តំណាងពិសេសនៃអង្គការសហប្រជាជាតិ ប្រាប់កម្ពុជាឲ្យរៀបចំឯកសារពីដំណោះស្រាយសិទ្ធិមនុស្សឆ្លើយតបឲ្យទាន់ពេលវេលា ខណៈដែលមានការបារម្ភថ្មីពីការរំលោភសិទ្ធិលើជនជាតិដើមភាគតិចត្រូវបានកត់សំគាល់។
ក្នុងជំនួបមួយនៅសប្តាហ៍នេះ តំណាងពិសេសរបស់អង្គការសហប្រជាជាតិស្តីពីសិទ្ធិមនុសុ្សនៅកម្ពុជា លោកស្រី រ៉ូណា ស្មីត បានប្រាប់ប្រធានគណៈកម្មាធិការសិទ្ធិមនុស្សកម្ពុជា លោក កែវ រ៉េមី ឲ្យរៀបចំឯកសារឆ្លើយតបទៅនឹងអនុសាសន៍របស់អង្គការសហប្រជាជាតិស្តីពីសិទ្ធិមនុស្សឲ្យទាន់ពេលវេលា និងសុំបញ្ជាក់ពីការស្ថានភាពសិទ្ធិរបស់ជនជាតិដើមភាគតិចដែលរងគ្រោះពីការសាងសង់ទំនប់វារីអគ្គីសនីសេសានក្រោមពីរផងដែរ។
ជាការឆ្លើយតប លោក កែវ រ៉េមី បានបញ្ជាក់ថា គណៈកម្មាធិការសិទ្ធិមនុស្សកម្ពុជា និងក្រសួងការបរទេសកម្ពុជាកំពុងតែពិនិត្យទៅលើឯកសារពាក់ព័ន្ធដើម្បីដាក់ទៅអង្គការសហប្រជាជាតិឲ្យទាន់ពេលវេលា។
លោកថា៖ «អ្វីដែលសំខាន់ទាក់ទងនឹងជនជាតិដើមភាគតិចទាក់ទងនឹងទំនប់វារីអគ្គីសនីសេសានក្រោមពីរ។ នេះចាំរឿងមួយដែលចាំបាច់ ដែលក្រសួងការបរទេសបានបញ្ជូនលិខិតទៅភាគីពាក់ព័ន្ធ ដើម្បីរៀបចំជាការឆ្លើយតបជាលាយលក្ខណ៍អក្សរតែម្តង។ កាលណានិយាយមាត់ទទេវាពិបាក ក៏ប៉ុន្តែការរៀបចំឯកសារជាលាយលក្ខណ៍អក្សរគាត់មាននៅនឹងដៃ គាត់មានភស្ភុតាងដែលគាត់លើកមកការពារយើងគាត់មាននៅហ្នឹងដៃ ក៏ប៉ុន្តែយើងបានធ្វើ»។
គួររំលឹកផងដែរថា ក្នុងកិច្ចប្រជុំលើកទី ៣២ របស់ក្រុមប្រឹក្សាសិទ្ធិមនុស្សអង្គការសហប្រជាជាតិ ប្រទេសចំនួន៣៦ មានសហរដ្ឋអាមេរិក អាល់បានី អូស្រ្តាលី ជប៉ុន កាណាដា ម៉ាសេដូនី ណ័រវ៉េ ស្វីស អ៊ុយក្រែន និងប្រទេសចំនួន២៨ជាសមាជិកនៃសហភាពអឺរ៉ុបបានបង្ហាញជំហររួមគ្នាថាស្ថានការណ៍នយោបាយនៅកម្ពុជាបានគំរាមកំហែងសកម្មភាពស្របច្បាប់របស់គណបក្សប្រឆាំងនិងអង្គការមិនមែនរដ្ឋាភិបាលដែលធ្វើការផ្នែកសិទ្ធិមនុស្ស។
ជាងនេះទៅទៀតប្រទេសទាំង៣៦នោះបានជំរុញរដ្ឋាភិបាលកម្ពុជាធ្វើយ៉ាងណាជំរុញដំណើការបោះឆ្នោតឲ្យប្រព្រឹត្តិទៅដោយសេរីនិងយុត្តិធម៌ ធានាភាពស្របច្បាប់ដល់រដ្ឋាភិបាលកើតក្រោយការបោះឆ្នោត ធានាចំពោះមុខពលរដ្ឋរបស់ខ្លួននិងសហគមន៍អន្តរជាតិ។
អ្នកតំណាងអចិន្ត្រៃយ៍របស់កម្ពុជាប្រចាំនៅការិយាល័យអង្គការសហប្រជាជាតិលោក នៃ សំអុល បានស្នើសុំឲ្យមានការចរចាគ្នាដោយចំហនិងការគោរពគ្នាទៅវិញទៅមក។ លោកថាកម្ពុជាទទួលយកគ្រប់ការផ្ដល់ជំនួយនិងយោបល់ទាំងឡាយ ប៉ុន្តែកម្ពុជាមិនស្វាគមន៍ការជ្រៀតជ្រែកក្នុងកិច្ចការផ្ទៃក្នុងរបស់ខ្លួនឡើយ៕
