អតីតមេដឹកនាំបក្សប្រឆាំង លោក សម រង្ស៊ី ដែលកំពុងនីរទេសខ្លួន បានអំពាវនាវជាថ្មីទៀត ឲ្យអ្នកគាំទ្រ ចូលរួមជំរុញឲ្យមានការផ្លាស់ប្តូរជាវិជ្ជមាន ក្រោយពីតុលាការកំពូល កាលពីពាក់កណ្តាលខែមុន បានប្រកាសរំលាយគណបក្សសង្គ្រោះជាតិចោល តាមបណ្តឹងរបស់ក្រសួងមហាផ្ទៃ។
កាលពីថ្ងៃទី១៦ ខែវិច្ឆិកា តុលាការកំពូល បានប្រកាសរំលាយគណបក្សសង្គ្រោះជាតិ និងបង្គាប់មិនឲ្យមន្ត្រីបក្សប្រឆាំង១១៨នាក់ ធ្វើនយោបាយរយៈពេល៥ឆ្នាំទៀតផង។
ប៉ុន្ពែ លោក សម រង្ស៊ី បានសរសេរនៅលើហ្វេសប៊ុក របស់លោក នាថ្ងៃទី១ធ្នូនេះ ដោយអំពាវនាវថា «ពលរដ្ឋខ្មែរគ្រប់មជ្ឈដ្ឋាន ដែលស្រលាញ់ជាតិ ហើយចង់បានយុត្តិធម៌ ត្រូវរួបរួមគ្នា ដើម្បីជំរុញឲ្យមានការផ្លាស់ប្តូរជាវិជ្ជមាន នៅកម្ពុជា»។
អ្នកនាំពាក្យគណបក្សប្រជាជនកម្ពុជា លោក សុខ ឥសាន បានប្រតិកម្មខ្លាំងៗ ទៅនឹងការអំពាវនាវនេះ ដោយលោកអះអាងថា គ្មានពលរដ្ឋធ្វើតាមលោក សម រង្ស៊ី ទេ។
លោកថា៖ «បើគាត់ក្បត់ជាតិ ក្បត់តែម្នាក់ឯងទៅ កុំបបួលប្រជាជនអ្នកស្លូតត្រង់ ក្បត់ជាមួយគាត់ មិនបានទេ គ្មាននរណាធ្វើតាមគាត់ទេ»។
ជាការកត់សំគាល់ ការអំពាវជាថ្មី របស់លោក សម រង្ស៊ី នេះ ធ្វើឡើងចំពេលដែលខ្មែរនៅក្រៅប្រទេសប្រកាសប្រមូលផ្តុំគ្នា ធ្វើមហាបាតុកម្ម នៅមុខសេតវិមាន ប្រធានាធិបតីអាមេរិក លោក ដូណាល់ ត្រាំ ក្នុងទិវាសិទ្ធិមនុស្សអន្តរជាតិ១០ធ្នូ ដែលក្រុមអ្នកដឹកនាំតវ៉ាអះអាងថា មហាបាតុកម្មនេះ នឹងជំរុញឲ្យសហគមន៍អន្តរជាតិជួយសង្គ្រោះប្រជាធិបតេយ្យនៅកម្ពុជា និងដោះលែង លោក កឹម សុខា។
អ្នកវិភាគបញ្ហានយោបាយ លោក មាស នី វិភាគថា ការអំពាវនាវ រួមទាំងការប្រកាសបន្តជីវិតនៅនយោបាយនៅក្រៅប្រទេសរបស់មេដឹកនាំបក្សប្រឆាំង លោកថា គ្រាន់តែជាយុទ្ធសាស្ត្រនយោបាយមួយ ដើម្បីបង្ហាញទៅសាធារណមតិជាតិ និងអន្តរជាតិថា បក្សប្រឆាំងមួយនេះ មិនទទួលយកការរំលាយបក្សរបស់តុលាការកំពូល។
លោកថា៖ «បើយើងមើលទៅ ជាវិធានការរបស់គណបក្សមួយ ដែលគេចង់រក្សានូវភាពស្របច្បាប់របស់គេ។ បើសិនជាគេរំលាយហើយ គណបក្សហ្នឹងស្ងប់ស្ងាត់ មិនមានការតវ៉ាអីទេ! បានន័យថា យើងយល់ព្រមទៅតាមហ្នឹង»។
ទោះជាយ៉ាងណា អ្នកតាមដានបង្ហាញការព្រួយបារម្ភថា ស្ថានការណ៍នយោបាយពេលនេះ បានរុញកម្ពុជាដល់របត់ផុយស្រួយ នៃការបែកបាក់ជាតិ បើរដ្ឋាភិបាល មិនធ្វើឲ្យស្ថានការនយោបាយវិលទៅរកស្ថានភាពដើមវិញ ធានាដល់ការរៀបចំការបោះឆ្នោតជាតិឆ្នាំ២០១៨ តាមយន្តការប្រជាធិបតេយ្យ ដូចប្រទេសលោកសេរីកំពុងជំរុញនោះ៕
