មន្ត្រីនគរបាលខេត្តសៀមរាប បានឃាត់ខ្លួនជនសង្ស័យ ១៩នាក់ បញ្ជូនទៅការិយាល័យព្រហ្មទណ្ឌកំរិតធ្ងន់ចាត់ការតាមនីតិវិធីច្បាប់ ដោយថា បានបន្លំខ្លួនធ្វើជាព្រះសង្ឃដើរបិណ្ឌបាត្រ និងស្នាក់នៅផ្ទះសំណាក់ នៅក្នុងខេត្តនេះបែបអនាធិបតេយ្យ។
ក្នុងវេបសាយអគ្គស្នងការដ្ឋាននគរបាលជាតិ បានដកស្រង់សម្តីរបស់ស្នងការរងទទួលផែនសន្តិសុខលោក ហួត ធី កាលពីថ្ងៃម្សិលមិញ ដែលបាននិយាយថា លោកបានដឹកនាំកម្លាំងនគរបាលកណ្ដាលសន្តិសុខ ដោយមានការចូលរួមសហការពីកម្លាំងផ្នែកសន្តិសុខក្រុង និងកម្លាំងប៉ុស្តិ៍នគរបាលរដ្ឋបាលសង្កាត់គោកចក នៃអធិការដ្ឋាននគរបាលក្រុងសៀមរាប បានចុះប្រមូលជនសង្ស័យ ១៩នាក់ ក្នុងនោះ ១៧នាក់ញៀនថ្នាំ និងមានកុមារម្នាក់ផងដែរ។
មន្ត្រីនគរបាលរូបនេះ បានអះអាងថា ជនសង្ស័យទាំងនោះ បានក្លែងបន្លំខ្លួនជាសង្ឃដើរបិណ្ឌបាត្រតាមទីផ្សារទីសាធារណៈ និងដេកស្នាក់នៅតាមផ្ទះសំណាក់ក្នុងក្រុងសៀមរាបបែបអនាធិបតេយ្យ។
លោក ហួត ធី បានឲ្យដឹងទៀតថា ជនសង្ស័យដែលបានឃាត់ខ្លួនទាំងនោះ មានស្រុកកំណើតនៅខេត្តព្រៃវែង ខេត្តព្រះវិហារ ខេត្តតាកែវ ខេត្តកំពង់ស្ពឺ ខេត្តបាត់ដំបង ខេត្តកោះកុង ខេត្តកែប ខេត្តព្រះសីហនុ ខេត្តឧត្តរមានជ័យ និងខេត្តកំពត។
មន្ត្រីនគរបាលរូបនោះ បានបញ្ជាក់ថា ជនសង្ស័យទាំងនោះ ត្រូវបានបញ្ជូនទៅសាកសួរ និងពិនិត្យទឹកនោមរកសារធាតុញៀន បន្ទាប់ពីត្រូវបានឃាត់ខ្លួនកាលពីថ្ងៃម្សិលមិញនេះ៕