សកម្មជនបរិស្ថាន អះអាងថា ខណៈពេលស្ថានការណ៍នយោបាយកំពុងតែមានភាពតានតឹង បទល្មើសព្រៃឈើនៅតំបន់មួយចំនួនក៏បានកើនឡើងខ្លាំងដែរ ដោយថា អាជ្ញាធរពុំបានទប់ស្កាត់ឲ្យមានប្រសិទ្ធភាពនោះទេ។
បណ្តាញនិសិត្សឯករាជ្យដែលធ្វើការការពារបរិស្ថាន និងប្រឆាំងការជួញដូរឈើខុសច្បាប់ លោក ហេង ស្រស់ ឲ្យដឹងថា រយៈពេលប៉ុន្មានខែចុងក្រោយនេះ សកម្មភាពកាប់ឈើ និងដឹកជញ្ជូនឈើខុសច្បាប់ពីតំបន់ព្រៃឡង់ ព្រៃព្រះរកា និងតំបន់ផ្សេងទៀត ត្រូវបានលោកកត់សម្គាល់ឃើញថា កើនឡើង។
លោកបន្ថែមថា៖ «បើតាមពួកខ្ញុំចុះតាមដាន មើលទៅរូបភាពនៃការកាប់ឈើខុសច្បាប់ទាំងអស់ហ្នឹង មិនមានការកាត់បន្ថយទេ វាមានតែកើតឡើងលើសដើមថែមទៅទៀត។ បើតាមខ្ញុំដឹងហ្នឹង គឺវាមានច្រើនករណី មានការដឹកចេញពីព្រៃដោយឲ្យប្រជាពលរដ្ឋហ្នឹងជាអ្នកចូលកាប់ ហើយដឹកយកមកចែកចាយតាមដេប៉ូនានានៅក្នុងប្រទេសកម្ពុជា។ មួយទៀតការដឹកលក្ខណៈទ្រង់ទ្រាយធំនោះ គឺការចេញរថយន្តកុងតឺន័រយីឌុប ឆ្លងដែនទៅប្រទេសជិតខាង ហើយតំបន់ដែលបទល្មើសកើតឡើងខ្លាំងជាងគេ គឺនៅព្រៃព្រះរកា»។
តំណាងសហគមន៍ព្រៃព្រះរកាក្នុងខេត្តព្រះវិហារ អ្នកស្រី រឿន ខាន់ បានឲ្យដឹងថា ការឃុបឃិតគ្នាប្រព្រឹត្តិអំពើពុលរលួយរវាងជនល្មើស និងអាជ្ញាធរនៅតំបន់ព្រៃព្រះរការ គឺជាមូលហេតុនៃកំណើនបទល្មើសព្រៃឈើនៅទីនោះ។
អ្នកស្រីបន្ថែមថា៖ «ពួកមន្រ្តីប៉ូលីស ប៉េអឹមខ្លះ គេមានលេខអ្នកកាប់ឈើ ហើយគេស៊ីញ៉ូគ្នាដូចថា ពេលសហគមន៍ចូលព្រៃ គេប្រាប់មុខហើយថា កុំឲ្យដឹក កុំឲ្យចូលព្រៃ ចាំសហគមន៍ចេញចូលភូមិវិញ ចាំទៅអាទៀត។ អញ្ចឹងគិតមើលៗ បើធ្វើតែបែបនេះ ការពារអត់បានទេព្រៃព្រះរកានេះនោះ។ ប្រសិនយើងស្រលាញ់ទាំងអស់គ្នា រួមកម្លាំងគ្នាទាំងប៉ូលីស ប៉េអឹម បរិស្ថាន និង សហគមន៍ធ្វើការរួមគ្នានោះ ទើបវាបានល្អ។ ប៉ុន្តែនេះអត់ទេ ដល់ពេលឯងចេញចូលភូមិវិញ គេដឹកឈើឡើងគគ្រឹកគគ្រេងដល់ពេលសួរថា ពូឯងដឹកឈើអត់ជួបសមត្ថិកិច្ចទេអី?គេឆ្លើយថា ជួប ប៉ុន្តែបង់លុយឲ្យ បង់តាំងពីខេត្តអស់ហើយ»។
ប្រធានមន្ទីបរិស្ថានខេត្តព្រះវិហារ លោក អៀ សុខា ទទួលស្គាលថា បទល្មើសព្រៃឈើនៅព្រៃព្រះរកា គឺនៅតែបន្តកើតមានពិតមែន ប៉ុន្តែ មិនមានច្រើនដូចកាលពីមុននោះទេ។
លោកបន្ថែមថា៖ «ការកាប់ឈើហ្នឹង បើយើងប្រៀបពីមុនវិញ ពីមុនវាមានការកាប់ច្រើន តែឥលូវហ្នឹង វាថយដោយគ្រាន់តែថា ឲ្យបាត់ទាំងស្រុង វាអត់ទាន់បាត់ទេ ដោយសារមន្រ្តីយើង វាមានចំនួនតិច និងមានការបង្ករបួសស្នាមមកលើមន្រ្តីយើង រហូតបែកក្បាល និងធ្លាយសៀតផ្កាទៀត។ ដោយឥលូវហ្នឹងជនល្មើស វារាងកាចសាហាវតិច ដោយសារស្ថានការណ៍នយោបាយ និងដោយសារមានអ្នករៀបចំនៅពីក្រោយនៃបញ្ហាហ្នឹងផង»។
ចំណែកនៅខេត្តឧត្តមានជ័យឯនោះវិញ ក៏មានបទល្មើសព្រៃឈើកើនឡើងដែរ ដោយសហគមន៍ព្រៃឈើនៅទីនោះអះអាងថា រយៈពេល ៣ខែចុងក្រោយនេះ មានការដឹក និងកាប់ឈើខុសច្បាប់ជាបន្តបន្ទាប់។
ប្រធានព្រៃសហគមន៍សង្ឃរុក្ខវ័ន្ត ក្នុងខេត្តឧត្តមានជ័យ ព្រះអង្គ ប៊ុន សាលួត មានសង្ឃដីកាថា ខណៈពេលព្រះអង្គ និងរដ្ឋបាលព្រៃឈើខេត្ត ចុះល្បាតព្រៃសហគមន៍ប៉ុន្មានថ្ងៃមកនេះ បានជួបបទល្មើសព្រៃឈើជាច្រើនករណី និងឃាត់បានឧបករណ៍កាប់ឈើរបស់ជនល្មើសមួយចំនួនផងដែរ។
ក្នុងវេទិកាជាតិ «ស្តីពីការការពារ និងអភិរក្សធនធានធម្មជាតិ» ក្នុងរាជធានីភ្នំពេញ កាលពីថ្ងៃទី២២ ខែសីហា លោកនាយករដ្ឋមន្ត្រី ហ៊ុន សែន បានរំឭទៅមន្ត្រីរបស់លោក ឲ្យពង្រឹងប្រសិទ្ធភាព ទប់ស្កាត់បទល្មើសព្រៃឈើ ដោយថា ការបណ្តោយឲ្យមានការកាប់បំផ្លាញព្រៃឈើ លោកថា «ស្មើកាប់ក្បាលរបស់លោក»។
លើសពីនេះទៀត លោក ហ៊ុន សែន ក៏បានបញ្ជាឲ្យស្រង់ឈ្មោះមន្ត្រីខិលខូច និងឧកញ៉ាមួយចំនួន ដែលលោកថា ជួយកសាងបន្តិចបន្តួច តែបែរជាសម្ងំលាក់ខ្លួន ធ្វើជាឧក្រិដ្ឋជនបំផ្លាញព្រៃនៅតាមខេត្តមួយចំនួនទៅវិញ៕