អ្នកឃ្លាំមើល និង អត្ថាធិប្បាយបញ្ហាសង្គម លោក គឹម សុខ ដែលកំពុងជាប់ឃុំអះអាងថា មន្ត្រីអនុរក្សពន្ធនាគារព្រៃសចំនួន២នាក់បានវាយ និងទាត់ធាក់ រូបលោក ដោយសារតែលោកទាមទារ អានកាសែត និងសៀវភៅ ប៉ុន្តែមន្ត្រីទាំងនោះមិនព្រមក៏ផ្ទុះហិង្សាឡើង។
នៅក្នុងបន្ទប់សវនាការតុលាការកំពូលនៅថ្ងៃនេះ លោក គឹម សុខ ថ្លែងប្រាប់ចៅក្រមថា លោកចង់អានព័ត៌មាន និង សៀវភៅដើម្បីទទួលបានដំណឹងថ្មីៗ និង ចំណេះដឹងបន្ថែម ប៉ុន្តែត្រូវបានរឹតត្បិតដោយមន្ត្រីអនុរក្សទាំងនោះ។
លោកគឹម សុខ ថ្លែងថា ការវាយដំ និង ទាត់ធាក់រូបលោក ពីសំណាក់មន្ត្រីអនុរក្ស ទើបតែកើតមានឡើងនៅពេលថ្មីៗនេះ។
លោកថ្លែងថា៖«នៅក្នុងពន្ធនាគារ គេមិនអនុញ្ញាតឲ្យយកឯកសារចូល។ គេមិនឲ្យអានសៀវភៅ កាសែត ឬកាន់ប៊ិច សរសេរអ្វីទេ។ ពេលនោះមន្ត្រីឈ្មោះណាត វណ្ណៈ និងមន្ត្រីម្នាក់ទៀតបានធាក់និង វាយខ្ញុំ»
ពេលនោះប្រធានក្រុមប្រឹក្សាជុំនុំជម្រះ លោកស្រី គឹម សត្ថាវី បានកាត់មិនឲ្យលោក គឹម សុខ រៀបរាប់បន្ត ដោយថា តុលាការមិនមានសមត្ថកិច្ចក្នុងករណីនេះទេ ហើយឲ្យលោកគឹម សុខ ប្តឹងទៅកាន់ក្រសួងមហាផ្ទៃវិញ។
មេធាវីការពារលោក គឹម សុខ គឺលោកជួង ជូងី ថ្លែងថា ការមិនឲ្យអានសៀវភៅនិង កាសែតនោះកើតមានយូរហើយ ប៉ុន្តែចំពោះការវាយដំលោកទើបតែដឹង។ លោកថា នឹងពិភាក្សាជាមួយលោក គឹម សុខ ដើម្បីប្តឹងករណីនេះ។ លោកថា៖«ខ្ញុំនឹងទៅជួបគាត់នៅពន្ធនាគារនៅពេលឆាប់ៗនេះ ដើម្បីពិភាក្សាជាមួយពីបញ្ហានេះ»។
អ្នកនាំពាក្យនាយកដ្ឋានពន្ធនាគារនៃក្រសួងមហាផ្ទៃលោក សន កែវ មានប្រសាសន៍ថា នៅពន្ធនាគារ មិនបានហាមការអានកាសែត និង សៀវភៅទេផ្ទុយទៅវិញមានតែការជំរុញលើកទឹកចិត្តឲ្យអាន។ ចំណែកអំពើហិង្សាលោកថា មិនអនុញ្ញាតឲ្យមានទេ ហើយថា លោកនឹងស្រាវជ្រាវករណីនេះ។
លោកថ្លែងថា៖ «ចំពោះការលើកឡើងរបស់គាត់វាជាការលើកឡើង ជាសិទ្ធិរបស់គាត់ ហើយយើងអត់ទាន់ដឹងថា ការលើកឡើងនោះត្រឹមត្រូវ ឬ មិនត្រឹមត្រូវនៅឡើយទេ គ្រាន់តែជាការលើកឡើងម្ខាង ហើយសម្រាប់ខ្ញុំ ! ខ្ញុំនឹងពាំនាំព័ត៌មាននេះជូនថ្នាក់ដឹកនាំ ដើម្បីមានវិធានការដោះស្រាយ។ ជាទូទៅពេលមានព័ត៌មានយើងនឹងធ្វើការស៊ើបមើល ថាវាយ៉ាងម៉េច ពិត ឬមិនពិត យ៉ាងម៉េច ហើយព័ត៌មាននេះ ខ្ញុំមិនទាន់ជឿថាមានការវាយដំទេ» ។
សវនាការនៅតុលាការកំពូល នៅព្រឹកនេះ មិនមានវត្តមានលោក ជូង ជូងី ទេ ដោយលោកថា មិនបានទទួលលិខិតអញ្ជើញពីតុលាការ។ ប៉ុន្តែក្នុងសវនាការនេះមានវត្តមានលោកគី តិចមេធាវីរបស់លោកនាយករដ្ឋមន្ត្រីហ៊ុន សែន។
អ្នកនាំពាក្យតុលាការកំពូល លោក នៅ មុនីជោត មិនទាន់អាចសុំការឆ្លើយតបចំពោះការលើកឡើងរបស់លោកជួង ជូងី បានទេ ដោយលោកមិនលើកទូរសព្ទ។
លោកនាយករដ្ឋមន្ត្រីហ៊ុន សែន បានប្តឹងលោក គឹម សុខ បន្ទាប់ពីលោកគឹម សុខ អត្ថាធិប្បាយតាមវិទ្យុអាស៊ីសេរីថា គណបក្សប្រជាជនកម្ពុជាជាអ្នកស្លាប់លោកកែម ឡី និង ត្រៀមខ្លួនប្លន់អំណាច។ លុះដល់ថ្ងៃទី១០ខែសីហា សាលាដំបូងសម្រេចឲ្យលោកគឹម សុខ ជាប់ពន្ធនាគារ១៨ខែ និង សងប្រាក់ជំងឺចិត្តដល់លោក ហ៊ុន សែន ៨០០លានរៀល ឬស្មើនឹង ២០ម៉ឺនដុល្លារ។