មេធាវីការពារក្ដីឲ្យប្រធានគណបក្សប្រឆាំងដែលកំពុងជាប់ឃុំ បានលើកថា ការមិនអនុញ្ញាតឲ្យក្រុមតំណាងរាស្ត្រចូលជួបសួរសុខទុក្ខកូនក្ដីរបស់លោក គឺជាការរឹតត្បិតសិទ្ធិសេរីភាពជនត្រូវចោទដែលមានចែងក្នុងរដ្ឋធម្មនុញ្ញ។
នៅក្នុងលិខិតផ្ញើទៅលោក គី ឬទ្ធី ចៅក្រមសាលាដំបូងរាជធានីភ្នំពេញ កាលពីថ្ងៃទី១៤ ខែកញ្ញានោះ តំណាងរាស្ត្របក្សប្រឆាំងមណ្ឌលខេត្តកំពង់ចាម លោក ម៉ៅ មុនីវណ្ណ និងតំណាងរាស្ត្រ ១១រូបផ្សេងទៀត បានស្នើចូលជួប និងសួរសុខទុក្ខលោក កឹម សុខា នៅពន្ធនាគារត្រពាំងផ្លុង នៅព្រឹកថ្ងៃទី១៨ ខែកញ្ញាសប្ដាហ៍ក្រោយនេះ។
ប៉ុន្តែ នៅក្នុងលិខិតឆ្លើយតបទៅនឹងតំណាងរាស្ត្របក្សប្រឆាំងចុះថ្ងៃទី១៤ ខែកញ្ញាដដែលនោះ ចៅក្រម លោក គី ឬទ្ធី បានបដិសេធទៅនឹងសំណើនេះ ដោយលើកហេតុផលថា សំណុំរឿងលោក កឹម សុខា កំពុងស្ថិតក្នុងដំណាក់កាលស៊ើបសួរ និងស្រាវជ្រាវប្រមូលភស្តុតាង។
មេធាវីការពារក្ដីមេបក្សប្រឆាំងរូបនេះ គឺលោក សំ សុគង់ បានលើកឡើងថា ការមិនអនុញ្ញាតិឲ្យក្រុមតំណាងរាស្ត្រចូលជួបលោក កឹម សុខា គឺជាការរឹតត្បិតសិទ្ធិរបស់ជនត្រូវចោទ ដែលមានចែងក្នុងរដ្ឋធម្មនុញ្ញស្តីពីការអនុញ្ញាតឲ្យជួបសាច់ញាតិ បងប្អូន ឬ មិត្តភក្តិក្រោយឃុំខ្លួនរយៈពេល ២៤ម៉ោង ទាក់ទងនឹងបទល្មើសជាក់ស្ដែង។
លោក សំ សុគង់ បន្តថា ទោះបីជនត្រូវចោទស្ថិតក្នុងដំណាក់កាលឃុំខ្លួនបណ្ដោះអាសន្នរយៈពេល ៦ខែ ដើម្បីស៊ើបសួរ និងប្រមូលភស្តុតាង ដូចការលើកឡើងរបស់តុលាការក្ដី ក៏ជនត្រូវចោទមានសិទ្ធិអាចជួបប្រាស្រ័យទាក់ទងនិងសួរសុខទុក្ខពីសាច់ញាតិ ឬសមាជិកបក្សបានដែរ។
លោក សំ សុគង់ លើកឡើងបន្ថែមថា ក្នុងរដ្ឋធម្មនុញ្ញស្តីពីសិទ្ធិនយោបាយ និងសិទ្ធិពលរដ្ឋ ក្នុងដំណាក់កាលនៃការស៊ើបសួរនេះ កូនក្ដីលោកគឺ លោក កឹម សុខា ក៏នៅមានសិទ្ធិដូចប្រជាពលរដ្ឋ វាលែងតែសិទ្ធិនៃការដើរហើរ។
ប្រធានគណបក្សសង្គ្រោះជាតិលោក កឹម សុខា ត្រូវបានសមត្ថកិច្ចចាប់ខ្លួនកាលពីយប់ឈានចូលថ្ងៃទី០៣ ខែកញ្ញាកន្លងមកនេះ និងត្រូវបានបញ្ជូនទៅឃុំខ្លួននៅពន្ធនាគារត្រពាំងផ្លុង ស្ថិតនៅក្នុងខេត្តត្បូងឃ្មុំជាប់ព្រំដែនវៀតណាម ដោយត្រូវបានរដ្ឋាភិបាលចោទថា «ក្បត់ជាតិ» ពាក់ព័ន្ធនឹងសម្ដីមេបក្សប្រឆាំងរូបនេះ ដែលបានថ្លែងនៅក្នុងប្រទេសអូស្ត្រាលី អំពីការគាំទ្រខាងប្រជាធិបតេយ្យពីសំណាក់ប្រទេសអាមេរិក។
បន្ទាប់ពីមេដឹកនាំរបស់ពួកគេត្រូវបានចាប់ដាក់ឃុំរួចមក ក្រុមតំណាងរាស្ត្រគណបក្សសង្គ្រោះជាតិ បានដាក់ពាក្យទៅតុលាការរាជធានីភ្នំពេញម្ដងរួចមកហើយកាលពីថ្ងៃទី០៦ ខែកញ្ញាកន្លងមកនេះ ដើម្បីចូលសួរសុខទុក្ខលោក កឹម សុខា។
នៅពេលធ្វើដំណើរចូលទៅសួរសុខទុក្ខលោក កឹម សុខា នៅឯពន្ធនាគារត្រពាំងផ្លុងកាលពីព្រឹកថ្ងៃទី១៤ ខែកញ្ញា ក្រុមតំណាងរាស្ត្របក្សប្រឆាំង មិនត្រូវបានអនុញ្ញាតឲ្យចូលជួបមេដឹកនាំរបស់ពួកគេនោះឡើយ ខណៈដែលកម្លាំងសន្តិសុខចម្រុះរាប់រយនាក់ ត្រូវបានដាក់ពង្រាយនៅជុំវិញបរិវេណពន្ធនាគារនោះ៕
