នៅទីបំផុតភាពយន្តខ្មែរ ដែលត្រូវគេស្គាល់ថាជាស្នាដៃដឹកនាំទាំងស្រុងរបស់ផលិតករបរទេស ពិតជាបានក្លាយជាម្ចាស់ពានឆ្នើមជាភាពយន្តឆ្នើមបប្រចាំឆ្នាំមិនខុសពីការទាយទុកមែន បន្ទាប់ពីគណៈកម្មការបើកសិទ្ធិអោយចូលរួមប្រកួតនៅក្នុងព្រឹត្តិការណ៍មហោស្រពថ្នាក់ជាតិ ដែលកាលពី៤លើកកន្លងមក តម្រូវអោយតែភាពយន្តដែលជាស្នាដៃរបស់ជនជាតិខ្មែរចូលរួមប្រកួតសុទ្ធសាធ។
យ៉ាងណាមិញគេកត់សម្គាល់ថាការប្រគល់ពានដែលបានធ្វើឡើងកាលពីយប់ ថ្ងៃទី១០ ធ្នូនោះ មានការទទួលយកភាគច្រើន ជាពិសេសគឺពីសំណាក់ផលិតករដែលធ្លាប់មានប្រតិកម្មក៏ប្រកាសទទួលយកដែរ បើទោះការកម្មវិធីនេះ គេកត់សម្គាល់ថាភាពយន្តដែលជាស្នាដៃបរទេសទទួលបានពានច្រើនជាងគេក្នុងចំណោមពានទាំង៩ដែលបានប្រកាសឡើង។
ភាពយន្តបរទេសដែលបានចូលរួមប្រកួតនៅក្នុងមហោស្រពភាពយន្តថ្នាក់ជាតិនោះរួមមាន រឿង «Jailbreak
ការពារឧក្រិដ្ឋជន» ដែលទទួលបានពានរហូតដល់ទៅ២លើផ្នែកតុបតែងប្លង់ និងតួសម្ដែង រឿង «តម្លៃស្នេហ៍» ដែលទទួលបានពានរហូតដល់ទៅ៤ និងរឿង «មុនពេលដួលរលំ» ដែលទទួលបានត្រឹមតែប័ណ្ណសរសើរ។
យ៉ាងណាមិញ គណៈកម្មការរៀបចំបានអះអាងថាហេតុផលដែលកម្មវិធីនេះអនុញ្ញាតិអោយភាពយន្តខ្មែរដែលជាស្នាដៃរបស់បរទេសចូលរួមប្រកួត គឺដោយសារតែចង់អោយភាពយន្តខ្មែរ កាន់តែមានអ្នកបោះទុនចូលរួមផលិតអោយបានច្រើន ដើម្បីអោយភាពយន្តខ្មែរកាន់តែមានស្ដង់ដារនៅក្នុងស្រទាប់មហាជន។ ក្នុងនោះក៏មិនខុសពីផ្ដល់ឱកាសអោយភាពយន្តជាស្នាដៃបរទេសបានចែករំលែកចំណេះដឹងដល់ភាពយន្តកម្ពុជា ដែលជាខិតខំផលិតអោយផលិតករកម្ពុជានោះផងដែរ។
លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានអះអាងថាវត្តមានភាពយន្តខ្មែរដែលជាស្នាដៃរបស់បរទេស មិនមែនជារឿងខុសឆ្គងនោះទេ សំខាន់អោយតែភាពយន្តនោះមានលក្ខណៈជាខ្មែរនិងជាអត្តសញ្ញាណរបស់ខ្មែរ។ អ្វីដែលសំខាន់គឺបានលើកទឹកចិត្តអោយជនបរទេសនិងអ្នកដែលមានស្នាដៃបន្តប្រឹងប្រែងផលិតភាពយន្តដើម្បីអោយខ្មែរកាន់តែមានកិត្តិយស និងដើម្បីចែករំលែកដល់ក្រុមផលិតករដែលត្រូវការទទួលចំណេះដឹង ជាច្រើនក្នុងប្រទេសក្នុងពេលមហោស្រពបើកអោយភាពយន្តរបស់ស្នាដៃខ្មែរ និងស្នាដៃរបស់បរទេសបានប្រកួតជាមួយគ្នា។
លោកស្រីថា យ៉ាងហោចណាស់ក៏ជំរុញអោយផលិតករបរទេសអោយមកធ្វើសកម្មភាពផលិតកុនដើម្បីផ្ដល់ចំណេះដឹង និងការងារអោយតារាសម្ដែងកម្ពុជា និងផលិតករនៅកម្ពុជា។ ក្នុងនោះលោកស្រីក៏បានលើកទឹកចិត្តដល់ភាពយន្ត និងផលិតករកម្ពុជា ដែលដាក់រឿងប្រកួតប្រជែងហើយមិនទទួលបានពាន និងប័ណ្ណសរសើរណាមួយនៅក្នុងព្រឹត្តិការណ៍នោះផងដែរ។
គួរបញ្ជាក់ថា ពានដែលត្រូវបានប្រគល់អោយនៅក្នុងពិធីនោះរួមមានចំនួន៩ ដោយរឿង «Jailbreak
ការពារឧក្រិដ្ឋជន» ទទួលបានពានឆ្នើម២ គឺពានភាពយន្តដែលមានតួឯកប្រុសសម្ដែងបានល្អបំផុត
និងពានជាភាពយន្តដែលមានការតុបតែងឆាកបានល្អបំផុត។ ភាពយន្តរឿង «តម្លៃស្នេហ៍» ទទួលបានពានចំនួន៤ គឺពានជាភាពយន្តដែលមានប្រព្រឹត្តិកម្មភាពយន្តឆ្នើម ជាភាពយន្តដែលមានតួឯកស្រីសម្ដែងបានល្អបំផុត
ជាភាពយន្តដែលមានអ្នកថតឆ្នើមបំផុត និងជាភាពយន្តដែលបានគ្រងតំណែងជាភាពយន្តឆ្នើមប្រចាំឆ្នាំ២០១៧
ក្នុងចំណោមភាពយន្តទាំង១៤ដែលខាងគណកម្មការជ្រើសរើសអោយយកមកប្រកួតសម្រាប់មហោស្រពភាពយន្តឆ្នាំនេះ។
សម្រាប់រឿង «ទឹកចិត្តម្ដាយសម័យថ្មី» របស់ផលិតកម្មថោន ក្រោមស្នាដៃរបស់អ្នកស្រី ពាន់ ភួងបុប្ផា ទទួលបានពានចំនួន២គឺពានអ្នកនិពន្ធឆ្នើមនិងពានជាភាពយន្តដែលមានទស្សនិកជនគាំទ្រច្រើនជាងគេប្រចាំឆ្នាំ។ ដោយឡែកសម្រាប់ផលិតកម្មមហាហង្សដែលមានភាពយន្តចំនួន២ចូលរួមប្រកួតប្រជែង គឺពានជាភាពយន្តដែលមានអ្នកដឹកនាំឆ្នើមក្នុងរឿង «ស៊ុបពើម៉ាំ» ដោយលោក ជុំ វិចិត្រ អ្នកដឹកនាំរឿងគឺជាអ្នកតំណាងទទួលបានពានកិត្តិយសនេះ។
លោក អ៊ិន សុភិន ម្ចាស់ផលិតកម្មមហាហង្ស ដែលធ្លាប់ប្រតិកម្មជុំវិញវត្តមានភាពយន្តជាស្នាដៃបរទេសគឺរឿង «Jailbreak ការពារឧក្រិដ្ឋជន» រឿង «តម្លៃស្នេហ៍» និងរឿង «ក្រោយពេលដួលរលំ» បានថ្លែងជាថ្មីថាលោកមិនមានអារម្មណ៍ចង្អៀតចង្អល់នោះទេ បើទោះជាភាពយន្តក្រោមការដឹកនាំរបស់បរទេសត្រូវបានជាប់ពានក្នុងម្នាក់ៗ និងម្នាក់៤ក្នុងចំណោមពានទាំង៩ ដែលលោកធ្លាប់ប្រកាសថាគួរតែបានលើភាពយន្តដែលជាស្នាដៃរបស់ផលិតករក្នុងស្រុក។
លោកថាគឺជាមោទនភាពទៅវិញដែលស្នាដៃរបស់ផលិតកម្ពុជាជាច្រើនផងដែរ បានទទួលកិត្តយសជាប់ពានផ្សេងៗ ក្នុងចំណោមភាពយន្តដែលមានបរទេសចូលរួមប្រកួតប្រជែង។ អ្វីដែលលោករំភើបចិត្តជាងគេ គឺស្នាដៃរបស់ផលិតកម្មលោកក៏ទទួលបានពានមួយ ដែលនោះជាពានដឹកនាំសម្ដែងឆ្នើម ក្នុងពេលដែលក្នុងមហោស្រពភាពយន្តគឺមានភាពយន្ត និងមានស្នាដៃរបស់អ្នកដឹកនាំរឿងសុទ្ធតែមានស្នាដៃចូលរួមប្រកួតប្រជែង។
លោកថាភាពយន្តរឿង «ស៊ុបពើម៉ាំ» ជាស្នាដៃតាក់តែងនិពន្ធរបស់លោក ហើយត្រូវបានលោកជ្រើសរើសលោកជុំ វិចិត្រ អោយធ្វើការដឹកនាំសម្ដែង ដោយសារតែលោកជឿជាក់លើការដឹកនាំរបស់លោក ជុំ វិចិត្រ ដែលមានស្នាដៃផលិតរឿងអោយផលិតកម្មមហាហង្សជាច្រើនមកហើយ។
លោកថាអ្នកដឹកនាំសម្ដែងរបស់ផលិតកម្មមហាហង្សទទួលបានពានឆ្នើម គឺស្មើនឹងផលិតកម្មរបស់លោកមានដឹករឿងឆ្នើមមួយ ដែលបង្ហាញថាស្នាដៃរបស់ផលិតកម្មលោកក៏អាចធ្វើការប្រកួតប្រជែងផងដែរ។ យ៉ាងណាមិញ លោកថានៅក្នុងព្រឹត្តិការណ៍មហោស្រពភាពយន្តថ្នាក់ជាតិ បើមានតែស្នាដៃរបស់ផលិតករខ្មែរចូលរួមប្រកួតប្រជែងសុទ្ធសាធ នោះទើបនឹងផ្ដល់ឱកាសអោយស្នាដៃរបស់ផលិតករក្នុងស្រុក ឈ្នះពាន
និងមានកិត្តិយសបានច្រើន៕