សាលាដំបូងរាជធានីភ្នំពេញ បានចេញដីកាកោះហៅអតីតប្រធានសហជីព លោក ជា មុន្នី ឲ្យចូលទៅបំភ្លឺនៅតុលាការជុំវិញសំណុំរឿងដែលសហជីពក្រុមផ្សេងទៀត បានប្តឹងពីបទញុះញង់។
កាលពីចុងឆ្នាំ២០១៧ លោកមេធាវី ដារ៉ា សុបញ្ញា និងលោក កេតុ សុណ្ណឌី ដែលអះអាងថា តំណាងឲ្យសហជីពចំនួន ១២០ស្ថាប័ន បានប្តឹងលោក ជា មន្នី ដោយចោទថា បានញុះញង់ឱ្យសហគមន៍អឺរ៉ុប និងសហរដ្ឋអាមេរិក ដាក់ទណ្ឌកម្មសេដ្ឋកិច្ចលើកម្ពុជា។
ក្នុងដីកាកោះចុះថ្ងៃទី១៩ ខែធ្នូ ឆ្នាំ២០១៧ ដែលវីអូឌីទើបទទួលបាននៅថ្ងៃនេះ តំណាងអយ្យការអមសាលាដំបូងរាជធានីភ្នំពេញ លោក សៀង សុខ បានកោះហៅ លោក ជា មុន្នី ឲ្យចូលបំភ្លឺក្នុងនាមជនសង្ស័យនៅព្រឹកថ្ងៃទី២២ ខែមករាខាងមុខនេះ។
វិអូឌីមិនអាចសុំការឆ្លើយតបពីលោក ជា មន្នី បានទេជុំវិញរឿងនេះ។ ប៉ុន្តែ កាលពីចុងឆ្នាំ២០១៧ លោក ជា មុន្នី ប្រាប់កាសែតភ្នំពេញ ប៉ុស្តិ៍ថា លោកមិនខ្វល់ទៅនឹងការប្តឹងនោះឡើយ។
ក្រុមមេធាវីដែលអះអាងថា តំណាងឲ្យសហជីពចំនួន ១២០ស្ថាប័នដែលបានដាក់ពាក្យប្តឹងលោក ជា មុន្នី នោះ បានចូលបំភ្លឺនៅតុលាការនៅថ្ងៃទីនេះ ដើម្បីការពារបណ្តឹងរបស់ខ្លួន។
ជាតំណាងមេធាវីម្នាក់ លោក កេតុ សុវណ្ណឌី ឲ្យដឹងថា តុលាការបានសួរនាំពួកគាត់អំពីអង្គហេតុ និងអង្គច្បាប់នានា ជុំវិញពាក្យបណ្តឹងដែលបានប្តឹងលោក ជា មុន្នី។
លោកបន្ថែមថា៖ «យើងបានសំណូមពរទៅតុលាការឲ្យផ្តន្ទាទោសលោក ជា មុន្នី តាមច្បាប់ និងសំណូមពរនូវសំណងជំងឺចិត្តនៅចំពោះមុខ និងពេលបច្ចុប្បន្ននេះ ១លានដុល្លារ និងសុំឲ្យគាត់ហ្នឹង ទទួលខុសត្រូវចំពោះទង្វើរបស់គាត់ដែលមានជាក់ស្តែងនៅពេលអនាគត ពីព្រោះ អាហ្នឹងយើងអត់ទាន់អាចមើលឃើញទេ»។
ប្រធានសភាពការងារកម្ពុជា លោក អាត់ ធន់ មានប្រសាសន៍ថា ករណីសហជីពមួយក្រុមដែលលោកថា ជាសហជីពគាំទ្ររដ្ឋាបាលប្តឹងលោក ជា មន្នី នោះ គឺមិនត្រឹមត្រូវឡើយ ដោយថា ការនិយាយរបស់អតីតប្រធានសហជីពសេរីកម្មកររូបនោះ មិនមានឥទ្ធិអ្វីធ្វើឲ្យសហគមន៍អឺរ៉ុប និងសហរដ្ឋអាមេរិក ដាក់ទណ្ឌកម្មសេដ្ឋកិច្ចលើកម្ពុជាទេ ហើយថា ករណីសហជីពទាំងនោះប្តឹងលោក ជា មុន្នី អាចមានចេតនាផ្សេង។
លោកបន្ថែមថា៖ «ព្រោះពាណិជ្ជកម្មនីមួយៗ ការដាក់មក គេមានហេតុផល ការដកទៅវិញ គេមានហេតុផលរបស់គេ ច្បាស់លាស់ណាស់។ អញ្ចឹងមកដល់ពេលនេះ យើងដឹងហើយថា ទោះបីមានសម្ពាធរឿងនយោបាយធ្វើឲ្យសហគមន៍អឺរ៉ុប និងសហរដ្ឋអាមេរិកមានឥទ្ធិពលយ៉ាងណាក៏ដោយ គឺដំណើរការពាណិជ្ជកម្មហ្នឹងនៅប្រក្រតីដដែល។ អញ្ចឹង សម្តីលោក ជា មុន្នី គ្មានឥទ្ធិពលអីទេ។ អញ្ចឹងខ្ញុំគិតរឿងសហជីពគាំទ្ររដ្ឋាភិបាលប្តឹងគាត់ ជារឿងចម្លែកដែរ»។
លោក ជា មុន្នី ត្រូវបានក្រុមសហជីព ដែលគេមើលឃើញថា មានទំនោរគាំទ្ររដ្ឋាភិបាលប្តឹង ដោយចោទពីបទញុះញង់ បន្ទាប់ពីលោក បានធ្វើបទសម្ភាសន៍មួយជាមួយវិទ្យុអាស៊ីសេរីកាលពីឆ្នាំ២០១៧ ដែលសហជីពទាំងនោះថា បានអំពាវនាវឲ្យសហគមន៍អឺរ៉ុប និងសហរដ្ឋអាមេរិកដាក់ទណ្ឌកម្មលើរដ្ឋាភិបាលកម្ពុជាក្រោយរំលាយបក្សប្រឆាំង៕