រដ្ឋាភិបាលនិងសង្គមស៊ីវិលរួមគ្នា លើកស្ទួយដល់ការងាររបស់យុវជន

ក្រសួងអប់រំ យុវជន និងកីឡា អង្គការសហប្រជាជាតិ និងអង្គការជាច្រើនផ្សេងទៀត បានពិភាក្សាគ្នា ដើម្បីលើកកំពស់ឱកាសការងារ ដល់យុវជននិងយុវតី នៅក្នុងប្រទេសកម្ពុជា ដោយហេតុថា ភាគច្រើនពួកគេប្រឈមទៅនឹងហានិភ័យនៅក្នុងសេដ្ឋកិច្ចក្រៅប្រព័ន្ធ និងប្រឈមទៅនឹងភាពក្រីក្រ។

បើតាមសេចក្តីប្រកាសរបស់រាជរដ្ឋាភិបាលកម្ពុជា កាលពីថ្ងៃទី៣១សីហា កម្មវិធីខាងលើ ធ្វើឡើងក្រោមប្រធានបទ «រួបរួមដើម្បីមុខរបរ និងការងាររបស់យុវជននៅកម្ពុជា» ដោយភាគីខាងលើ បានចុះកិច្ចព្រមព្រៀងគ្នា លើកិច្ចសហប្រតិបត្តិការរយៈពេលពីរឆ្នាំ ដោយមាននិន្នាការលើកកំពស់ការងារសម្រាប់យុវជន ក៏ដូចជាធានាថា ពួកគេមានលទ្ធភាពប្រសើរជាងមុន ក្នុងការឆ្លើយតបនឹងតម្រូវការពលកម្ម។

នៅក្នុងកម្មវិធីនោះ តំណាងអង្គការសហប្រជាជាតិប្រចាំកម្ពុជា លោកស្រី Claire Van Der Vaeren បានលើកឡើងថា ការលើកកំពស់ការងារសម្រាប់យុវជន មានសារៈសំខាន់បំផុត ដោយលោកស្រីមានប្រសាសន៍ថា វារួមចំណែកក្នុងការធ្វើឲ្យប្រទេសកម្ពុជារីកចំរើនផ្នែកសេដ្ឋកិច្ច ប្រកបដោយចីរភាព។

លោកស្រីបន្ថែមថា កម្មវិធីនេះ ធ្វើឡើងដើម្បីជួយឲ្យស្រ្តីនិងបុរសកម្ពុជាវ័យក្មេង មានឱកាសក្នុងការទទួលបានការងារល្អប្រសើរជាងមុន ជាពិសេសជួយដល់ក្រុមណាដែលទន់ខ្សោយនិងងាយរងគ្រោះ។

ចំណែកឯរដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ លោក អ៊ិត សំហេង មានប្រសាសន៍ថា កិច្ចសហប្រតិបត្តិការមួយនេះ លើកកំពស់គុណភាពការងារដល់ពលរដ្ឋវ័យក្មេងនៅកម្ពុជា និងជួយដោះស្រាយបញ្ហាប្រឈមលើផ្នែកការងារសម្រាប់យុវជនកម្ពុជា។

កម្មវិធីនេះ រៀបចំឡើងដោយមានការសហការគ្នា រវាងអង្គការពលកម្មអន្តរជាតិ (ILO) ក្រសួងអប់រំ យុវជន និងកីឡា អង្គការសហប្រជាជាតិ UNDP UNESCO UNICEF UNV និងក្រសួងការងារ និងបណ្តុះបណ្តាលវិជ្ជាជីវៈ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ