គណបក្សប្រឆាំងដ៏ធំមួយ ដែលមានរចនាសម្ព័ន្ធដឹកនាំ ទាំងនៅថ្នាក់ជាតិ និងថ្នាក់ក្រោមជាតិ ជិតស្មើនឹងបក្សកាន់អំណាចដែរនោះ ត្រូវបានតុលាការកំពូលប្រកាសរំលាយកាលពីថ្ងៃទី១៦ ខែវិច្ឆិកា តាមបណ្តឹងរបស់ក្រសួងមហាផ្ទៃ និងគណបក្សតូចៗមួយចំនួនពីរទៀត។
សាលដីកានេះ ក្រៅពីបើកផ្លូវឲ្យរឹបអូសអាសនៈរបស់គណបក្សសង្គ្រោះជាតិនៅក្នុងសភា និងអាសនៈនៅឃុំសង្កាត់ តុលាការកំពូលក៏បានបង្គាប់មន្ត្រីរបស់បក្សប្រឆាំង ១១៨នាក់ មិនឲ្យធ្វើនយោបាយរយៈពេល ៥ឆ្នាំផងដែរ។
សាលដីកានេះ ហាក់ធ្វើឲ្យបក្សប្រឆាំងធ្លាក់ដល់ចំនុចសូន្យផ្នែកធនធានមនុស្ស ហើយក៏ពិបាកនឹងក្រោកឈរឡើងវិញ បើពួកគេចង់បង្កើតគណបក្សនយោបាយថ្មី ទៅប្រកួតប្រជែងការបោះឆ្នោតនៅពេលខាងមុខដ៏ខ្លី ដើម្បីប្រកួតជាមួយបក្សកាន់អំណាចឡើងវិញនោះ ។
ការរំលាយនេះ បើទោះបីជាតំណាងរាស្ត្របក្សកាន់អំណាច ធ្វើវិសោធនកម្មច្បាប់ដ៏ចម្រូងចម្រាសមួយចំនួនសម្រាប់រឹបអូសយកអាសនៈនេះក៏ដោយ ប៉ុន្តែ ជ្រុងមួយនៃបញ្ហាសង្គមបានកើតឡើងនោះ គឺអ្នកគាំទ្របក្សប្រឆាំងជិតពាក់កណ្តាលប្រទេស ស្រឡាំងកាំង និងឈឺចាប់ ទៅលើរបត់នយោបាយថ្មីនេះ។
សហគមន៍អន្តរជាតិនៃប្រទេសលោកសេរី ឯណោះវិញ មានសហរដ្ឋអាមេរិក សហភាពអឺរុប និងសហភាពអន្តរសភា IPU ដែលមានសមាជិក ១៧៣ប្រទេសជាដើម បានថ្កោលទោស លាយឡំ និងការគំរាមដាក់ទណ្ឌកម្មសេដ្ឋកិច្ច និងខ្លះទៀតគំរាមមិនទទួលស្កាល់លទ្ធផលបោះឆ្នោត បើរដ្ឋាភិបាលកម្ពុជា មិនធ្វើឲ្យស្ថានការនយោបាយវិលទៅរកស្ថានភាពដើមឡើងវិញនោះ។
តើការរំលាយគណបក្សប្រឆាំងបានបន្សល់ទុកជម្ងឺសង្គមអ្វីខ្លះ?
នាយកប្រតិបត្តិមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យង់ គិមអេង លើកឡើងថា ស្ថានការនយោបាយពេលនេះ បានបន្សល់ទុកនូវភាពមិនទុកចិត្តគ្នារវាងអ្នកនយោបាយ និងអ្នកនយោបាយ។ ជំរុញឲ្យមានការប្រឈមគ្នាកាន់តែខ្លាំង រវាងអ្នកគាំទ្ររដ្ឋាភិបាល និងអ្នកគាំទ្របក្សប្រឆាំង។ បង្កឲ្យមានភាពកករល្អក់ រវាងកម្ពុជា និងសហគមន៍អន្តរជាតិ នៃប្រទេសលោកសេរី និងបង្កើនឲ្យមានវប្បធម៌លាភពណ៌គ្នានៅក្នុងស្រុក កាន់តែខ្លាំង។ លោកថា ស្ថានការណ៍នយោបាយបែបនេះ ឈានទៅរកការបែកបាក់ជាតិ និងបង្កការភ័យខ្លាច ដល់អ្នកវិនិយោគ។
លោកថា៖ «ព្រោះនៅក្នុងសម័យកាលនៃសកលភាវូបនីយកម្មប្រទេសនានាគេត្រូវរស់នៅជាមួយសហគមន៍អន្តរជាតិ។អញ្ចឹងហើយបានជាយើងព្យាយាមធ្វើយ៉ាងម៉េច ឲ្យមានកិច្ចសហប្រតិបត្តិការ ហើយនឹងទំនាក់ទំនងល្អ ជាមួយគ្នាទៅវិញទៅមកបាទ នេះជារឿងមួយសំខាន់ ហើយជាមួយគ្នានោះដែរ យើងឃើញផលប្រយោជន៍ របស់លោកខាងលិច គឺប្រជាធិបតេយ្យហ្នឹងឯងហើយ»។
អ្នកវិភាគនយោបាយលោកបណ្ឌិត មាស នី វិភាគថា របត់នយោបាតថ្មីនេះ ហាក់បានរអិលចេញពីគន្លងប្រជាធិបតេ្យ ហើយរំកិលទៅរកវប្បធ៌មសងសឹកដូចពីអតីតកាល តាមរយៈធ្វើច្បាប់រំលាយដៃគូប្រកួតដែលមានអ្នកគាំទ្រជិតពាក់កណ្តាលប្រទេស។
លោកថា៖ «ទី១ វាបានបន្សល់នូវអាគារគំគួនគ្នា វាអត់បានរលាយទៅវិញ វាកាន់តែបង្កឲ្យមានកំហឹងឡើងហើយ សម្រាប់ការបន្សល់ទុកមួយទៀត វាធ្វើមនុស្សហ្នឹងវង្វេងនៅក្នុងដំណើរការប្រជាធិបតេយ្យ ព្រោះថានៅ ពេលដែលគាត់បោះឆ្នោតជ្រើសរើសតំណាងរបស់គាត់រួចហើយគេ[អ្នកនយោបាយ]នៅតែបង្កើតច្បាប់ដើម្បីមករំលាយគណបក្សហ្នឹងបានហើយយកទៅចែកឲ្យអ្នកដទៃបាន។ អាហ្នឹងវាជាមេរៀនមួយសំខាន់ណាស់ សម្រាប់ដំណើរការប្រជាធិបតេយ្យនៅក្នុងស្រុកខ្មែរយើងនេះ ពិសេសអ្នកដែលនិយមកប្រជាធិបតេយ្យ ដែលបង្កឲ្យមានភាពច្របូលច្របល់នៅក្នុងចិត្តថាតើប្រជាធិបតេយ្យនៅស្រុកខ្មែរ ដែលអ្នកនយោបាយចង់បានហ្នឹងវារបៀបម៉េច?»។
លោក មាស នី វិភាគទៀតថា របត់នយោបាយថ្មីនេះ ក៏ហាក់បង្ហាញដែរថា បានបណ្តុះគំនិតហិង្សាឲ្យពលរដ្ឋលាភពណ៌គ្នាផ្នែកនិន្នាការនយោបាយ ច្រើនជាងបណ្តុះវប្បធម៌ជាតិនិយម ។
លោកថា៖ «មកដល់ពេលនេះយើងមើលទៅឃើញថា នៅក្នុងប្រទេសយើងនេះថ្នាក់ដឹកនាំ ឬរដ្ឋាភិបាលមិនទាន់រកឃើញនូវផ្លូវណាមួយឲ្យច្បាស់លាស់ថាតើផ្លូវណាឲ្យមានការឯកភាពជាតិអីយ៉ាងម៉េងហ្នឹងយើងអត់ទាន់បានទេ។យើងមានតែការបែកបាក់គ្នា ការឈ្លោះគ្នា ការជេប្រមាថគ្នាយូរហើយ»។
បើតាមលោក មាស នី របត់នយោបាយបែបនេះ នឹងជំរុញកម្ពុជា ឲ្យជួបវបត្តិផ្នែកអភិវឌ្ឍទៅថ្ងៃអនាគត។
ធនាគារពិភពលោក កាលពីថ្ងៃទី២២ខែវិច្ឆិកា បានចេញរបាយការណ៍មួយបង្ហាញថា កំណើតសេដ្ឋរបស់កម្ពុជានៅឆ្នាំ២០១៧នេះ បានថយចុះ០,២ភាគរយ ពោលពីថយចុះពី៧ភាគរយ មក៦,៨ភាគរយ។ប៉ុន្តែធនាគារនេះ ព្រមានពីហានិភ័យនៃកំណើនសេដ្ឋកិច្ចរបស់កម្ពុជា នៅឆ្នាំ២០១៨ ដោយថាបើការរៀបចំការបោះឆ្នោតមួយមានភាពមិនច្បាស់លាស់ មិនដំណើរការទៅតាមយន្តការប្រជាធិបតេយ្យ ។
សរុបជារួមអ្នកវិភាគថា របត់នយោបាយពេលនេះ បានជំរុញឲ្យមានការប្រឈមនឹងបែកបាក់ជាតិ ជំរុញឲ្យមានវប្បធម៌លាភពណ៌គ្នាកាន់តែខ្លាំង បង្ហាញថាអ្នកនយោបាយខ្មែរនៅតែប្រើវប្បធម៌សងសឹកគ្នាដើម្បីការពារអំណាច ជាជាងប្រើវប្បធម៌បង្រួបបង្រួមជាតិដើម្បីដោះស្រាយបញ្ហា និងធ្វើឲ្យកម្ពុជា ងាយប្រឈមនឹងការដាក់ទណ្ឌកម្មសេដ្ឋកិច្ចពីសគឲ្យមន៍អន្តរជាតិ៕