ការប្រកួតក្នុងវគ្គជម្រុះ១៦នាក់យក៨របស់ប៉ុស្ដិ៍លេខ៥ នៅសង្វៀនព្រែកកំពិស កាលពីថ្ងៃទី១១ វិច្ឆិកា កីឡាករ រិន សារ័ត្ន ដែលត្រូវគេស្គាល់ថាជាជើងខ្លាំងម្នាក់ បានធ្លាក់ហាលអាវគួរអោយសោកស្ដាយ ដោយលោកបានសម្រេចចិត្តបោះបង់ការប្រកួតត្រឹមទឹកទី១ ហើយមិនព្រមបន្តការប្រកួតបន្តទៅទៀត។
លោកបានពន្យល់ហេតុផលនៃការបោះបង់ថា គឺបណ្ដាលមកពីលោកមានរបួសក្នុងការប្រកួតអន្តរជាតិជាមួយកីឡាករភូមា ហើយទទួលបរាជ័យដោយបន្សល់នូវស្នាមរបួសខ្ទាំជើងជើងក្នុង។ កីឡាករ រិន សារ័ត្ន បានបញ្ជាក់ក្រោយការបោះបង់ការប្រកួតក្រោមដៃកីឡាករ គឹម វាសនា ដែលបានឡើងទៅវគ្គ៨នាក់នាថ្ងៃនោះ បានអះអាងថាហេតុផលដែលលោកសម្រេចចិត្តមិនតការប្រកួតជាមួយ បន្ទាប់ពីត្រូវកីឡាករ គឹម វាសនា ទាត់ត្រូវជើង គឺដោយសារតែលោកមានរបួសខ្ទាំឆ្អឹងធ្ងន់ធ្ងរគួរសមមិនទាន់បាត់ ក្នុងពេលដែលលោកបានឡើងទៅប្រកួតជាមួយកីឡាករម្ចាស់ផ្ទះគឺកីឡាករមីយ៉ាម៉ា។
លោកថាកាលពីយប់ថ្ងៃទី៤ វិច្ឆិកា លោកត្រូវបានគណៈកម្មការប្រដាល់ក្បាច់គុនសេរីជ្រើសអោយចេញប្រកួតជាតំណាងកីឡាករកម្ពុជាទៅកាន់ប្រទេសមីយ៉ាន់ម៉ា ហើយបានឡើងប្រកួតជាមួយកីឡាករម្ចាស់ផ្ទះតែម្ដង
ដោយការប្រកួតនាយប់នោះគឺជាការប្រកួតសន្សំឈានឡើងទៅប្រកួតក្នុងវគ្គបន្តផងដែរ ប៉ុន្តែដោយសារតែលោកចាញ់ទើបបានត្រឹមធ្លាក់ហាលអាវ។
លោកថាការប្រកួតនៅក្នុងប្រទេសមីយ៉ាន់ម៉ានោះ លោកត្រូវកីឡាករម្ចាស់ផ្ទះវាយអោយបោះបង់ការប្រកួតក្នុងទឹកទី៣ ហើយមុនការបរាជ័យ គឺលោកត្រូវកីឡាករមីយ៉ាន់ម៉ាទាត់ឡើងខូចជើងដោយខ្ទាំឆ្អឹងជើងខាងក្នុងតែម្ដង
នៅផ្នែកខាងស្ដាំ។ ស្ថានភាពរបួសនៅក្នុងពេលនោះ បានបណ្ដាលអោយជើងស្ដាំរបស់លោកមានរបួស ហើយសរសៃត្រង់កន្លែងដែលរងរបួសក៏រមួលប៉ោងក្នុងពេលប្រកួតនោះដែរទើបលោកសម្រេចចិត្តបោះបង់។
អ៊ីចឹងហើយទើបលោកមិនអាចបន្តការប្រកួតសម្រាប់ព្រឹត្តិការណ៍អន្តរជាតិនោះបាន ដោយសារតែការប្រកួតមួយលើកដំបូងជាមួយកីឡាករមីយ៉ាន់ម៉ា ក័៏ចាញ់ហាលតែអាវតែម្ដង។ លោកទើបតែមកដល់ប្រទេសកម្ពុជាកាលពីយប់ថ្ងៃទី៥ វិច្ឆិកា ប៉ុណ្ណោះ ដោយការសម្រាកព្យាបាលជើងរបួសក៏មិនសូវបានច្រើនដែរ ក៏ត្រូវដល់ថ្ងៃឡើងប្រកួតជាមួយកីឡាករ គឹម វាសនា ក្នុងវគ្គ១៦នាក់ជ្រើសយក៨នាក់ សម្រាប់សប្ដាហ៍ទី២នៅប៉ុស្ដិ៍លេខ៥។
លោកសារភាពថាហេតុផលដែលលោកបន្តការប្រកួតមិនរួចជាមួយកីឡាករ គឹម វាសនា បង្គោលខៀវមិនដល់ទឹកទី២ គឺដោយសារតែលោកក្នុងពេលលោកទាត់បំបុកប៉ះជើងជាមួយកីឡាករបង្គោលខៀវ ក៏ប៉ះចំកន្លែងរបួសចាស់ហើយបណ្ដាលអោយចុករោទិ៍តែម្ដង ទើបលោកសម្រេចចិត្តបោះបង់។
លោកនិយាយថា «ជើងខ្ញុំនៅខ្ទាំអត់ទាន់បាត់ទេ តែដោយសារតែការប្រកួតជម្រុះរបស់ខ្ញុំគឺដល់ក្នុងថ្ងៃ១១ វិច្ឆិកា ហ្នឹងទើបខ្ញុំត្រូវតែឡើងប្រកួត គឺមិនអាចលើកពេលទេ ដោយសារតែការប្រកួតនៅប៉ុស្ដិ៍លេខ៥គឺជាការប្រកួតវិលជុំដែលមិនអាចប្ដូរកាលបរិច្ឆេទ!»។
លោកនិយាយថាក្រោយពេលសម្រាកថែទាំជើងមួយរយៈ លោកគិតថាបញ្ហារបួសបានធូរស្រាលហើយ
ប៉ុន្តែនៅពេលមានការប៉ះទង្គិចត្រង់កន្លែងរបួសចាស់ជាទម្ងន់ ទើបបណ្ដាលអោយឆ្អឹងជើងរបស់លោករមួលជាថ្មី
ហើយសូម្បីតែឈរក៏លែងនឹងមិនអាចបន្តការប្រកួតបាន។
លោកសារភាពបណ្ដាលមកពីលោកចេញទៅប្រកួតជាមួយជនជាតិភូមាកាលពីថ្ងៃទី៤ វិច្ឆិកា ទើបជាមូលហេតុដែលនាំអោយលោកមានរបួសជើងហើយឈានមកបរាជ័យសម្រាប់ការប្រកួតជម្រុះដ៏សំខាន់មួយនេះនៅប៉ុស្ដិ៍លេខ៥។ លោកសម្ដែងការសោកស្ដាយ តែលោកក៏មិនអាចបោះការអញ្ជើញរបស់គណកម្មការរៀបចំការប្រកួតអន្តរជាតិដែលបានរៀបចំនៅប្រទេសភូមានោះដែរ ដោយលោកបានចាត់ទុកថាទោះជាត្រូវបាត់បង់ការប្រកួតបន្តទាំងនៅភូមានិងនៅប៉ុស្ដិ៍លេខ៥ នឹងជួយអោយបើកមុខអោយលោកបានចេញទៅប្រកួតនៅក្រៅប្រទេសជាថ្មីម្ដងទៀតដែលមានឱកាសទទួលបានតម្លៃខ្លួនខ្ពស់នោះផង។
លោកនិយាយថា «ការពិតជាខ្ញុំអត់ត្រូវទទួលប្រកួតនៅប្រទេសភូមាហ្នឹងទេ ដោយសារវាកៀកនឹងការប្រកួតជម្រុះនៅប៉ុស្ដិ៍លេខ៥ ប៉ុន្តែខ្ញុំថាបើអត់ទទួលគឺមិនខុសពីបោះបង់ឱកាសនោះទេ ហើយបើគណៈកម្មការខាងអន្តរជាតិហ្នឹងហៅយើងម្ដងអត់ទៅក៏មិនដឹងថាគេហៅទៀតឬអត់ដែរ!»។
លោកថាក្នុងពេលខាងមុខ គណៈកម្មការអន្តរជាតិដែលស្នើអោយលោកចេញប្រកួតនៅក្នុងប្រទេសភូមា
នឹងដាក់អោយលោកប្រកួតបែបហ្នឹងម្ដងទៀត ដោយគ្រាន់តែមិនទាន់ដឹងថាត្រូវប្រកួតជាមួយកីឡាករបរទេសរូបណានិងនៅក្នុងប្រទេសណាមួយប៉ុណ្ណោះ។ សម្រាប់ការប្រកួតនៅក្រៅប្រទេសលោកថាគឺជាលើកទី១
ដោយការប្រកួតនោះគឺទោះជាប្រកួតចាញ់ក៏ទទួលបានតម្លៃខ្លួន៥០០ដុល្លារ ខណៈដែលការចំណាយផ្សេងៗគឺគណៈកម្មការបរទេសជាអ្នករ៉ាប់រង ដែលមិនខុសពីបានស្គាល់ស្រុកគេផង និងបានតម្លៃខ្លួនខ្ពស់ផង។
លោកថាការប្រកួតនេះបើឈ្នះទទួលបានទឹកប្រាក់១ពាន់ដុល្លារ ហើយលោកបញ្ជាក់ថាបើទោះជាត្រូវបាត់បង់ឱកាសដណ្ដើមយកកៅអីវគ្គ៨នាក់ ព្រោះតែរបួសជើងក៏លោករំពឹងថាក្រោយផុតកុងត្រាប្រកួតនៅប៉ុស្ដិ៍លេខ៥ព្រោះតែត្រូវហាលអាវនេះ គឺពិតជាទីផ្សារចេញក្រៅជាលើកទី២។
លោក សេង កដិកា អ្នករៀបចំការប្រដាល់ប្រចាំនៅប៉ុស្ដិ៍លេខ៥ និយាយថាការប្រកួតកាលពីថ្ងៃទី១១ វិច្ឆិកា
គឺការប្រកួតជម្រើសយកជើងខ្លាំងក្នុងចំណោមអ្នកឈ្នះដែលបានឈានឡើងទាំង១៦នាក់ ដើម្បីបន្តជម្រុះអោយសល់តែ៨នាក់សម្រាប់ជុំបន្ទាប់។
ការប្រកួតនៅក្នុងវគ្គនោះលោកមានកីឡាករ៤នាក់បានឡើងប្រកួតគ្នា ដោយកីឡាករ សំអាង ឌុន មកពីក្លិបអេភូថងកីឡា បានឡើងទៅវគ្គ៨នាក់ ដោយសារតែបានផ្ដួលកីឡាករ រិទ្ធ មុន្នី មកពីក្លិបមកុដរាជសីហ៍ ក្នុងទឹកទី១ដូចគ្នា។
យ៉ាងណាមិញ លោកចាត់ទុកថាជ័យជម្នះរបស់កីឡាករ សំអាង ឌុន គឺជារឿងចៃដន្យប៉ុណ្ណោះ បើធៀបនឹងការប្រកួតរបស់កីឡាករ រិន សារ័ត្ន និងកីឡាករ គឹម វាសនា។
លោកថាកីឡាករដែលត្រូវឡើងប្រកួតទាំងអស់គ្រាន់តែមានកុងត្រាជាមួយការប្រកួត ថាត្រូវតែមានមុខឡើងប្រកួតតាមកាលបរិច្ឆេទប៉ុណ្ណោះ តែសម្រាប់បម្រាមហាមមិនអោយទៅប្រកួតនៅលើសង្វៀនណាផ្សេងដែលនាំអោយប៉ះពាល់ដល់សមត្ថភាពប្រកួតនៅប៉ុស្ដិ៍លេខ៥គឺលោកមិនអាចរារាំងកីឡាករណាម្នាក់បានទេ ក្នុងពេលដែលអ្នកមានឈ្មោះត្រូវប្រកួតដណ្ដើមជើងឯកទាំងអស់ សុទ្ធតែគ្មានប្រាក់ខែក្នុងរយៈពេលប្រកួត ដែលមិនអាចចងជាងពួកគេបាន។
ប៉ុន្តែលោកថាសម្រាប់កីឡាករណាម្នាក់ដែលចង់បានលុយ ហើយមិនគិតពីផលប៉ះពាល់គឺរមែងទទួលរងនូវផលអាម៉ាស់ ដូចជាករណី កីឡាករ រិន សារ័ត្ន ដែលជាកីឡាករល្អម្នាក់ ហើយទីបំផុតគឺដោយសារតែមានរបួសជើងដែលសល់ពីការប្រកួតនៅក្នុងប្រទេសភូមានោះដែរ។ លោកអះអាងថាការប្រកួតជម្រុះរបស់ប៉ុស្ដិ៍លេខ៥
គឺកីឡាករដែលចេះថែទាំកម្លាំង និងប្រឹងប្រកួតបានល្អគឺនឹងមានការឈានឡើង ផ្ទុយទៅវិញបើកីឡាករណាចេះតែទទួលប្រកួតប៉ាតណាប៉ាណី ដោយមើលស្រាលការប្រកួតជម្រុះរបស់សង្វៀនលោក គឺនឹងធ្លាក់ហាលអាវមិនខុសពីករណី កីឡាករ រិន សារ័ត្ន ដែលលោកជាកីឡាករល្អនិងមិនគួរចាញ់។
លោកអះអាងថាការប្រកួតជម្រុះ១៦នាក់យក៨នាក់ ជម្រើសបាន២នាក់ហើយកាលពីមុនអុំទូក ដោយការជម្រើសជាប់ធ្លាក់កាលពីថ្ងៃទី១១ វិច្ឆិកា គឺមានន័យថារើសបាន៤នាក់ហើយក្នុងចំណោម៨នាក់។ លោកថាការប្រកួតតាមរូបមន្តចាញ់ធ្លាក់ៗ កាន់តែធ្វើអោយកីឡាករដែលប្រឹងប្រែងទទួលបានលទ្ធផលជាវិជ្ជមាន ហើយកីឡាករដែលមើលស្រាលសម្រាប់ការប្រកួតមួយនេះ គឺធ្លាក់យ៉ាងអាម៉ាស់ដោយសារតែអ្នកប្រឹងប្រែងអត់មានការប្រកួតលាក់បច្ចេកទេសធ្វើអោយគណៈកម្មការពិបាកកាត់ក្ដី៕
