ក្នុងវេទិកាសន្និសីទសារព័ត៌មានកាលពីល្ងាចថ្ងៃទី៩ សីហា តារាចម្រៀងកញ្ញា ឱក សុគន្ធកញ្ញា បានអះអាងថាកញ្ញានឹងសម្រេចចិត្តច្រៀងស្ម័គ្រចិត្តក្នុងវេទិកាប្រគំតន្ត្រីប្រយុទ្ធប្រឆាំងគ្រឿងញៀននៅថ្ងៃទី១៩ សីហា ខាងមុខ
បើទោះជាកម្មវិធីនោះមិនតម្រូវអោយនាងទទួលបានតម្លៃខ្លួនស្មើនឹងការរចេញច្រៀងរបស់នាងដូចក្នុងកម្មវិធីផ្សេងៗ។
កញ្ញារំពឹងយ៉ាងខ្លាំងថាវត្តមានរបស់កញ្ញា នឹងធ្វើអោយមានការចាប់អារម្មណ៍សម្រាប់ការប្រគំតន្ត្រីទាំងមូល
ដើម្បីអោយសាររបស់កម្មវិធីពីការលុបបំបាត់គ្រឿងញៀននៅក្នុងសហគមន៍ ត្រូវបានបញ្ជ្រាបទូលំទូលាយបើមានអ្នកទស្សនាកកកុញ។
កញ្ញា ឱក សុគន្ធកញ្ញា និយាយថា ហេតុផលដែលកញ្ញាទទួលច្រៀងដោយមិនគិតកម្រៃនៅក្នុងវេទិកានោះ
គឺកញ្ញាចង់រួមចំណែកក្នុងការលុបបំបាត់គ្រឿងញៀន និងចង់អោយបញ្ហាគ្រឿងញៀនដែលបានកើតឡើងនៅក្នុងសហគមន៍មានការយកចិត្តទុកដាក់អោយខ្លាំង។
កញ្ញាសម្ដែងអារម្មណ៍សប្បាយចិត្តដែលក្រុមផលិតកររបស់ប្រទេសកូរ៉េដែលបានបង្កើតកម្មវិធីផ្សព្វផ្សាយដើម្បីអោយដឹងពីផលប៉ះពាល់របស់គ្រឿងញៀនមានភាពទូលំទូលាយ ជាពិសេសគឺការផ្ញើសារអោយមានការយកចិត្តទុកដាក់និងដើម្បីពញាក់អារម្មណ៍របស់យុវវ័យអោយជៀសឆ្ងាយពីភាពអវិជ្ជមាននេះ។
កញ្ញាថាសប្បាយចិត្តដែលមានឱកាសបានបញ្ជូនសារនៅលើវេទិកាដែលកញ្ញាបង្ហាញខ្លួន ដោយកញ្ញានឹងត្រៀមផ្ញើសារនូវពាក្យសម្ដីជាច្រើនឃ្លាដើម្បីអោយមានការទប់ស្កាត់ និងលុបបំផុតគ្រឿងញៀនអោយអស់ពីសង្គមកម្ពុជា។
កញ្ញាអះអាងថាគ្រឿងញៀនមិនត្រឹមតែបានបំផ្លាញចំពោះអនាគតរបស់យុវវ័យប៉ុណ្ណោះទេ ប៉ុន្តែក៏បង្កគ្រោះថ្នាក់ចំពោះសង្គមគ្រួសារ និងសង្គមជាតិទាំងមូលផងដែរ ទើបកញ្ញាយល់ថាឱកាសដែលបានចូលរួមផ្សព្វផ្សាយអោយមានការលុបបំបាត់ពីគ្រឿងញៀនគឺជាមោទនភាពរបស់ខ្លួន។
កញ្ញាទទូចអោយមានការលុបបំបាត់គ្រឿងញៀននៅតាមសហគម ដោយកញ្ញាបញ្ជាក់ថាប្រសិនបើក្នុងសហគមនៅតែមានបញ្ហាមួយនេះកើតឡើង គឺមិនខុសពីធ្វើអោយសង្គមទាំងមូលមានផលប៉ះពាល់នោះទេ។
កញ្ញាមានគម្រោងច្រៀងរាំច្រើនបទ អមដោយការបង្អួតក្បាច់រាំនៅក្នុងវេទិកានោះផង ដើម្បីអោយវេទិកាដែលចម្រុះដោយតារាខ្មែរល្បីៗនិងតារាៗមកពីប្រទេសកូរ៉េដែលរូមមាន២ក្រុមកាន់តែមានភាពអធឹកអធមក្នុងស្រ
ទាប់មហាជន។ កញ្ញាអះអាងថាខ្លួនកាន់តែរវល់រាល់ថ្ងៃ ប៉ុន្តែដើម្បីឆ្លៀតរួមចំណែកចូលរួមក្នុងការផ្សព្វផ្សាយពីកម្មវិធីនេះ ទើបកញ្ញាសម្រេចចិត្តដកឃ្លាពីការងាររបស់ខ្លួន ហើយទទួលច្រៀងក្នុងកម្មវិធីនេះតាមការស្នើសុំរបស់អ្នករៀបចំកម្មវិធីដោយមិនមានការរារែក។
នេះជាវេទិកាទទី១ដែលកញ្ញាបានចូលច្រៀង ក្នុងពេលដែលកម្មវិធីមួយនេះកញ្ញាថាបង្កើតឡើងយូរហើយ
តែកញ្ញាមិនដែលបានចូលរួមទាល់តែសោះព្រោះតែភាពមមាញឹក។ កញ្ញាប្រកាសនឹងចូលរួមក្នុងកិច្ចការសង្គមតាមតែអាចធ្វើបាន តែក៏អាស្រ័យលើភាពទំនេររបស់កញ្ញាផងដែរ ក្នុងពេលដែលកញ្ញាក៏មានកុងត្រាជាមួយម្ចាស់ក្រុមហ៊ុននានា ពិសេសហង្សមាសដែលជាអាណាព្យាបាលរបស់ខ្លួន។
កញ្ញានៅតែអះអាងថាវត្តមានចូលច្រៀងជួយដល់សង្គមគឺជារឿងដ៏មានតម្លៃ ជាក់ស្ដែងសម្រាប់កម្មវិធីជួយបំផុសពីបញ្ហាលុបបំបាត់គ្រឿងញឿនគឺជារឿងកញ្ញាជាតារាសិល្បៈមួយរូបត្រូវតែបានរួមចំណែកនោះផង។
អ្នកស្រី Yoo Rina ជាជនជាតិកូរ៉េ នាយកមូនិធិវប្បធម៌កម្ពុជាអន្តរជាតិដែលជាអ្នករៀបចំកម្មវិធី បានអះអាងថា
ព្រឹត្តិការណ៍ដែលបានរៀបចំពាក់ព័ន្ធនឹងគ្រឿងញៀននេះមិនមែនមានតែមួយថ្ងៃដែលច្រៀងដោយតារាចម្រៀងឱក សុគន្ធកញ្ញា នោះទេ គឺមានរយៈច្រើនថ្ងៃ ដោយនៅថ្ងៃទី១៧សីហា គឺការប្រគំតន្ត្រីធ្វើឡើងនៅក្នុងបរិវេណវិទ្យាល័យសិរីដីដុះនៅស្រុកគៀនស្វាយ និងចាប់ពីថ្ងៃទី១៩ រហូតដល់ថ្ងៃទី២៣ សីហា ការប្រគំតន្ត្រីនឹងត្រូវធ្វើឡើងនៅក្នុងបរិវេណបុរីចម្ការដូង។
ក្នុងចំណោមការប្រគំតន្ត្រីផ្សព្វផ្សាយពីការលុបបំបាត់គ្រឿងញៀននៅក្នុងសហគមន៍នេះ តារាចម្រៀង ឱក សុគន្ធកញ្ញា ជួយច្រៀងនៅក្នុងកម្មវិធីត្រឹមតែមួយថ្ងៃប៉ុណ្ណោះ គឺថ្ងៃបើកឆាកនៅពេលការប្រគំតន្ត្រីត្រូវបា
នធ្វើឡើងនៅម្ដុំចម្ការដូង។
អ្នកស្រីថានេះជាកម្មវិធីសប្បុរសធម៌ទ្រង់ទ្រាយធំដោយក្រៅពីតារាចម្រៀងខ្មែរល្បីៗ ក៏មានវត្តមានតារាចម្រៀងក្រុមៗមកពីប្រទេសកូរ៉េផងដែរ ខណៈដែលក្រុមតារាកូរ៉េទាំងនោះក្រៅពីជួយច្រៀងរាំក៏បានរ៉ៃអង្គាសថវិកាគ្នាដើ
ម្បីជួយអោយកម្មវិធីដំណើរការ។
អ្នកស្រីថាជារឿងកោតសរសើរដែលតារាកូរ៉េសម្រេចចិត្តរ៉ៃគ្នាជិះយន្តមកជួយច្រៀងនៅកម្ពុជាហើយ ថែមទាំងជួយរ៉ៃគ្នាដើម្បីអោយកម្មវិធីមានលទ្ធភាពដំណើរការ។ ក្នុងនោះអ្នកស្រីក៏សរសើរចំពោះវត្តមានរបស់តារាចម្រៀង ឱក សុគន្ធកញ្ញា ផងដែរ ដែលបានសម្រេចរួមចំណែកជួយច្រៀងដល់កម្មវិធីក្នុងពេលដែលនាងគឺជាតារាចម្រៀងដែលមានកេរ្តិ៍ឈ្មោះសំឡេងលំដាប់ប្រទេសហើយបានបរិច្ចាគពេលវេលាដើម្បីសង្គម។
ព្រឹត្តិការណ៍បំផុសជុំវិញផលប៉ះពាល់របស់គ្រឿងញាណនេះ អ្នកស្រីថាភាគីខាងប្រទេសកម្ពុជារៀបចំច្រើនលើកមកហើយ ប៉ុន្តែសម្រាប់អ្នកស្រីទើបតែបានចូលរួមបង្កើតបន្ត ក្នុងពេលដែល ឱក សុគន្ធកញ្ញា
ក៏ទើបតែបានចូលរួមជាលើកទី១ដូចគ្នា តែអ្នកស្រីថាវត្តមានរបស់នាងគឺជាការចូលរួមនៅក្នុងបរិយាកាសមួយដែលមានតម្លៃសម្រាប់កម្មវិធីបំផុត ដោយសារតែនាងគឺជាកំពូលតារាដែលមានន័យបំផុតក្នុងការបញ្ចេញសារបំផុសអោយយុវវ័យជៀសឆ្ងាយពីគ្រឿងញៀន ដែលជួយអោយមានការចាប់អារម្មណ៍កាន់តែខ្លាំងថែមទៀត។
លោក Kim Sungman ជាជនជាតិកូរ៉េដែលជាអ្នកសហការរៀបចំនិងជានាយកកម្មវិធីតន្ត្រីសប្បុរសធម៌ «សុបិន្តនៃក្ដីស្រឡាញ់សម្រាប់អនាគត» បានអះអាងថានៅក្នុងព្រឹត្តិការណ៍នេះបានអះអាងការប្រគំតន្ត្រីដែលមានរយៈពេលច្រើនថ្ងៃនេះ ក៏មានកម្មវិធីដាក់ហិបរ៉ៃអង្គាសថវិកាដើម្បីប្រមូលថវិកាជួយដល់មន្ទីរពេទ្យគន្ធបុប្ផាផងដែរ។
ក្នុងនោះក្រុមការងារកូរ៉េរបស់លោកក៏បានបញ្ជូនអ្នកជំនាញព្យាបាលសុខភាពនិងចែកថ្នាំជូនដល់ប្រជាពលរដ្ឋដើម្បីសម្រួលដល់បញ្ហាសុខភាពរបស់ពលរដ្ឋផងដែរ បន្ថែមពីការប្រគំតន្ត្រីសប្បាយៗដែលអាចអោយអ្នកទស្សនបានជ្រាបពីសារសំខាន់ៗរបស់កម្មវិធីដែលផ្ដោតជាពិសេសលើផលប៉ះពាល់របស់គ្រឿងញៀន។
លោកថានេះជាការប្រគំតន្ត្រីសប្បុរសធម៌ច្រើនលើកមកហើយ តែសម្រាប់ការផ្សាយផ្ទាល់ជាមួយទូរទស្សន៍ NTV គឺជាលើកទី២ដោយកាលពីលើកទី១បានទទួលជោគជ័យយ៉ាងខ្លាំងនៅទីលានប្រគំតន្ត្រីប្រជាធិបតេយ្យដែលក្នុងកាលនោះគឺមានតារាចម្រៀង ពេជ្រ សោភា ចូលរួម អមដោយតារាមកពីប្រទេសកូរ៉េដូចគ្នា។ លោកថាមានតែតារាល្បីៗរបស់កម្ពុជាប៉ុណ្ណោះ ទើបអាចផ្សព្វផ្សាយពីផលប៉ះពាល់របស់គ្រឿងញៀនដើម្បីកុំអោយបន្តកើតមាននៅក្នុងសង្គមកម្ពុជា៕
