អ្នកជំនាញដែលកំពុងឃ្លាំមើលការអនុវត្តច្បាប់សម្តែងការព្រួយបារម្ភថា ហេតុការណ៍កើតឡើងបន្តបន្ទាប់គឺក្រោយពេលគ្រោះថ្នាក់ចរាចរណ៍ មហាជនតែងវាយដំគ្នារហូតដល់របួសឬស្លាប់នោះ កំពុងតែសាបព្រោះវប្បធម៌ហិង្សាក្នុងសង្គម។
អនុប្រធានអង្គការជនពិការអន្តរជាតិ(ប៊ែលហ្ស៊ីក) លោក គង់ រតនៈ មានប្រសាសន៍ថា ករណីប្រជាពលរដ្ឋដេញតាមវាយលើអ្នកបើរថយន្តបុកអ្នកដទៃនោះមានច្រើនករណី។ លោកក៏បានលើកឡើងករណី បុរសម្នាក់បើករថយន្តបុករះតាមដងផ្លូវចាប់ពីម្តុំទួលសង្កែ ខណ្ឌប្ញស្សីកែវ រហូតដល់ម្តុំមន្ទីរពេទ្យលោកសង្ឃកាលពីម្សិលមិញ ត្រូវបានប្រជាពលរដ្ឋវាយកម្ចេចរថយន្តនិងមនុស្សជិតស្លាប់។
លោក គង់ រតនៈ បន្តថា សកម្មភាពទាំងនេះកំពុងធ្វើឲ្យមានការគុំគួនគ្នា អ្នកផ្សេងមើលឃើញហិង្សាអាចនឹងធ្វើតាម ហើយពិសេសនោះប៉ះពាល់ដល់វិស័យទេសចរណ៍ និងការវិនិយោគ។
លោកមានប្រសាសន៍ថា «ឆ្លងកាត់តាមរួបភាពដែលយើងបានឃើញតាមរយៈវីដេអូឃ្លីបកាលពីម្សិលមិញ បរទេស ឬក៏ក្រុមទេសចរណ៍ ឬក៏ក្រុមវិនិយោគទុនគេមក គឺប៉ះពាល់ដល់កិត្តិយសរបស់ជាតិសាសន៍យើងទាំងមូល…ខ្ញុំសំណូមពរបើសិនជាអាចបងប្អូនប្រជាពលរដ្ឋ សុំមេតាពិចារណា យើងមានច្បាប់ បើទោះជាច្បាប់យើងមិនទាន់បានល្អ មួយរយ ភាគរយ យើងមានសិទ្ធិលើកដៃឡើងធ្វើការតស៊ូមតិទាមទារ តាមបែបអហិង្សា ខ្ញុំគិតថាជាដំណោះស្រាយល្អជាងការប្រើដៃប្រើជើង»។
កាលពីខែមីនា ឆ្នាំ២០១៣ និស្សិតសាកលវិទ្យាល័យវិទ្យាសាស្ត្រសុខាភិបាលអាយុ២៣ឆ្នាំ ត្រូវជាកូនស្រីរបស់អនុប្រធាន មន្ទីរពេទ្យបង្អែកខេត្តកណ្តាល បានបើករថយន្តបុករះ រងរបួស៣០ នាក់។ ពេលនោះក៏ផ្ទុះកំហឹងពីមហាជនដែរតែសមត្ថកិច្ចទប់ស្កាត់ទាន់ពេល។
ក្រោយមកនៅចុងខែធ្នូឆ្នាំមុនបុរសម្នាក់ទៀត ស្នាក់នៅសង្កាត់ចាក់អង្ក្រែក្រោម បានបើករថយន្តបុករះបណ្តាលឲ្យមនុស្ស៣នាក់ស្លាប់ និង៨នាក់រងរបួស នៅតាមបណ្តោយផ្លូវព្រះមុនីវង្ស ក្បែរវិទ្យាល័យបឹងត្របែក រាជធានីភ្នំពេញ នៅពេលបុកនោះប្រជាពលរដ្ឋត្រួតគ្នាវាយឲ្យរបួសក្បាល ធ្វើឲ្យមានបញ្ហាខួរក្បាលធ្ងន់ធ្ងរ។
លោកមេធាវី សេក សោភ័ណ្ឌ បានពន្យល់តាមនីតិវិធីច្បាប់ថា ករណីគ្រោះថ្នាក់ចរាចរណ៍ អ្នកបើកបរបុកគេបណ្តាលឲ្យរងរបួស ឬខូចខាតទ្រព្យសម្បត្តិអ្នកដទៃត្រូវទទួលសុខត្រូវតាមច្បាប់ស្តីពីចរាចរណ៍ផ្លូវគោក។ ប៉ុន្តែលោកថា អ្នកដែលទៅវាយអ្នកបើកបុកគេ ត្រូវមានទោសព្រហ្មទណ្ឌ ដោយថាច្បាប់មិនតម្រូវឲ្យប្រជាពលរដ្ឋធ្វើជាអ្នកកាត់ក្តីជំនួសតុលាការឡើយ។
លោក សោភ័ណ្ឌ ពន្យល់ទៀតថា ប្រជាពលរដ្ឋទៅប្រើហិង្សាលើអ្នកបើកបុកគេនោះ ទំនងជាពួកគេអស់ជំនឿលើប្រព័ន្ធយុត្តិធម៌។
លោកពន្យល់ថា «ជាទូទៅខ្ញុំក៏ធ្លាប់ឮហេតុការណ៍ដូចគ្នា បើសិនជាយើងសន្និដ្ឋានថាម៉េចបានពលរដ្ឋប្រព្រឹត្តបែបហ្នឹង ទីមួយគាត់អត់ដឹងថា…ជាបទល្មើសក៏ថាបានដែរ ទីពីរអាចគាត់គិតថា បើសិនជាមិនវាយទេមិនរាងទេ ព្រោះគាត់អត់មានជំនឿលើការដោះស្រាយតាមផ្លូវច្បាប់ជាដើម»។
រដ្ឋមន្ត្រីក្រសួងមហាផ្ទៃ លោក ស ខេង បានថ្លែងក្នុងកិច្ចប្រជុំមួយកាលពីថ្ងៃទី២២ខែមករាថា គ្រោះថ្នាក់ចរាចរណ៍នៅតែជាបញ្ហាប្រឈមដែលមន្ត្រីពាក់ព័ន្ធត្រូវតែពង្រឹងទប់ស្កាត់ ដោយលោកយោងទៅលើរបាយការណ៍ប្រចាំឆ្នាំ របស់អគ្គស្នងការវាយយតម្លៃថា ជាមធ្យមមនុស្សយ៉ាងតិចស្លាប់៥ទៅ៨នាក់ក្នុងមួយថ្ងៃ។
របាយការណ៍ដដែលបញ្ជាក់ទៀតថា គ្រោះថ្នាក់ចរាចរណ៍ បានសម្លាប់មនុស្សជិត ១៨០០នាក់ ខណៈមនុស្សជាង ៥៥០០នាក់ទៀតបានរងរបួស នៅក្នុងគ្រោះថ្នាក់ចរាចរណ៍នៅទូទាំងប្រទេស កាលពីឆ្នាំ២០១៧កន្លងមក៕
