សម្ដេចសង្ឃ ប៉ាប ហ្វ្រង់ស៊ីស បានធ្វើដំណើរទៅក្រៅប្រទេសលើកទី២១កាលពីថ្ងៃម្សិលមិញនេះ នៅក្នុងដំណើរទស្សនកិច្ចទៅកាន់ប្រទេសភូមា និងបង់ក្លាដែស ប្រឆាំងទៅនឹងវិបត្តិជនភៀសខ្លួនរ៉ូហ៊ីងយ៉ា។ នេះដោយយោងតាមសេចក្ដីរាយការណ៍របស់ទីភ្នាក់ងារព័ត៌មាន AFP។
យន្តហោះដឹកសម្ដេចប៉ាប បានចាកចេញពីទីក្រុងរ៉ូមនៅម៉ោង ១០យប់ ឆ្ពោះទៅកាន់ទីក្រុងរ៉ង់ហ្គូន ដែលជាទីក្រុងធំរបស់ប្រទេសភូមា។
តាមផែនការ សម្ដេចប៉ាបនឹងធ្វើដំណើរទៅដល់ប្រទេសភូមានៅម៉ោង ៣ទាបភ្លឺ ព្រឹកថ្ងៃចន្ទនេះ ដោយសង្ឃឹមថា នឹងជួយលើកទឹកចិត្តដល់កិច្ចខិតខំប្រឹងប្រែងទប់ស្កាត់វិបត្តិមួយ ដែលត្រូវបានគេមើលឃើញថា ជនជាតិភាគតិចមូស្លីមរ៉ូហ៊ីងយ៉ា ត្រូវបានបង្ខំឲ្យចាកចេញពីផ្ទះសម្បែងរបស់ពួកគេនៅប្រទេសភូមា ចូលទៅក្នុងប្រទេសបង់ក្លាដែស។
ជនជាតិរ៉ូហ៊ីងយ៉ាប្រហែល ៦២ម៉ឺននាក់ហើយ បានរត់ភៀសខ្លួនចេញពីផ្ទះសម្បែងរបស់ពួកគេនៅរដ្ឋរ៉ាក់ឃីន ឆ្លងដែនចូលទៅក្នុងប្រទេសបង់ក្លាដែស គិតចាប់តាំងពីចុងខែសីហាកន្លងមក ដោយសារតែអំពើហិង្សាដែលអង្គការសហប្រជាជាតិ និងសហរដ្ឋអាមេរិក បានចាត់ទុកជា «ការបោសសម្អាតជាតិសាសន៍»។
ក្រុមជំនួយការសម្ដេចប៉ាប បាននិយាយថា សម្ដេចប៉ាប ហ្វ្រង់ស៊ីស នឹងព្យាយាមលើកទឹកចិត្តដល់ការផ្សះផ្សារ ការពិភាក្សា និងកិច្ចខិតខំប្រឹងប្រែងបន្ថែមទៀត ដើម្បីលុបបំបាត់វិបត្តិនោះ បន្ទាប់ពីភូមា និងបង់ក្លាដែសបានឈានទៅដល់ការឯកភាពគ្នា ដើម្បីអនុញ្ញាតឲ្យជនជាតិរ៉ូហ៊ីងយ៉ាវិលត្រឡប់ទៅផ្ទះសម្បែងរបស់ពួកគេវិញ៕
