សហភាពអឺរ៉ុបកាលពីថ្ងៃចន្ទជំរុញឲ្យរដ្ឋាភិបាលមីយ៉ាន់ម៉ាដោះលែងអ្នកសារព័ត៌មានរបស់ទីភ្នាក់ងារព័ត៌មានរ៉យទ័រពីរនាក់ ឲ្យបានឆាប់តាមការដែលអាចធ្វើទៅបានដើម្បីកុំឲ្យប៉ះពាល់ដល់សេរីភាពនៃសារព័ត៌មាននៅក្នុងប្រទេសនេះ។
អ្នកនាំពាក្យស្ថាប័នកិច្ចការបរទេសរបស់សហភាពអឺរ៉ុបលោកស្រី Federica Mogherini ថ្លែងថា ការឃាត់ខ្លួនអ្នកសារព័ត៌មានរបស់ទីភ្នាក់ងារសារព័ត៌មានរ៉យទ័រនេះគឺជាក្តីកង្វល់របស់សហភាពអឺរ៉ុប។ នេះបើតាមសារព័ត៌មាន Straits Time។
អ្នកសារព័ត៌មានពីរនាក់រួមមានឈ្មោះ Wa Lone អាយុ៣១ឆ្នាំនិង Kyaw Soe Ooអាយុ២៧ឆ្នាំ ត្រូវបានចាប់ខ្លួននៅពេលដែលទៅទទួលទានអាហារពេលល្ងាចតាមការណាត់របស់មន្ត្រីនគរបាលមីយ៉ាន់ម៉ា កាលពីល្ងាចថ្ងៃអង្គារសប្តាហ៍មុន នៅជាយក្រុងយ៉ង់ហ្គោនជាទីក្រុងធំបំផុតរបស់ប្រទេសនេះ។
មិនមានព័ត៌មានច្បាស់ការពីរដ្ឋាភិបាល ចំពោះការចោទប្រកាន់អ្នកទាំងពីរនេះទេ ប៉ុន្តែមន្ត្រីនគរបាលថ្លែងថា អាចពាក់ព័ន្ធនិងកំហុសធ្វើឲ្យប៉ះពាល់ដល់ព័ត៌មានសម្ងាត់របស់ជាតិ ខណៈអ្នកទាំងពីរនេះកំពុងតែប្រមួលព័ត៌មានសម្រាប់សរសេរអត្ថបទពាក់ព័ន្ធស្ថានភាពជនជាតិភាគតិចរ៉ូហ៊ីងយ៉ា។
មន្ត្រីសហភាពអឺរុបរូបនេះ ថ្លែងថា លោកស្រីសង្ឃឹមថា អាជ្ញាធរមីយ៉ាន់ម៉ា និងគោរពសិទ្ធិអ្នកសារព័ត៌មានទាំងពីរនេះ ហើយនឹងមានការដោះលែងជាបន្ទាន់។
សហភាពអឺរ៉ុបបានដាក់ទណ្ឌកម្មករណីលក់អាវុធ និងសម្ភារយោធាផ្សេងទៀតប្រឆាំងរដ្ឋាភិបាលមីយ៉ាន់ម៉ា ពាក់ព័ន្ធការចោទថា រដ្ឋាភិបាលនៃប្រទេសនេះបានធ្វើទុក្ខបុកម្នេញដល់ជនជាតិភាគតិចរ៉ូហ៊ីងយ៉ានៅក្នុងរដ្ឋរ៉ាឃីន បណ្តាលឲ្យជនជាតិភាគតិចនេះ ប្រមាណ៦២០ ០០០នាក់រត់ភៀសខ្លួនទៅកាន់ប្រទេសបង់ក្លាដេស ទាំងប្រឈមគ្រោះថ្នាក់ និងរងទុក្ខវេទនា៕
