មេដឹកនាំកម្ពុជា ដែលកាន់អំណាចជាង ៣០ឆ្នាំមកហើយនោះ បានបញ្ចេញប្រតិកម្មធ្ងន់ៗចំពោះអ្នកប្រដូចរូបលោក ទៅនឹងមេដឹកនាំផ្ដាច់ការម្នាក់នៅតំបន់អាហ្វ្រិក ដែលទើបតែត្រូវបានទម្លាក់ពីអំណាចនាពេលថ្មីៗនេះ។
ប្រធានាធិបតីហ្ស៊ីបាវ៉េ លោក រ៉ូប៊ឺត មូហ្កាបេ ត្រូវបានគេចាត់ទុកជាមេដឹកនាំផ្ដាច់នៅទ្វីបអាហ្វ្រិក ដែលបានកាន់តំណែងរហូតដល់លោកអាយុ ៩៣ឆ្នាំ មុននឹងលោកត្រូវបានក្រុមយោធាទម្លាក់ពីអំណាចកាលពីថ្ងៃទី១៥ ខែវិច្ឆិកានេះ។
ខណៈដែលមេដឹកនាំផ្ដាច់ការរូបនេះ ត្រូវបានទម្លាក់ពីអំណាចនោះ អតីតមេដឹកនាំបក្សប្រឆាំងកម្ពុជា លោក សម រង្ស៊ី បានបង្ហោះសារនៅលើទំព័រហ្វេសប៊ុករបស់លោកថា ពលរដ្ឋកម្ពុជានឹងអបអរចំពោះការធ្លាក់ពីតំណែងរបស់លោក ហ៊ុន សែន ដែលត្រូវបានលោក សម រង្ស៊ី ហៅថា «ជនផ្ដាច់ការ» ផងដែរ។
ក្នុងពិធីជួបជាមួយក្រុមកម្មករនៅមជ្ឈមណ្ឌលកោះពេជ្រ កាលពីថ្ងៃអាទិត្យម្សិលមិញ លោកនាយករដ្ឋមន្ដ្រី ហ៊ុន សែន អះអាងថា ជោគវាសនារបស់លោក មិនដូចគ្នានឹងមេដឹកនាំហ្ស៊ីមបាវ៉េ លោក រ៉ូប៊ឺត ម៉ូហ្កាបេ នោះឡើយ ដោយថា រដ្ឋប្រហារទម្លាក់លោក ម៉ូហ្កាបេ គឺដោយសារតែលោកបានរៀបចំផែនការឲ្យភរិយាស្នងតំណែងបន្ដ។
លោក ហ៊ុន សែន ថ្លែងថា៖ «មានអាមួយនោះ មិនដឹងស្អីវា! ថ្ងៃមុន វាប្រកាសថា លោក ហ៊ុន សែន ធ្វើដូច មូហ្គាបេ។ បើ ហ៊ុន សែន ធ្វើដូច មូហ្គាបេ ខ្ញុំត្រូវធ្វើជាង ៣០ឆ្នាំទៀត អាហ្នឹងបានវាត្រូវ ព្រោះ មូហ្គាបេ អាយុ ៩៥ឆ្នាំ»។
ក្រោមការដឹកនាំរយៈពេល ៣៧ឆ្នាំ របបលោក រ៉ូប៊ឺត ម៉ូហ្កាបេ បានទទួលរងការថ្កោលទោសយ៉ាងខ្លាំងថា ពោរពេញដោយការកាប់សម្លាប់ជីវិតមនុស្សរាប់ពាន់នាក់ និងបង្ក្រាបលើអ្នកប្រឆាំងដោយឥតយោគយល់។ លោក ម៉ូហ្កាបេ ក៏រងការចោទថា បានប្រព្រឹត្តអំពើពុករលួយ បក្ខពួកនិយម និងបំពានច្បាប់ធ្ងន់ធ្ងរ។
លោក ហ៊ុន សែន ដែលសព្វថ្ងៃមានអាយុ ៦៥ឆ្នាំនោះ បានគ្រប់គ្រងកម្ពុជារយៈពេលជាង ៣ទស្សវត្សមកហើយ ចាប់ពីឆ្នាំ១៩៨៥មក។ លោក ហ៊ុន សែន ត្រូវបានការសែតអាមេរិក វ៉ាស៊ីងតោន ប៉ុស្តិ៍ ចាត់ចំណាត់ថ្នាក់ជាមេដឹកនាំកាន់អំណាចដ៏យូរបំផុត ក្នុងចំណោមមេដឹកនាំ ២៣រូបទៀត ដែលថា មិនព្រមចុះចេញពីតំណែង បើទោះជាមានបាតុកម្មទាមទារឲ្យលាលែង ឬពេលចាញ់ឆ្នោតក៏ដោយ។
កាសែតអាមេរិក ដដែលនេះ សរសេររិះគន់ថា កម្ពុជាក្រោមការគ្រប់គ្រងរបស់លោក ហ៊ុន សែន មានទាំងជោគជ័យ ភាពរីកចម្រើន ការភ័យខ្លាច និទណ្ឌភាព បក្ខពួកគ្រួសារនិយម និងអំពើពុករលួយ៕