នៅទីបំផុត ការប្រកួតដែលដ៏ស្វិតស្វាញដែលបានធ្វើឡើងនៅប៉ុស្ដិ៍លេខ៥ ក្នុងព្រឹត្តិការណ៍ប្រកួតជម្រុះជើងឯកវគ្គថ្មី កាលពីថ្ងៃទី៣កុម្ភៈ ត្រូវបានបញ្ចប់ហើយ ដោយការប្រកួតជម្រុះគូរទី១ នៅក្នុងថ្ងៃនោះ គឺជើងខ្លាំងប៉ះ ជើងខ្លាំងតែម្ដងរវាងកីឡាករល្បីឈ្មោះ យុគ យក្សផ្លែ និងកំពែងខ្មៅ ដែលសុទ្ធតែជាកីឡាករល្បីឈ្មោះ និងមានបទពិសោធន៍យូរឆ្នាំ។ ការប្រកួតដែលត្រូវគេកត់សម្គាល់ថា ជាការជម្រុះរវាងកីឡាករល្អ និងកីឡាករល្អនេះ នៅទីបំផុតកីឡាករមកពីខេត្តបាត់ដំបង យុគ យក្សផ្លែ គឺជាអ្នកឈ្នះ បន្ទាប់ពីលោកបានប្រកាសដោយបើកចំហរសុខចិត្តទម្លាក់ចោលការងារដាំបន្លែប្រចាំគ្រួសារអស់រយៈពេល២ខែ មុនឡើងរេញ។
ជំនួបប៉ះគ្នារវាងកីឡាករ យុគ យក្សផ្លែ និងកីឡាករកំពែងខ្មៅ ត្រូវបានគេចាត់ទុកថាជាប្រកួតជម្រុះរវាងជើងខ្លាំងនឹងជើងខ្លាំង និងរវាងកីឡាករឡើងកូដជួរមុខនឹងជួរមុខ ដែលអ្នកទាំងពីរសុទ្ធតែមានកម្លាំងគាំទ្រប្រហាក់ប្រហែលគ្នា។ រវាងអ្នកទាំងពីរទោះអ្នកណាបានឡើងក៏មិនខុសគ្នានោះដែរ ដោយសារតែកីឡាករម្ខាងៗសុទ្ធតែមានសមត្ថភាព ហើយបើនិយាយពីបច្ចេកទេសសម្រាប់ការប្រកួតក៏មិនធម្មតាដូចគ្នា អ៊ីចឹងហើយទើបការប៉ះគ្នារវាងពួកគេត្រូវបានអ្នកទស្សនាសោកស្ដាយ ដោយសារតែត្រូវមានម្នាក់ហាលអាវ លែងមានឱកាសឡើងវគ្គបន្ត។ លោក សេង កដិកា បានហៅជំនួបរបស់អ្នកទាំងពីរថាជារឿងចៃដន្យដោយសារតែពេលចាប់ឆ្នោតបែរជាត្រូវប៉ះគ្នា។
លោកថា ក្នុងចំណោមកីឡាករដែលបានជម្រើសថ្មីទាំង៣២រូប មានការបញ្ចូលដោយកីឡាករជើងចាស់ និងជើងថ្មី ទើបសូម្បីតែលោកសម្ដែងការចាប់អារម្មណ៍ នៅពេលចាប់ផ្ដើមហើយបែរជាអ្នកទាំងពីរប៉ះគ្នាក្នុងជុំទី១។ លោកថា បើកុំតែចាប់ឆ្នោតត្រូវប៉ះគ្នា នោះអ្នកទាំងពីរនឹងបានឡើងវគ្គបន្តដូចគ្នាដោយស្វ័យប្រវត្តិ ជាពិសេសបើប៉ះជាមួយកីឡាករជើងថ្មីក្នុងចំណោម៣២រូប។
លោកនិយាយថា «បើការជម្រុះវគ្គដំបូង ២នាក់ហ្នឹងអត់ចាប់ឆ្នោតជួបគ្នា ពួកគេពិតជាប៉ះគ្នាក្នុងវគ្គល្អមើលជាងហ្នឹង!»។
ការប្រកួតរបស់គូទាំង២ ល្អមើល ជាពិសេសនៅពេលភាគីម្ខាងប្រឹងៗរៀងខ្លួន តែកីឡាករយុគ យក្សផ្លែ នៅតែមានឱកាសវាយអោយបង្គោលក្រហម គឺកំពែងខ្មៅ ដែលជាកីឡាករល្អម្នាក់បោះបង់ការប្រកួតក្នុងទឹកទី២។ មួយគូនេះប្រកួតគ្នាបានត្រឹមតែទឹកទី២ប៉ុណ្ណោះក៏បានបញ្ចប់ ដោយសារតែកីឡាករដែលឈ្នះការប្រកួត និងជាអ្នកដណ្ដើមបានកៅអី១៦នាក់ ប្រថុយចូលសម្រុកក្រោយពីក្ដៅស្លឹកត្រចៀក ហើយលទ្ធផលចុងក្រោយគឺគេអាចធ្វើអោយកីឡាករ កំពែង ខ្មៅ ត្រូវចំចំណុចសំខាន់ ហើយមិនអាចបន្តការប្រកួតបានដោយជោគជ័យ។
យុគ យក្សផ្លែ បានអះអាងថា មុនពេលសម្រេចចិត្តឡើងរេញ លោកបានចំណាយពេលរហូតដល់៣ខែ ដើម្បីហ្វឹកហាត់ទាំងកម្លាំងស៊ុហ្វ និងបច្ចេកទេស ទើបការប្រកួតដែលបានធ្វើឡើងធ្វើអោយលោកមានទំនុកចិត្តថាឈ្នះតាំងពីពេលប៉ះគ្នា បើទោះជាបើកឆាកទឹកទី១លោកត្រូវកីឡាករគូប្រកួតវាយអោយចង់ទ័លទីច្រើនអន្លើ។ លោកថានៅខេត្តបាត់ដំបង លោកគឺជាអ្នកដាំបន្លែរួមមានស្ពៃ និងបន្លែបង្កាផ្សេងទៀតដើម្បីលក់ដូរ និងយកលុយដោះស្រាយជីវភាព បន្ទាប់ពីការងារផ្សេងទៀតមិនអាចអោយលោកទទួលបានកម្រៃទៀងទាត់នៅពេលការប្រដាល់មិនមានការផ្គូរផ្គង។
ប៉ុន្តែ លោកនៅតែសម្រេចចិត្តដកឃ្លាពីការមើលថែបន្លែ និងដាំបន្លែ ដោយទុកអោយតែភរិយាមើលខុសត្រូវដំណាំបន្លែម្នាក់ឯង ហើយលោកបង្ហាញខ្លួនតែនៅកន្លែងក្លិបហ្វឹកហាត់ ព្រោះតែមិនចង់បរាជ័យ។ លោកថាការប្រកួតកន្លងមកគឺទាល់តែមានការផ្គូរផ្គងទើបបានឡើងរេញ ប៉ុន្តែបើលោកប្រកួតឈ្នះសម្រាប់ការប្រកួតនៅប៉ុស្ដិ៍លេខ៥ គឺលោកនឹងមានការប្រកួតជាប្រចាំបើលោកបន្តឈ្នះនៅពេលឡើងជម្រុះ ទើបលោកសុខចិត្តបោះបង់ដំណាំបន្លែដល់ទៅ២ខែដើម្បីហ្វឹកហាត់ ហើយជាលទ្ធផលគឺលោកបានឈ្នះ។
លោកនិយាយថា «ដាំបន្លែពីរបីខែទើបបានលក់ម្ដង ហើយក៏បានតែ៣០ម៉ឺន(រៀល)អីទេ ប៉ុន្តែបើបានឡើងរេញញឹកគឺបានច្រើនជាង ទើបខ្ញុំអត់អាចអោយចាញ់បានទេ ដើម្បីបានឡើងប្រកួតរហូតស្រួលរកលុយ»។
លោកសប្បាយចិត្តដែលការបោះបង់ការដាំបន្លែរបស់លោកដល់ទៅ២ខែ ទទួលបានលទ្ធផលល្អ ក្នុងពេលដែលលោកក៏រាងបុកពោះច្រើនដែរ សម្រាប់ការប៉ះគ្នាជាមួយជើងខ្លាំង កំពែងខ្មៅ។ លោកត្រូវបានបន្តទៅវគ្គ១៦នាក់ និងត្រៀមខ្លួនបន្តការជម្រុះដណ្ដើមកៅអី៨នាក់បន្តទៀត ក្រោយពីឈ្នះការប្រកួតក្នុងជុំដំបូងនេះ៕
