អតីតគណបក្សប្រឆាំង បានសរសើរសមាជិកបក្សរបស់ខ្លួន ដែលមានភាពស្មោះត្រង់ការពារឆន្ទៈម្ចាស់ឆ្នោត ដោយថា មិនព្រមចុះញ៉មចំពោះការគំរាមកំហែង ខណៈដែលមេដឹកនាំបក្សកាន់អំណាចអំពាវនាវឲ្យចុះចូលម្ដងហើយម្ដងទៀត។
លោកនាយករដ្ឋមន្ត្រី ហ៊ុន សែន ដែលជាប្រធានគណបក្សប្រជាជនកម្ពុជាផងនោះ បានអំពាវនាវទៅមន្ត្រីជាប់ឆ្នោតរបស់អតីតគណបក្សសង្គ្រោះជាតិនៅទូទាំងប្រទេស ឲ្យចុះចូលជាមួយគណបក្សលោក ដោយលោកសន្យារក្សាតួនាទីរបស់ពួកគេដដែល ជាថ្នូរនឹងការចុះចូល។
ក្នុងលិខិតមួយច្បាប់ផ្ញើទៅសកម្មជនរបស់ខ្លួនកាលពីថ្ងៃម្សិលមិញនេះ ក្រុមមេដឹកនាំអតីតបក្សសង្គ្រោះជាតិ ដែលកំពុងរស់នៅនិរទេសខ្លួនឯងនៅឯក្រៅប្រទេសនោះ បានកោតសរសើរដល់ភាពស្មោះត្រង់របស់មន្ត្រីគណបក្សតាំងពីថ្នាក់ជាតិរហូតដល់ថ្នាក់ក្រោមជាតិ។
លិខិតដដែលនោះ បានអះអាងថា ក្រុមសកម្មជន និងមន្ត្រីអតីតបក្សប្រឆាំងនោះ មិនខ្លាច មិនតក់ស្លុត និងមិនរាថយនោះឡើយ នៅចំពោះមុខការគំរាមកំហែង ការបំភិតបំភ័យ ការលួងលោម និងការទិញទឹកចិត្តពីសំណាក់លោក ហ៊ុន សែន ដែលក្រុមមេដឹកនាំអតីតបក្សប្រឆាំងហៅថាជា «ជនផ្ដាច់ការ»។
ក្រុមមេដឹកនាំអតីតបក្សប្រឆាំង រៀបរាប់ក្នុងលិខិតនោះថា៖ «តំណាងរាស្ត្រ ក្រុមប្រឹក្សារាជធានី ខេត្ត ក្រុង ស្រុក ខណ្ឌ និងក្រុមប្រឹក្សាឃុំ សង្កាត់ របស់គណបក្សសង្គ្រោះជាតិ គ្មាននរណា ឬស្ថាប័នណា មានសិទ្ធិដកហូតបានទេ ដរាបណាមិនមានការបោះឆ្នោតដោយសេរី ត្រឹមត្រូវ និងយុត្តិធម៌»។
លើសពីនេះទៀត អតីតគណបក្សសង្គ្រោះជាតិនៅតែមានជំនឿថា នឹងមានឱកាសចូលរួមប្រកួតប្រជែងការបោះឆ្នោតឆ្នាំ២០១៨ ដោយថា សហគមន៍អន្តរជាតិមិនទុកឲ្យលោក ហ៊ុន សែន ដឹកនាំប្រទេសកម្ពុជា វិលថយក្រោយទៅរកអតីតកាលមុនឆ្នាំ១៩៩១វិញឡើយ។
ទោះជាយ៉ាងណា VOD មិនអាចសុំការបំភ្លឺបន្ថែមជុំវិញករណីនេះ ពីមន្ត្រីអតីតគណបក្សសង្គ្រោះបាននៅឡើយ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ច្រានចោលការចោទប្រកាន់ពីអតីតបក្សប្រឆាំង ហើយអះអាងថា សមាជិកក្រុមប្រឹក្សាឃុំសង្កាត់ប្រហែល ២២៥៦នាក់ បានចុះចូលជាមួយបក្សកាន់អំណចដោយស្ម័គ្រចិត្ត គិតត្រឹមថ្ងៃនេះ។
លោកមានប្រសាសន៍ថា៖ «និយាយពីលទ្ធភាពនៃការប្រកួតប្រជែងលើទីលានប្រជាធិបតេយ្យក្នុងបរិបទក្នុងប្រទេសកម្ពុជាអត់មានទេ។ ឥឡូវនេះ ថ្ងៃនេះ រដ្ឋសភាជាតិបានប្រកាសសុពលភាពរបស់គណបក្ស ដែលទទួលបានការបែងចែកអាសនៈនៅ គ.ជ.ប.រួចហើយ។ អញ្ចឹងមានស្រមោលអ្វីទៀតរបស់គណៈកម្មាធិការអចិន្ត្រៃយ៍របស់គណបក្សប្រឆំាងដែលត្រូវរំលាយហើយនោះ។ វាអត់មានទេ គ្រាន់ថាដើម្បីល្អមើលទេ ប៉ុន្តែ អត់ល្អស៊ីទេ»។
មន្ដ្រីជាន់ខ្ពស់នៃកម្មវិធីផ្នែកអង្កេតរបស់អង្គការខុមហ្វ្រែល លោក កន សាវាង្ស យល់ថា អតីតបក្សប្រឆាំងផ្ញើសារលួងចិត្តមន្ត្រីរបស់ខ្លួន ដើម្បីកុំឲ្យបែកបាក់ផ្ទៃក្នុងបក្ស ហើយមន្ត្រីមួយចំនួនដែលចុះចូលជាមួយបក្សកាន់អំណាច លោកថា ទំនងជារងសម្ពាធ ពីបក្សកាន់អំណាច។
មន្ត្រីសង្គមស៊ីវិលរូបនេះ ជឿជាក់ថា អតីតបក្សសង្គ្រោះជាតិអាចនឹងមានឱកាសប្រកួតប្រជែងការបោះឆ្នោតឆ្នាំ២០១៨ ក្រោមការជួយជ្រុំជ្រែងពីអន្តរជាតិ។
លោកថ្លែងថា៖ «ខ្ញុំយល់ឃើញថា អ្នកទំាងអស់នឹងអាចមានលទ្ធភាពវិលត្រឡប់មកស្ថានភាពនយោបាយវិញ ខ្ញុំសង្ឃឹមថា រដ្ឋាភិបាលលោកនឹងមានការជជែកចចារអំពីបញ្ហានេះ ហើយទម្លាក់ការចោទប្រកាន់ទំាងអស់នេះឡើងវិញ»។
សារព័ត៌មានស្និទ្ធនឹងរដ្ឋាភិបាល Fresh News បានចុះផ្សាយថា គិតត្រឹមថ្ងៃម្សិលមិញនេះ សមាជិកជាប់ឆ្នោតរបស់អតីតបក្សប្រឆាំងប្រហែល ២៧០០នាក់ហើយ បានចុះចូលជាមួយបក្សកាន់អំណាច ក្រោយពីបក្សនេះត្រូវបានរំលាយចោលកាលពីថ្ងៃទី១៦ ខែវិច្ឆិកានេះ៕