សាលាក្រុងបាត់ដំបងបានរារាំងចៅសង្កាត់អូរចាររបស់បក្សប្រឆាំងដែលទើបជាប់ឆ្នោតកាន់ដំណែងថ្មី ឲ្យបញ្ឈប់សកម្មភាពដាក់លូររំដោះទឹកចេញពីភូមិជូនពលរដ្ឋ ដោយអះអាងថាការធ្វើខុសបច្ចេកទេស។
សាលាក្រុងបាត់ដំបងបានចេញលិខិតណែនាំមួយទៅកាន់ចៅសង្កាត់អូរចារ កញ្ញា ស៊ិន ចាន់ពៅរ៉ូហ្ស៊េត ចុះថ្ងៃទី ២៥ ខែ សីហា ស្ដីពីសកម្មភាពជីកដាក់លូ ស្ថិតនៅក្នុងភូមិអណ្ដូងចេញ សង្កាត់អូរចារ ក្រុងបាត់ដំបង និង ឲ្យស្នើសុំមន្រ្តីបច្ចេកទេសពិនិត្យ និង សិក្សាជាមុន។
ក្នុងលិខិតដដែលថារដ្ឋបាលសាលាក្រុងលើកឡើងថាចៅសង្កាត់ក្មេងរូបនោះកំពុងជីកផ្លូវ និងដាក់លូដែលមានទំហំតូច ដែលមិនត្រូវតាមបច្ចេកទេស ហើយអាចបណ្ដាលឲ្យមានផលលំបាកទៅថ្ងៃខាងមុខ ដោយប្រឈមការបែកបាក់លូ និងកកស្ទះប្រព័ន្ធបង្ហូរទឹក ព្រោះកម្រាស់ដីខ្នងលូស្ដើង។
លិខិតរដ្ឋបាលសាលាក្រុងបាត់ដំបងដដែលបានបញ្ជាឲ្យ ចៅសង្កាត់អូរចារ ផ្អាកសកម្មភាពដាក់លូនេះ ហើយត្រូវធ្វើលិខិតរដ្ឋបាលទៅកាន់សាលាក្រុង ដើម្បីស្នើសុំមន្រ្តីបច្ចេកទេសពាក់ព័ន្ធចុះពិនិត្យ និង សិក្សាជាមុន។ សាលាក្រុងបញ្ជាក់ថា បើមិនព្រមអនុវត្តតាមការណែនាំ វាអាចប្រឈមនឹងការខាត់បង់ ថវិកាដោយមិនបានគិតគូរជាមុន ព្រោះមានគម្រោងខ្លះជាន់គ្នាជាមួយនិងគម្រោងអភិវឌ្ឍរបស់សាលាក្រុង ។
ទាក់ទងនឹងបញ្ហានេះចៅសង្កាត់ថ្មីមកពីបក្សប្រឆាំង កញ្ញា ស៊ិន ចាន់ពៅរ៉ូហ្ស៊េត បានលើកឡើងនៅ ក្នុងវីដេអូខ្លីបមួយដែលត្រូវបានបង្ហោះលើបណ្ដាញសង្គមហ្វេសប៊ុក នៅពេលចុះជួបជាមួយពលរដ្ឋថា ការដាក់លូមិនជ្រៅទៅក្នុងដី គឺដោយមានថ្មបេតុងខាងក្រោមក្រាស់ពេកមិនអាចបំបែកបាន។ កញ្ញាបន្ត ថាការដាក់លូនេះ គឺសង្រ្គោះបឋម ក្នុងការរំដោះទឹកចេញពីភូមិរបស់ពលរដ្ឋ ហើយវាជាការចំណាយ ប្រាក់របស់សប្បុរសជន មិនមែនជាថវិការដ្ឋនោះទេ។
ទាក់ទងនឹងករណីចម្រូងចម្រាស់នៃការជីកផ្លូវដាក់លូនេះ កាលពីថ្ងៃទី ៧ ខែ សីហា មេឃុំថ្មីមកពីគណបក្សសង្គ្រោះជាតិនៅឃុំជើងព្រៃ ខេត្តកំពង់ចាម ក៏ត្រូវបានអភិបាលខេត្តកំពង់ចាម ដាក់ឱសានវាទ ៧ថ្ងៃ ឲ្យលុបប្រឡាយដែលពលរដ្ឋស្នើឲ្យជីក ដោយថាការជីកប្រឡាយកាត់ខូចផ្លូវជាជំនួយរបស់ធនាគារអភិវឌ្ឍន៍អាស៊ី (ADB) ដែលមានទឹកប្រាក់ចំនួន ២ម៉ឺនដុល្លារ៕