប្រទេសកម្ពុជាបានអះអាងថា កីឡាករ Khun Phen មានការសោកស្ដាយសម្រាប់ការភ្លាត់ហើយបណ្ដាលអោយចាញ់ក្នុងទឹកទី៣។ លោកថាការប្រកួតរបស់អ្នកទាំងពីរនឹងត្រូវរៀបចំជាថ្មីឆាប់ៗដើម្បីអោយកីឡាករថៃមានឱកាសសងសឹកក្រោយពីភ្លាត់បច្ចេកទេស ហើយបណ្ដាលអោយចាញ់ដោយសារតែអុកមួយកែងត្រូវចំកញ្ចឹងករគូប្រកួតគឺ រឿង សោភ័ណ្ឌ៕