យោងតាមការបញ្ជាក់របស់ភរិយារបស់លោក ប៊ុត សីហា មុននេះបន្តិច បានអះអាងថា លោក ប៊ុត សីហា ពិតជាត្រូវបានចាប់ខ្លួនពីបទពាក់ព័ន្ធនឹងគ្រឿងញៀនមែន ប៉ុន្តែលោកត្រូវបានដោះលែងនៅវេលាម៉ោងប្រមាណជាជិត១២យប់ ថ្ងៃទី២១ កុម្ភៈនោះវិញ បន្ទាប់ពីខាងសមត្ថកិច្ចស្រាវជ្រាវឃើញថានោះជាការយល់ច្រលំ។
យ៉ាងណាមិញភរិយារបស់លោកហាក់មិនភ្ញាក់ផ្អើលនឹងដំណឹងដែលធ្វើអោយស្វាមីរបស់ខ្លួនរងការអាម៉ាស់នោះទេ ដោយអ្នកនាងយល់ថាក្នុងពេលដ៏ខ្លីអ្វីៗនឹងត្រូវស្ងប់ស្ងាត់។ អ្នកនាង ឃុន ស្រីនាង ជាអ្នកលើកទូរស័ព្ទ និងជាភរិយារបស់លោក ប៊ុត សីហា បានអះអាងថា កាលពីវេលាម៉ោង៥ និង៣០នាទី ថ្ងៃទី២១ កុម្ភៈ ពិតជាមានក្រុមសមត្ថភាពមកស្ទាក់ចាប់លោក ប៊ុត សីហា នៅម្ដុំសាលាបឋមសិក្សាពងទឹក ក្នុងខណ្ឌដង្កោរ ក្នុងពេលដែលលោកធ្វើដំណើរទៅផ្ទះរបស់ខ្លួនពិតមែន ដោយក្រុមសមត្ថកិច្ចបានទាំងចាប់បញ្ជូនលោកទៅកាន់សាលាខណ្ឌអស់ប៉ុន្មានម៉ោងនោះផង។
ប៉ុន្តែអ្នកនាងថាការដោះលែងត្រូវបានធ្វើឡើងទាំងយប់វិញភ្លាមៗ បន្ទាប់ពីរកឃើញថានោះជារឿងយល់ច្រលំ។ អ្នកនាងបញ្ជាក់ថាលោក ប៊ុត សីហា អត់មានរត់ពន្ធគ្រឿងញៀន ដូចការចោទប្រកាន់នោះទេ តែអ្នកនាងបានសារភាពថាដោយសារតែលោកបម្រើការអោយមេម្នាក់ដែលពាក់ព័ន្ធនឹងករណីនេះ ទើបមានការសង្ស័យ
ហើយឈានដល់ការចាប់ខ្លួនដើម្បីយកទៅសាកសួរ។
អ្នកនាងស្វាមីត្រូវបានដោះលែងអោយត្រលប់មកផ្ទះវិញទាំងយប់ ដោយខាងមន្ត្រីសមត្ថកិច្ចនៅខណ្ឌដង្កោមានបំណងចង់កែព័ត៌មានផងដែរ ប៉ុន្តែព័ត៌មានបានចេញទៅលឿនរួចបាត់ទៅហើយ។
អ្នកនាងនិយាយថា «រឿងយប់មិញគេចាប់គាត់មែន ប៉ុន្តែដល់ពេលដឹងថាជាការយល់ច្រលំ ទើបគេដោះលែងវិញ ហើយមកពីព័ត៌មានចេញទៅលឿនពេក ទើបចង់បញ្ជាក់ថាមិនមែនជាការពិតអីក៏មិនកើត!»។
អ្នកនាងបញ្ជាក់ថា លោក ប៊ុត សីហា នៅសម្រាកនិងនៅភ័យមិនទាន់បាត់នោះទេ ដោយលោកភ័យរឿងបាត់បង់ប្រជាប្រិយភាពនៅក្នុងពិភពចម្រៀងនោះផង។ អ្នកនាងថាខ្លួន និងលោក ប៊ុត សីហា រៀបការ៤ឆ្នាំហើយ ហើយក៏មិនដឹងរឿងស្វាមីញៀនថ្នាំ ឬជួញដូរគ្រឿងញៀននោះដែរ ដោយអ្នកនាងបញ្ជាក់ថាព័ត៌មានដែលធ្លាប់លេចឮ គឺជាការយល់ច្រលំ។
អ្នកនាងនិយាយថា «ខ្ញុំនៅជាមួយគាត់បានកូនស្រីមួយហើយ គឺអត់ដែលមានរឿងអ៊ីចឹងទេ ហើយបើរឿងវាយតប់ភរិយា គឺរឹតតែអត់មាន គាត់ស្រឡាញ់ប្រពន្ធកូនសឹងអីនឹង»។
ជាមួយនឹងការបកស្រាយរបស់អ្នកនាង ឃុន ស្រីនាង ជាភរិយារបស់លោក ប៊ុត សីហា បានធ្វើអោយការយល់ច្រលំត្រូវបញ្ចប់ ប៉ុន្តែអ្នកដែលស្គាល់ពី ប៊ុត សីហា ច្បាស់នៅតែអះអាងថាតារាចម្រៀងរូបនេះ មានមិត្តភ័ក្រ្តបនភឿនច្រើនដែលមួយចំនួនគឺជាអ្នកពាក់ព័ន្ធគ្រឿងញៀន ដែលមិនទាន់ជឿថាលោកមិនពាក់ព័ន្ធមុនឈានដល់ការចាប់ខ្លួននោះទេ។
យ៉ាងណាក៏ដោយ ក្រោយការបញ្ជាក់ថាលោកបានមកដល់ផ្ទះវិញដោយសមត្ថភាពគឺអ្នកគាំទ្រភាគច្រើនអបអរសារទរ ដោយសារទែមិនចង់អោយអតីតម្ចាស់ពាន The Voice Cambodian រដូវកាលទី១រូបនេះ បាត់បង់អាជីពចម្រៀង៕