រដ្ឋមន្ត្រីក្រសួងមហាផ្ទៃជំរុញទៅស្ថាប័នពាក់ព័ន្ធបង្កើនការចុះផ្សព្វផ្សាយនិងទប់ស្កាត់ករណីគ្រោះថ្នាក់ចរាចណ៍បន្ថែមទៀត ខណៈរបាយការណ៍របស់គណៈកម្មាធិការជាតិសុវត្ថិភាពចរាចរណ៍ផ្លូវគោក បង្ហាញថា អ្នកស្លាប់និងរបួសដោយសារករណីនេះ មានចំនួនច្រើននៅឡើយ។
ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោក ស ខេង បានជំរុញទៅមន្ត្រីពាក់ព័ន្ធ ឲ្យបង្កើនសកម្មភាពចុះផ្សព្វផ្សាយស្តីពី «ករណីគ្រោះថ្នាក់ចរាចរណ៍» ដល់ប្រជាពលរដ្ឋកាន់តែច្រើនបន្ថែមទៀត ពិសេសអ្នកដែលបើកបរម៉ូតូមិនគោរពច្បាប់។ នេះបើយោងការចុះផ្សាយរបស់ អគ្គស្នងការដ្ឋាននគរបាលជាតិ កាលពីថ្ងៃពុធម្សិលមិញ។
ការថ្លែងរបស់លោក ស ខេង បែបនេះធ្វើឡើងនៅក្នុងកិច្ចប្រជុំមួយស្តីពី «ការបូកសរុបលទ្ធផលការងារសុវត្ថិភាពចរាចរណ៍ផ្លូវគោក» ប្រចាំត្រីមាសទី៣ កាលពីល្ងាចថ្ងៃទី១៨ ខែតុលា នៅទីស្តីការក្រសួងមហាផ្ទៃ។
របាយការណ៍របស់គណៈកម្មាធិការជាតិសុវត្ថិភាពចរាចរណ៍ផ្លូវគោក បានបង្ហាញថា ករណីគ្រោះថ្នាក់ចរាចរណ៍ នាត្រីមាសទី៣ក្នុងឆ្នាំ២០១៧នេះ មានចំនួន៨២៤លើក បណ្តាលឲ្យមនុស្ស៤២៦នាក់ស្លាប់ និងជាង១០០០នាក់ទៀតរងរបួស។
គួរំលឹកផងដែរ កាលពីថ្ងៃទី២៨ ខែកញ្ញា លោក ស ខេង និងអង្គការសហប្រជាជាតិសម្រាប់តំបន់អាស៊ីប៉ាស៊ីហ្វិក ប្តេជ្ញាសហការកាត់បន្ថយចំនួនអ្នកស្លាប់និងរបួស ដោយសារករណីគ្រោះថ្នាក់ចរាចរណ៍ឲ្យបាន៥០ភាគរយនៅដំណាច់ឆ្នាំ២០២០ខាងមុខនេះ។
ម៉ាប់ ស៊ុយ [email protected]