មន្ត្រីចរាចរណ៍បានឲ្យដឹងថា សមត្ថកិច្ចបានឃាត់ម៉ូតូ ១៤៣២គ្រឿង ពាក់ព័ន្ធនឹងបទល្មើសចរាចរណ៍នៅក្នុងរាជធានីភ្នំពេញ ក្នុងរយៈពេលពីរថ្ងៃកន្លងទៅនេះ បន្ទាប់ពីលោកនាយករដ្ឋមន្ត្រី ហ៊ុន សែន បានបញ្ជាឲ្យពង្រឹងសណ្ដាប់ធ្នាប់ និងសុវត្ថិភាពចរាចរណ៍ឡើងវិញ។
លោក ហ៊ុន សែន បានព្រមានដកតំណែងអភិបាលខណ្ឌដូនពេញ លោក សុខ ពេញវុធ កាលពីថ្ងៃទី០៣ ខែមករា ដោយលោកថា ប្រសិនបើអភិបាលខណ្ឌរូបនេះ នៅតែមិនរៀបចំសណ្ដាប់ធ្នាប់ចរាចរណ៍នៅម្ដុំគេហដ្ឋានរបស់លោកជិតវិមានឯករាជ្យឡើងវិញទេនោះ។
មួយថ្ងៃបន្ទាប់មក លោក ហ៊ុន សែន ក៏បានអំពាវនាវដល់ប្រជាពលរដ្ឋទាំងអស់ ឲ្យគោរពច្បាប់ចរាចរណ៍ ដើម្បីបញ្ចៀសគ្រោះថ្នាក់ចរាចរណ៍នៅទូទាំងប្រទេស ខណៈតួលេខអ្នកស្លាប់ក្នុងគ្រោះថ្នាក់ចរាចរណ៍ បានកើនឡើងជារៀងរាល់ឆ្នាំ។
នាយការិយាល័យនគរបាលចរាចរណ៍ផ្លូវគោករាជធានីភ្នំពេញ លោក ចេវ ហាក់ បានប្រាប់វីអូឌីនៅថ្ងៃទីនេះថា សមត្ថកិច្ចពង្រឹងការអនុវត្តច្បាប់ចរាចរណ៍បានចំនួនពីរថ្ងៃមកហើយ ចាប់ពីថ្ងៃទី៥ ដល់ថ្ងៃទី៦ ខែមករា ឆ្នាំ២០១៨នេះ ដោយឃាត់បានម៉ូតូចំនួន ១៤៣២គ្រឿង។ លោកបញ្ជាក់ថា យានជំនិះទាំងនោះ ត្រូវបានចាប់ឃាត់ ពាក់ព័ន្ធទៅនឹងបទល្មើសបើកបរបញ្ច្រាសទិស មិនមានមួកសុវត្ថិភាព និងម៉ូតូអត់មានស្លាកលេខជាដើម។
មន្ត្រីនគរបាលរូបនេះ បានពន្យល់ថា យានជំនិះទាំងនោះ ត្រូវបានសមត្ថកិច្ចរបស់លោកបញ្ជូនទៅអធិការដ្ឋាននគរបាលនានា នៅក្នុងរាជធានីភ្នំពេញយ៉ាងយូរ ៣ថ្ងៃ ដោយលោកថា ដើម្បីតម្រូវឲ្យម្ចាស់យានជំនិះទាំងនោះ ចូលទៅបង់ប្រាក់ពិន័យ និងទិញមួក កញ្ចក់ ឬធ្វើស្លាកលេខ មុនត្រូវបានប្រគល់ត្រឡប់ទៅវិញ។
ជាងនេះទៅទៀត លោក ចេវ ហាក់ ប្រាប់ថា បើផុតរយៈពេល ៣ថ្ងៃហើយ ប៉ុន្តែ ម្ចាស់យានជំនិះមិនចូលទៅបង់ប្រាក់ផាកពិន័យទេ សមត្ថកិច្ចនឹងបញ្ជូនទៅស្នងការដ្ឋាននគរបាលរាជធានីភ្នំពេញ ដើម្បីទុករយៈពេល ១ខែ ឲ្យម្ចាស់ម៉ូតូចូលដោះស្រាយតាមច្បាប់។
លោកបញ្ជាក់ថា បើករណីមត្ថកិច្ចធ្វើឲ្យខូច ឬបាត់បង់គ្រឿងបន្លាស់ម៉ូតូ ម្ចាស់ម៉ូតូអាចប្តឹងទៅស្ថាប័នពាក់ព័ន្ធ ដើម្បីឲ្យជួយដោះស្រាយតាមច្បាប់។
លោកប្រាប់ថា៖ «រាល់ការផាកពិន័យទំាងអស់ សុំឲ្យទារបង្កាន់ដៃពីសមត្ថកិច្ច ហើយក្នុងច្បាប់ស្តីពីចរាចរណ៍ផ្លូវគោក គឺផាក ១៥០០០រៀលអត់មួក បើកបរបញ្ច្រាស ២៥០០០រៀល។ គាត់អាចកាន់បង្កាន់ដៃ បើសិនជាសមត្ថកិច្ចផាកខុសពីគោលការច្បាប់កំណត់ គាត់អាចប្តឹងទៅសាមីអង្គភាពរយៈពេល ១៥ថ្ងៃ ដែលសាមីអង្គភាពត្រូវដោះស្រាយបញ្ហានេះ។ បើរយៈពេល ១៥ថ្ងៃ គាត់ដោះអត់បាន គឺគាត់អាចប្តឹងទៅតុលាការទៀត»។
របាយការណ៍សាលារាជធានីភ្នំពេញឲ្យដឹងថា នៅភ្នំពេញ ចំនួនរថយន្ត និងម៉ូតូ មានប្រមាណជាង ៣លាន ២សែនគ្រឿង បូករួមទាំងតាក់ស៊ី និងត្រីចក្រយាន ធ្វើដំណើរលើដងផ្លូវជារៀងរាល់ថ្ងៃ ស្របពេលបញ្ហាគ្រោះថ្នាក់ចរាចរណ៍ និងការកកស្ទះ បានក្លាយជាបញ្ហាពិបាកដោះស្រាយ។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ លើកឡើងថា លោកពុំមានជំនឿលើការអនុវត្តច្បាប់របស់មន្ត្រីថ្នាក់ក្រោមទេ ដោយថា ការកកស្ទះ និងគ្រោះថ្នាក់ចរាចរណ៍ភាគច្រើន មន្ត្រីទំាងនោះអនុវត្តច្បាប់មានភាពលម្អៀងរវាងអ្នកមាន និងអ្នកក្រី។
ប៉ុន្តែលោកផ្តល់ជាអនុសាសន៍ថា ដើម្បីអនុវត្តច្បាប់ឲ្យមានប្រសិទ្ធភាព រដ្ឋាភិបាលត្រូវបង្កើតក្រុមការងារតាមដាន និងពិនិត្យមើលកាមេរ៉ានៅតាមភ្លើងស្តុប ដោយថា បើរកឃើញអ្នកបើកបរមិនគោរពច្បាប់ ត្រូវអនុវត្តឲ្យតឹងរឹង ដោយមិនប្រកាន់បក្សពួក ទើបទទួលបានផលវិជ្ជមាន។
លោកប្រាប់ថា៖ «យន្តការមួយដែលបើកកំាមេរ៉ាតាមភ្លើងស្តុបមើលថា តើរថយន្តប្រភេទណា ឬក៏ម៉ូតូណាដែលបើករំលោភច្បាប់ចរាចរណ៍ បើសិនជារកឃើញ ខ្ញុំថាបើសិនជានៅក្នុងនោះមានរថយន្ត ខ.ម. ឬ ន.ប. ឬស្លាកលេខរដ្ឋ ដែលរកឃើញថាបានរំលោភច្បាប់ចរាចរណ៍ដែរ ខ្ញុំគិតថា គួរតែចាត់ការក្រុម ហ្នឹងមុនគេ ដើម្បីឲ្យក្រុមហ្នឹងដើរតួនាទីផ្តល់ភាពជាគំរូដល់អ្នកដទៃ សព្វថ្ងៃនេះគ្រប់រឿង អ្នកតូចចំាតែមើលអ្នកធំទេ បើអ្នកធំត្រង់[គោរពច្បាប់] មានភាពជាគំរូ ខ្ញុំគិតថាអ្នកតូចនិងរៀនសូត្រតាម»។
របាយការណ៍នគរបាលជាតិ បានឲ្យដឹងថា មនុស្សដល់ទៅ ១៧៨០នាក់ បានស្លាប់ ហើយមនុស្ស ៥៥៣៩នាក់ បានរងរបួសនៅក្នុងគ្រោះថ្នាក់ចរាចរណ៍នៅទូទាំងប្រទេស កាលពីឆ្នាំ២០១៧កន្លងមក ដោយតួលេខអ្នកស្លាប់កើនឡើង ៦៣នាក់បន្ថែមទៀត បើទោះបីជាចំនួនអ្នករងរបួសថយចុះក៏ដោយ បើធៀបទៅនឹងតួលេខគ្រោះថ្នាក់ចរាចរណ៍ឆ្នាំ២០១៦កន្លងមក៕