សហមេធាវីចំនួន៦រូប ដែលការពារក្តីឲ្យមេបក្សប្រឆាំង លោក កឹម សុខា បានសម្រេចដើរចេញពីបន្ទប់សវនាការ នៃសាលាឧទ្ធរណ៍នៅថ្ងៃនេះ ដោយថា ករណីនេះ គឺជំទាស់ទៅនឹងនីតិវិធីរបស់តុលាការជាន់ខ្ពស់មួយនេះ ដែលមិនបានបញ្ជូនកូនក្តីរបស់ពួកគេ ចូលក្នុងសវនាការ ដើម្បីសួរដេញដោល។
ចៅក្រមស៊ើបសួរនៅសាលាដំបូងរាជធានីភ្នំពេញ បានបង្គាប់ឲ្យឃុំខ្លួន លោក កឹម សុខា ទាំងមានអភ័យឯកសិទ្ធិសភា នៅពន្ធនាគារត្រពាំងផ្លុង ខេត្តត្បូងឃ្មុំ កាលពីដើមខែកញ្ញានេះ ដោយចោទថា មានទោសក្បត់ជាតិ។
ករណីនេះ ក្រុមមេធាវីការពារក្តី លោក កឹម សុខា បានប្តឹងជំទាស់ទៅសាលាឧទ្ធរណ៍ ដោយថា ការបង្គាប់ឲ្យឃុំខ្លួនរបស់ចៅក្រមស៊ើបនៅសាលាដំបូង បានរំលោភអភ័យឯកសិទ្ធិសភា។
ប៉ុន្តែ នៅក្នុងសវនាការសួរដេញដោល នៅសាលាឧទ្ធរណ៍ នាព្រឹក ថ្ងៃទី២៦ ខែកញ្ញានេះ គេមិនឃើញ វត្តមាន លោក កឹម សុខា ដែលជាជនត្រូវចោទនោះទេ ដោយសមត្ថកិច្ចពាក់ព័ន្ធអះអាងថា ការមិនបានបញ្ជូនលោក កឹម សុខា មកសវនាការ ដោយសារបារម្ភពីសន្តិសុខសង្គម។
មេធាវីមួយរូប គឺលោក ហែម សុជាតិ ដែលការពារលោក កឹម សុខា បានថ្លែងប្រាប់អ្នកសារព័ត៌មាន ក្រោយពីដើរចេញពីបន្ទប់សវនាការថា ដំណាក់កាលសភាស៊ើបសួរនៃសាលាឧទ្ធរណ៍ ចៅក្រមអះអាងថា មិនតម្រូវឲ្យមានវត្តមានជនត្រូវចោទនោះទេ ដោយថា ខ្លាចអសន្តិសុខសង្គម។ ករណីនេះ លោក សុជាតិ មានប្រសាសន៍ថា សភាស៊ើបសួរសម្រេចបន្តនីតីវិធី បើទោះជា ក្រុមមេធាវីការពារក្តីឲ្យលោក កឹម សុខា បានដើរចេញពីបន្ទប់សវនាការក៏ដោយ។
លោក ហែម សុជាតិ យល់ថា ការសម្រេចបន្តនីតិវិធីរបស់សាលាឧទ្ធរណ៍ ជាការរំលោភច្បាប់ និងធ្វើឲ្យមានភាពអយុត្តិធម៌ដល់កូនក្តី។
លោកថ្លែងថា៖ «ដំណើរការនីតិវិធីមួយ ដែលមានយុត្តិធម៌តាមច្បាប់អន្តរជាតិ គឺវត្តមានរបស់ជនត្រូវចោទ នៅចំពោះមុខក្រុមប្រឹក្សាជំនុំជម្រះជាសភាស៊ើបសួរក្តី គឺមានសារៈសំខាន់ណាស់ ពីព្រោះគាត់និងឆ្លើយដោះសារ តើគាត់បានធ្វើអ្វីខ្លះ តើអំពើរបស់គាត់ដែលបានធ្វើនោះ ជាបទល្មើសឬមិនមែនជាបទល្មើស តើលក្ខខណ្ឌអ្វីខ្លះដែលអាចឲ្យគាត់នៅក្រៅឃុំបាន នេះជាហេតុផលសំខាន់បំផុតដែលត្រូវតែមានវត្តមាន របស់កូនក្តី កាលណាតុលាការរំលោភនីតិវិធីទៅហើយ ដំណាក់កាលបន្តបន្ទាប់តទៅទៀតនៃចំណាត់ការរបស់តុលាការ ខ្ញុំមិនសង្ឃឹមថានឹងមានយុត្តិធម៌ចំពោះកូនក្តីរបស់ខ្ញុំទេ»។
សាលាឧទ្ធរណ៍បានចេញសេចក្តីប្រកាសព័ត៌មាននៅថ្ងៃទី២៦ ខែកញ្ញានេះ លើបណ្តឹងឧទ្ធរណ៍ប្រឆំាងនឹងដីកាសម្រេចឃុំខ្លួន លោក កឹម សុខា ដោយបង្ហាញការសោកស្តាយចំពោះមេធាវីការពារក្តីឲ្យមេបក្សប្រឆំាងរូបនោះដើរចេញពីបន្ទប់សវនាការដោយមិនបានលើកពីមួលហេតុ។
សាលាឧទ្ធរណ៍បានច្រានចោលការបកស្រាយរបស់មេធាវី ដែលថាតុលាការធ្វើឲ្យប៉ះពាល់ដល់សិទ្ធិជនត្រូវចោទ ខណៈមិនបញ្ជូនលោក កឹម សុខា ចូលតតំាងក្តីនៅក្នុងតុលាការថ្ងៃនេះ។ តុលាការជាន់ខ្ពស់នេះបញ្ជាក់ថា សំណុំរឿងនេះ ជាសំណុំរឿងមុនអង្គសេចក្តី មិនមែនសំណុំរឿងអង្គសេចក្តី ដែលចំាបាច់ត្រូវមានជនជាប់ចោទទេ។ «ក្នុងដំណាក់កាលស៊ើបសួរឈ្មោះ កឹម សុខា មានឋានៈជាជនត្រូវចោទនៅឡើយ ដូច្នេះការលើកយកមាត្រា៣០០និងមាត្រា៣០៥នៃក្រមព្រហ្មទណ្ឌរបស់ក្រុមមេធាវីការពារក្តីឲ្យឈ្មោះ កឹម សុខា ដើម្បីទាមទារឲ្យមានវត្តមានជនត្រូវចោទក្នុងសវនាការ គឺជាការយល់ច្រឡំធ្ងន់ធ្ងរ ព្រោះមាត្រានេះចែងមានន័យទាក់ទងនឹងជនជាប់ចោទ ដូច្នេះការលើកឡើងរបស់មេធាវីនេះហាក់បែរជាទទួលស្គាល់ថា លោក កឹម សុខា គឺជាជនជាប់ចោទ»។
ទោះជាយ៉ាងណា មេធាវី ហែម សុជាតិ អះអាងទៀតថា លោកនិងពិភាក្សាជាមួយក្រុមមេធាវី ដើម្បីរៀបចំឯកសារប្តឹងសាទុក្ខ ទៅតុលាការកំពូល ដើម្បីជំទាស់ទៅនឹងនីតិវិធីរបស់សាលាឧទ្ធរណ៍បន្តទៀត។ ប៉ុន្តែលោក មិនបានបញ្ជាក់ពីពេលវេលាច្បាស់លាស់នោះទេ។
បើទោះជារដ្ឋាភិបាល អះអាងថា ការចាប់ខ្លួនលោក កឹម សុខា ជាវិធានការច្បាប់ក៏ដោយ ប៉ុន្តែសហគមន៍អន្តរជាតិ ដែលប្រកាន់លទ្ធិប្រជាធិបតេយ្យ មានសហភាពអឺរុប បារាំង និងសហរដ្ឋអាមេរិកផងនោះ បានហៅចំណាត់ការចាប់ខ្លួននេះថា ជាការគាំរាមកំហែងផ្នែកនយោបាយ និងទាមទារឲ្យដោះលែងជាបន្ទាន់ ដោយថា ដើម្បីធានាការបោះឆ្នោតជ្រើសតាំងតំណាងរាស្ត្រឆ្នាំ២០១៨ខាងមុខ មានអព្យាក្រិត្យ ត្រឹមត្រូវ សេរី និងយុត្តិធម៌៕
