ខុសពីផ្នត់គំនិតរបស់ក្រុមអ្នកអភិរក្សវប្បធម៌ លោក អ៊ិន សុភិន ចាងហ្វាងផលិតកម្មមហាហង្សបានអះអាងថា
អ្នកគាំទ្រភាពយន្តខ្មែរល្មមដល់ពេលបើកចិត្តបើកគំនិតទទួលយកការសម្ដែងជាទម្រង់ស្នេហារោលរាលរបស់តារាខ្មែរហើយ ដើម្បីអោយវិស័យភាពយន្តក្នុងស្រុកមានការប្រែប្រួល ហើយអាចឈានចូលលើឆាកអន្តរជាតិដែលអ្នកគាំទ្ររបស់គេយល់ថា ការសម្ដែងអោបថើប ដោះខោអាវ និងស្រាតជាដើមនៅក្នុងផ្ទៃរឿង គឺជារឿងធម្មតា។
លោកបានថ្លែងបែបនេះនៅក្នុងពិធីបើកសម្ពោធដាក់បញ្ចាំងរឿង «មន្តស្នេហ៍លេខា» ដែលជារឿងមានសាច់រឿងស្នេហារោលរាល ហើយមានការសម្ដែងដោយ អ្នកនាង ភិន សុដាលីស ជាតួអង្គម្នាក់ផង។ លោក អ៊ិន សុភិន
និយាយថាក្នុងចំណោមភាពយន្តទាំងអស់ដែលលោកបានផលិត លោកចាត់ទុកថាភាពយន្តរឿង «មន្តស្នេហ៍លេខា» ជារឿងទី១ដែលលោកមានឈុតឆាកថើបបឺតមាត់រវាងតួអង្គប្រុសនិងស្រី យ៉ាងផ្អែមល្ហែមរ៉ូម៉ាទិក
និងមានឈុតឆាកលើគ្រែយ៉ាងស្រើបស្រាលផង ដែលលោកប្រកាសថា នេះគឺជាបរិបទមួយថ្មី ដែលលោកសម្រេចចិត្តចេញថតដោយមិនខ្លាចនឹងការរិះគន់។
លោកថារឿងនេះត្រូវបានដាក់បញ្ចាំងជាភាពយន្តភាគនៅលើកញ្ចក់ទូរទស្សន៍មួយរួចហើយ ប៉ុន្តែមិនបានដាក់បញ្ចូលឈុតឆាករោលរាលទាំងហ្នឹងទេ ដោយឈុតឆាកទាំងនោះត្រូវបានផ្អឹបទុកសម្រាប់តែក្នុងភាពយន្តខ្នាតធំដែលមានរយៈពេល១ម៉ោងកន្លះនេះប៉ុណ្ណោះ។
នៅក្នុងរឿងនេះគេឃើញតួអង្គសំខាន់៣នាក់ ដែលរួមមាន អ្នកនាង ភិន សុដាលីស ផង សម្ដែងឈុតរោលរាលយ៉ាងពេញទំហឹង តែលោកប្រកាសថានោះជាឈុតដែលមានលក្ខណៈសិល្បៈច្រើនជាងបំផុសអោយ
ធ្វើតាម ដោយលោកបញ្ជាក់ថា គឺគោលបំណងសំខាន់គ្រាន់តែមិនចង់អោយភាពយន្តរបស់ខ្មែរនៅតែមានភាពច្រំដែលៗប៉ុណ្ណោះ។
លោកទទូចអោយអ្នកគាំទ្រដែលបានទស្សនាភាពយន្តខ្នាតធំមួយនេះ កុំមានការរិះគន់ណាមួយ ហើយងាកមកកោតសរសើរពីការប្រឹងប្រែងសម្ដែងរបស់តួអង្គនីមួយៗទៅវិញ ដើម្បីលើកទឹកចិត្តអោយខ្មែរកាន់តែមានភាពយន្តមួយល្អ ដែលអាចទៅរួចជាមួយប្រទេសជិតខាង និងដើម្បីកុំអោយមានតែឈុតកំប្លែងនិងខ្មោចដដែលខ្លាំងពេក។
លោកបានបញ្ជាក់ក្នុងពិធីសម្ពោធរឿងនោះថាភាពយន្តរឿង «មន្តស្នេហ៍លេខា» ពិតជាមានឈុតស្នេហារោលរាល ដោយមានទាំងប្លង់បឺតមាត់ជាមួយតួប្រុស និងឈុតរោលរាលលើគ្រែ ខុសពីរឿងផ្សេងៗដែលខាងផលិតកម្មមហាហង្សធ្លាប់បានផលិតនោះមែន តែលោកយល់ថាបើមិនមានការសម្ដែងជាទម្រង់នេះខ្លះ គឺផលិតកររបស់ខ្មែរ និងតារារបស់ខ្មែរ ពិតជាមិនអាចសម្ដែងនូវអ្វីដែលថ្មីសម្រាប់បម្រើដល់អារម្មណ៍របស់អ្ន
កទស្សនានោះទេ។
ភាពយន្តនេះ លោកអះអាងថា បានស្រង់ចេញពីឈុតសំខាន់ដែលបានបញ្ចាំងចប់នៅលើកញ្ចក់ទូរទស្សន៍ក្នុងពេលផ្សាយជាភាគ ប៉ុន្តែនៅពេលយកមកធ្វើជាភាពយន្តខ្នាតធំ គឺបញ្ចូលស្នេហារោលរាលម៉ាឆ្ងាញ់តែម្ដង ដើម្បីអោយទស្សនិកប្លែកភ្នែក។
យ៉ាងណាមិញ លោកអះអាងថានោះមិនទាន់ដល់ដំណាក់កាលសាហាវនិងក្ដៅសាច់ដូចជាភាពយន្តបរទេសនោះទេ គឺគ្រាន់តែជាឈុតស្រើបស្រាលមួយកម្រិតដែលមានលក្ខណៈជាខ្មែរនិងលក្ខណៈជាសិល្បៈ អោយសមនឹងផ្នត់គំនិតរបស់អ្នកមិនទាន់ទទួលវប្បធម៌បរទេសពាក់ព័ន្ធនឹងចំណុចនេះប៉ុណ្ណោះ។
លោកអះអាងថានេះជាការស្ទាបស្ទង់មហាជន ហើយប្រសិនបើការសម្ដែងបែបនេះមិនមានប្រតិកម្មណាមួយ
នោះបណ្ដាផលិតករនឹងហ៊ានផលិតភាពយន្តអោយបានកាន់តែច្រើន តែមិនមានន័យថាក្នុងនាមជាផលិតករលោកលើកទឹកចិត្តអោយប្រឹងផលិតរឿងដែលមានលក្ខណៈជាស្នេហាស្រើបស្រាលនិងរោលរាលបំផុសយុវវ័យនោះទេ។ លោកគ្រាន់តែស្នើសុំអោយអ្នកទស្សនារៀនទទួលយកខ្លះ ដោយមិនមែនគ្រាន់តែតួអង្គបឺតមាត់គ្នា ឬមានការអោបថើបជាមួយគ្នាតម្រូវសាច់រឿងតែបន្តិចក៏បង្ហោះបំបាក់ទឹកចិត្តរបស់តួអង្គ និងអ្នកផលិតនោះទេ។
យ៉ាងណាមិញ លោកថាសម្រាប់ភាពយន្តរឿង «មន្តស្នេហ៍លេខា» ដែលមានឈុតឆាករបៀបនេះច្រើន គឺមិនមានបង្ហាញសកម្មភាពរោលរាលហួសហេតុ ដែលនាំទៅដល់នូវការរិះគន់នោះទេ។ លោកថាមួយរឿងនេះដ្បិតថាសំបូរឈុតស្រើបស្រាលក្នុងរឿងស្នេហា ប៉ុន្តែមន្ត្រីខាងនាយកដ្ឋានភាពយន្តសុទ្ធតែបានត្រួតពិនិត្យហើយអនុញ្ញាតិអោយដាក់បញ្ចូលយកមកបញ្ចាំងលក់សំបុត្រត្រឹមត្រូវ ទើបលោកជឿថាអ្វីដែលបានឆ្លុះបញ្ចាំងក្នុងរឿងគឺច្បាស់ណាស់ថាមិនមានការរិះគន់។
លោកថាបណ្ដាផលិតករនិងតួសម្ដែងខ្មែរជាច្រើនរមែងខ្លាចនឹងការសម្ដែងបែបស្នេហាស្រើបស្រាលនិងរោលរាល ទើបការផលិតភាពយន្តដែលខាងផលិតចង់ដាក់បញ្ចូលនូវប្លង់បែបនេះត្រូវបានរាំងស្ទួះ។ ជាក់ស្ដែងលោកមិនមានតារាខ្មែរដែលល្បីឈ្មោះច្រើនទេក្រៅពី ឌុច លីដា និងតារា២បីទៀត ហើយហ៊ានថតឈុតបែបនេះ ខណៈដែលសូម្បីតែកូនស្រីរបស់លោកគឺ ភិន សុដាលីស ទម្រាំតែយល់ព្រមសម្ដែងក្នុងរឿង «មន្តស្នេហ៍លេខា» ដែលតម្រូវអោយតួប្រុសអោបថើប បឺតមាត់ញីញក់ ក៏ប្រកែកមិនចង់ថតព្រោះតែខ្លាចរឿងហ្នឹង។
លោកស្នើអោយអ្នកទស្សនាបើកចិត្តអោយកាន់តែទូលាយ ដោយលោកប្រកាសថាបណ្ដាភាពយន្តក្រៅប្រទេស
កម្រអត់ណាស់សម្រាប់ឈុតឆាកដែលត្រូវដាក់បញ្ចូលមួយបង់ ឬ២ប្លង់ ហើយអាចទាញចំណូលយ៉ាងក្រាសពីដាក់បញ្ចាំងម្ដង។
លោកថាផលិតកម្មភាគច្រើននឹងងាកពីការផលិតរឿងបែបកំប្លែងនិងបែបខ្មោចលងកុំអោយជាន់គ្នា ហើយបើចង់អោយមានភាពយន្តជាទម្រង់ស្នេហារ៉ូម៉ាទិក គឺលុះត្រាប្ដូរទស្សនៈរិះគន់ ហើយងាកមកទទួលយកនូវការសម្ដែងបែបជាស្នេហារោលរាលដើម្បីកុំអោយបន្តថាច្រំដែលវិញ។ លោកថាភាពយន្តមួយនេះនឹងដាក់លក់សំបុត្រនៅថ្ងៃទី១៨ កញ្ញាគ្រប់រោង ហើយបើទោះជាសាច់រឿងទាំងមូលត្រូវបានគេដឹងតាមរយៈការផ្សាយនៅលើកញ្ចក់ទូរទស្សន៍មួយរួចទៅហើយ ក៏ឈុតឆាកស្នេហារោលរាលដែលមិនបានដាក់បញ្ចូលនៅពេលបញ្ចាំងលើទូរទស្សន៍ នឹងទាក់ទាញអ្នកទស្សនាបានច្រើន ជាពិសេសក្នុងពេលដែលអ្នកទស្សនាតាមទូរទស្សន៍
និងអ្នកនិយមទិញសំបុត្រកុនមើល ត្រូវលោកបញ្ជាក់ថាមនុស្សក្រុមផ្សេងគ្នានោះ។
លោកនៅតែអះអាងថាអ្វីដែលតួអង្គក្នុងរឿង ព្រមទាំងកូនស្រីរបស់់លោកបានសម្ដែងគឺ ជាទម្រង់សិល្បៈ ដោយលោកបញ្ជាក់ថានោះមិនមែនជាឈុតឆាកហួសហេតុនោះទេ។ លោកថាបើគ្រាន់តែហ៊ានសម្ដែងអោបថើប បឺតមាត់ និងឈុតលើគ្រែជាដើម ហើយក៏ខ្លាចមានការរិះគន់ ដូច្នេះទៅថ្ងៃអនាគតភាពយន្តខ្មែរនឹងអត់មានភាពយន្តមួយណាដែលខុសទម្រង់ពីកំប្លែង និងខ្មោចទេ ហើយសូមកុំបន្តរិះគន់ថាផលិតករខ្មែរ និងតារាខ្មែរអត់មានគំនិតថ្មី។
លោកទទូចអោយមានអ្នកទស្សនាទៅទស្សនាភាពយន្តនេះអោយច្រើន ដើម្បីចង់ដឹងថាឈុតឆាកស្នេហារោលរាលដែលបានស្ដែងឡើងទទួលយកបានឬក៏មិនបាន។
ភិន សុដាលីស ដែលជាតួអង្គសម្ដែងមួយនៅក្នុងរឿង «មន្តស្នេហ៍លេខា» ដែលបានសម្ដែងជាតួអង្គស្រី
ត្រូវតារាប្រុសបង្កាត់ស្នេហារោលរាលបានអះអាងថា ការថតមួយរឿងនេះនាងលះបង់ច្រើនជាពិសេសគឺអោយតួប្រុសថើបបឺតមាត់និងអោបថើបញីញក់ជាដើមមិនខុសពីគូស្នេហ៍ស្រឡាញ់គ្នាមែនទែន ប៉ុន្តែនាងមិនយល់ឃើញថាការសម្ដែងបែបនេះ គឺអ្វីដែលមានលក្ខណៈហួសហេតុនោះទេ ដោយសារតែភាពជាក់ស្ដែងគឺអ្វីដែលតួអង្គបានសម្ដែងមានលក្ខណៈសិល្បៈច្រើនជាង។
នាងអះអាងថាភាពយន្តរឿង «មន្តស្នេហ៍លេខា» មិនអនុញ្ញាតិអោយអ្នកទិញសំបុត្រដែល មានអាយុតិចជាង១៥ឆ្នាំទស្សនានោះទេ ទើបនាងទទូចអោយអ្នកទិញសំបុត្រដែលបានទស្សនាឈុតឆាកដែលនាងនិងតួអង្គទាំងអស់បានសម្ដែង កុំមានការរិះគន់ ហើយគួរតែលើកទឹកចិត្តណាមួយដើម្បីអោយនាងធ្វើការពិចារណាថាត្រូវបន្តការសម្ដែងបែបនេះ ឬឈប់ត្រឹមហ្នឹង។
យ៉ាងណាមិញ នាងអះអាងថាត្រឹមឈុតស្នេហារោលរាលគឺនាងថតបាន ប៉ុន្តែបើឈានដល់ស្រាតឬអោយដោះអាវចំហរខ្មងអីជាងដើមក្នុង គឺនាងមិនថតដាច់ខាត ដោយសារតែឈុតទាំងនោះនាងអះអាងថាបើទោះជាទស្សនិកជនមើលឃើញត្រឹមតែខ្នង ឬមានការថតបាំងណាមួយ ក៏ក្នុងពេលថតមិនខុសពីបង្ហាញក្រុមអ្នកបច្ចេកទេសគ្មានសល់នោះទេ៕