ធនាគារពិភពលោក (World Bank) ជំរុញឲ្យរដ្ឋាភិបាលកម្ពុជា ក៏ដូចជារដ្ឋាភិបាលនៃប្រទេសនៅក្នុងតំបន់អាស៊ីបូព៌ាផ្សេងៗទៀត ឲ្យបង្កើនសេវាសាធារណៈដល់ប្រជាជនក្រីក្រ បានប្រើប្រាស់ដើម្បីពួកគេមានលទ្ធភាពរកការងារធ្វើនិងជួយដល់សេដ្ឋកិច្ចជាតិ។
ក្នុងពិធីផ្សព្វផ្សាយរបាយការណ៍សិក្សាពីប្រជាជនក្រីក្រក្នុងទីក្រុងភ្នំពេញកាលពីម្សិលមិញលោកស្រី ជូឌី បេគ័រ អ្នកឯកទេសដឹកនាំផ្នែកការងារទីក្រុងរបស់ធនាគាពិភពលោក និងជាអ្នកដឹកនាំធ្វើរបាយការណ៍នេះ មានប្រសាសន៍ថា ជាការចាំបាច់ដែលត្រូវបង្កលក្ខណៈងាយស្រួលឲ្យប្រជាជនក្រីក្របានប្រើប្រាស់សេវាសាធារណៈ ដើម្បីជួយជំរុញឲ្យពួកគេមានលទ្ធភាពក្នុងការទទួលបានការងារធ្វើ ហើយជួយដល់សេដ្ឋកិច្ចជាតិ។
របាយការណ៍ធនាគារពិភពលោកបង្ហាញថា ប្រជាជនប្រហែល២៥០លាននាក់នៅក្នុងតំបន់អាស៊ីបូព៌ា និងប៉ាស៊ីហ្វិក គិតចាប់ពីប្រទេសចិន ដល់ឥណ្ឌនេស៊ី កម្ពុជា និងប៉ាពូញូហ្គីនី កំពុងតែរស់នៅតំបន់មិនរៀបរយក្នុងតំបន់ទីក្រុងភាគច្រើនគឺរស់នៅក្នុងភាពក្រីក្រ។ របាយការណ៍បន្តថា ពួកគេមានលទ្ធភាពតិចតួចជាងគេក្នុងការទទួលបាននូវសេវាកម្មនានា ការងារធ្វើ ព្រមទាំងប្រឈមនឹងហនិភ័យខ្ពស់នៃគ្រោះមហន្តរាយ៕