ធនាគារពិភពលោករក​ឃើញ​ថា សិស្សថ្នាក់ទី២ ម្នាក់​ក្នុង​ចំណោម​៣​នាក់​ មិនទាន់ចេះអានអក្សរ

ធនាគារពិភពលោក បានរកឃើញថា យ៉ាងហោច​សិស្សថ្នាក់ទី២កម្ពុជា ម្នាក់ក្នុងចំណោមបីនាក់ មិនចេះអានអក្សរសូម្បីមួយពាក្យ។

ក្នុងសេចក្តីប្រកាសព័ត៌មាន ពីទីក្រុងហ្សាការតានៅថ្ងៃនេះ ធនាគារ​ពិភព​លោក បាន​បង្ហាញ​របាយការណ៍​ស្ដី​ពី «ភាព​ឈ្លាស​វៃ​កាន់​តែ​ប្រសើរ​ឡើង៖ ការ​រៀន និង​ការ​អភិវឌ្ឍ​ប្រកប​ដោយ​សមធម៌​នៅ​ក្នុង​តំបន់​អាស៊ី​ប៉ាស៊ីហ្វិក»។

ធនាគារ​ពិភព​លោក​ បាន​និយាយ​ក្នុង​សេចក្ដី​ប្រកាស​ព័ត៌មាន​ដដែល​នោះ​ថា មួយភាគបី ឬច្រើនជាងនេះនៃសិស្សថ្នាក់ទី២ នៅប្រទេសកម្ពុជា និងទីម័រខាងកើត នៅតែមិនអាចអានដាច់សូម្បីតែមួយពាក្យ ក្នុងការធ្វើតេស្តអំណាន។

របាយការណ៍នេះបន្តរកឃើញថា ចំណូលគ្រួសារមិនបានកំណត់ថា ជាកត្តាជោគជ័យនៃការសិក្សាអប់រំរបស់កុមារឡើយ។

របាយការណ៍ដដែល ក៏និយាយផងដែរថា ក្នុងចំណោមប្រព័ន្ធសាលារៀនដែលដំណើរការល្អចំនួន ១០លើពិភពលោក មាន​ប្រាំ​ពីរ​ស្ថិត​នៅ​ក្នុង​តំបន់​អាស៊ីបូព៌ា ដោយថា ប្រទេសចិន និងវៀតណាមជាអ្នកនាំមុខគេ។

របាយការណ៍ដដែលនេះបញ្ជាក់ថា យ៉ាងណាក៏ដោយមួយផ្នែកធំនៃតំបន់នេះ នៅមានសិស្ស ៦០ភាគរយកំពុងរៀននៅសាលាខ្វះគុណភាព។

VOD មិនទាន់អាចសុំការឆ្លើយតបពីអ្នកនាំពាក្យ និងរដ្ឋមន្ត្រីក្រសួងអប់រំយុវជន និងកីឡាបានទេនៅថ្ងៃនេះ ដោយ​ទូរសព្ទ​ចូល​មិន​មាន​អ្នក​ទទួល។

សម្រាប់នាយកប្រតិបត្តិអង្គការភាពជាដៃគូអប់រំនៃអង្គការក្រៅរដ្ឋាភិបាល លោក ជិន ចាន់វាសនា មានប្រសាសន៍ថា លោក​មិន​ជឿ​ថា កូន​សិស្ស​ខ្មែរថ្នាក់ទី២ មិនអាចអានបានសូម្បីមួយពាក្យនោះទេ ប៉ុន្តែ លោកថា លោក​សុំ​ពេល​មើល​របាយការណ៍​របស់​ធនាគារ​ពិភព​លោក​នេះ​សិន ដើម្បី​ដឹងពីវិធីសាស្ត្រស្រាវជ្រាវរបស់គេ។

របាយការណ៍ក៏រកឃើញដែរថា ប្រព័ន្ធអប់រំដែលមានដំណើរការល្អ គឺចាយថវិកាប្រកបដោយប្រសិទ្ធិផលទៅលើហេដ្ឋារចនាសម្ព័ន្ធសាលារៀន និងទៅលើគ្រូ ដោយមាននីតិវិធីជ្រើសរើសគ្រូល្អបំផុតមកបង្រៀន និងមានការផ្តល់រង្វាន់លើកទឹកចិត្តដល់គ្រូដែលបំពេញការងារបានល្អ។

លើសពីនេះ ប្រព័ន្ធសាលារៀនបានបង្កើនលទ្ធភាពចូលរៀន​កម្រិតមត្តេយ្យរួមទាំងគ្រួសារក្រីក្រ និង​ដាក់​បញ្ចូល​ការ​វាយ​តម្លៃ​ការ​រៀន​សូត្រ​របស់​សិស្សក្នុងគោលនយោ​បាយ​អប់រំ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ